لكل الشاطرين اللي بيخلصوا شغلهم بدري, او الفهلوية اللي بيخلصوه بدري جدا, او الكسالي اللي مبيشتغلوش اصلا ( هيجي علي دماغك في الاخر خلي بالك )
كتير بتبقي في الشغل وملتزم بساعات عمل محددة و تلاقي انك مخلص – او مطنش – مهام اليوم كلها؛ فبدل ما تسيب الملل يتملك منك ممكن تستفيد بالوقت ده في حاجه تانية زي:

1- اقرأ اكتر في مجالك

فريند زون 2

كل المطلوب توافره هو جهاز كومبيوتر متصل بالانترنت, دور علي اي جديد في مجالك و اقري عنه يمكن تطور امكانياتك و مهاراتك وساعتها هتخلص شغلك اسرع واسرع ومش هتلاقي حاجه تعملها برضه

2- ساعد زميلك

غبي منه فيه

لو انت مخلص وفاضي اكيد زميلك مزنوق وعنده Dead line مش عارف يعمل ايه, لو ممكن تساعده متتاخرش حتي لو مجرد هتفكر معاه, اكيد هيجي يوم انت محتاج مساعده وساعتها هتلاقيه بيساعدك

3- خطط للويك اند او للسفرية اللي جايه

this is egypt

لو محتاج تتفرج علي اماكن او تتصل تحجز او حتي تتفق مع اصحابك هتروحوا فين

4- فكر هتلبس ايه في الشغل بكره

البدلة الصفرا

طبعا ده للبنات فقط الولاد مبتفكرش هتلبس ايه في الشغل بكره غير بكره وهما نازلين من البيت و بيستغرق تفكيرهم حوالي دقيقة ونص اما البنات فممكن توفري الساعة الا ربع اللي بتفكري فيها هتلبسي ايه في الشغل بكره من دلوقتي و نامي الشوية دول

5- اقرأ ايدنتيتي

identity

ايدنتيتي عالماشي كده حاجه تسليك في وقت سريع .. الويبسايت عليه اكتر من 3000 مقال حاول تقرأهم كلهم عشان نحبك 😀

6- خلص مكالمات الشكاوي بتاعة الاسبوع كله

محمد هنيدي الو ممكن اشارك

مفيش اسبوع بيخلي من مكالمات شكوي مستمرة سواء لمقدم خدمة الانترنت علشان الانترنت واقع او لخدمة عملاء شركة المحمول عشان حاسبوك غلط او للبنك ….. الخ
اخلص منهم كلهم في وقت واحد وريح دماغك طول الاسبوع

7- جرب نفسك في حاجه جديدة

اللي بالي بالك اختي الحبيبة المحلوبة

جرب نفسك في حاجه معملتهاش قبل كده, زي مثلا الكتابة. جرب تكتب مقال خفيف لطيف قصير كده وابعتهولنا علي [email protected]  يمكن ننشره و تتشهر بقي 😀

8- تتابع اخر اخبار البلد

عكاشة بالجزمة

الحمد لله عندنا في مصر كل يوم فيه جديد, تابع الجديد بتاع النهاردة مش هتزهق ابدا (لا ينصح به لمرضي القلب والسكر وضغط الدم والمرارة)

9- اعمل شغل بكره

غبي منه فيه 2

بس ساعتها هتواجه مشكلة اكبر بكره

10- Brainstorm

تفكير عميق عبد الغفور

المخ عضو زي كل اعضاء الجسم, لو قل استخدامه هيصدي. فكر في افكار جديدة سواء للشغل او لاي موضوع تاني. شغل دماغك وشوف احتمالات مختلفة واحسبها يمكن ربنا يفتحها عليك وتحطم النسبية العامة او الخاصة
شارك المقال ده مع اصدقائك في العمل ولو عندكوا افكار تانية حابين تقترحوها علينا تقدروا تراسلوا الكاتب علي الفيسبوك