فرحة السفر متتقارنش بأى فرحة تانية، ويا سلام لو ربنا كرمك فى السفرية وانبسطت ورُحت مكان أحلامك هتبقى أكيد مش عايز ترجع، لكن تخيل انك ممكن تنبسط برجوعك!

 

1- الواي فاي وأول أهلا

wifi

وانت مسافر قليل أوى هتلاقى أماكن فيها واي فاي ويكون شغال أصلا وسرعة النت كويسة وعشان كده بتستهلك باقة الانترنت كلها وقت السفر، وبالتالى مع دخولك البيت وصوت تليفونك وهو بيُلقُط شبكة الواي فاي بتحس انك بتسمع أول حمدلله عالسلامة
2- منور بأهله

BudaarLIgAEUuoC

مهما كان بينك وبين أهلك مشاكل أو خلافات كانت سبب فى انك تفكر تسافر وتسيبلهم البيت فترة، هو أسبوع واحد وهيوحشوك لدرجة انك هتاخدهم بالحضن بمجرد ما تشوفهم وتبقي مش مصدق انك أخيرا رجعت وقاعد معاهم!

 

3- الشاشة الصغيرة

لو انت من محبي ومتابعي التليفزيون هتتعسف شوية وانت مسافر انك تتابع برامجك ومسلسلاتك وقنواتك المفضلة لأن آخر حاجة أى مكان سياحي بيهتم بيها هو وجود التليفزيون أكيد، مانتَ مش مسافر عشان تتفرج عالتليفزيون يعني.. وعشان كده ده واحد من أسباب فرحتك أو ارتياحك برجوعك للبيت.

 

4- الشطافة

Hniedy

طبعا التعسيفة الأكبر فى تاريخ البشرية، حتى لو مش مسافر بره وهتقضيلك يومين فى شرم ولا هتخطفلك أربع أيام فى نايل كروز بين الأقصر وأسوان، هتلاقى بحكم ان الأماكن دى سياحية وبيراعوا فيها عادات الأجانب أكتر فهتتصدم وقت تلبية نداء الطبيعة انك هتحتاج الطبيعة كمان فى مساعدتك للخروج بأقل خساير من الموقف البدائى ده.
5- كله إلا أكل أمي

مهما أكلت فى أحسن مطاعم العالم ومن ايدين أشطر شيفات فى الدنيا، برضه هيوحشك طبقك المفضل من ايدين ست الكل وهيبقي أول حاجة تسأل عنها أول ما تدخل البيت وبعد السلامات: عاملالنا ايه عالغدا بقي يا ماما؟
6- الأماكن كلها مشتاقة لك

يعني برغم الزحمة وصعوبة اللمة مع أصحابك عشان ظروف كل واحد فيكوا إلا ان أول حاجة بتعملها لما بترجع من السفر بعد الغدا مع أهلك بتنزل القهوة بقى تشوف الصحاب أو بتظبطوا خروجة فى الكافيه المفضل اللى دايما قعدته بتوحشك مهما قعدت فيه كل يوم
7- عديت على البيت اللى كان فيه الحبايب

Capture

وطبعا لو مصاحب وحتى لو متخانق مع صاحبتك قبل ما تسافر، لو بتحبها فعلا هتوحشك وهتبقي ملهوف تشوفها أول ما ترجع
8- يوم الجمعة

لسبب ما كل ما بتسافر لمكان حتى لو رُحت محافظة تانية جوه نفس البلد وعدى عليك يوم جمعة، مش هتحس بيه؛ ريحة الفول والطعمية السخنة وسط لمة أهلك عالفطار وبعدين الصلاة فى الجامع اللى بتصلى فيه من صغرك وسط جيرانك وصُحابك.. كل ده بتفتقده فعلا وانت مسافر
9- الدليفيرى

وانت مسافر وحتى لو نازل فى أوتيل برووم سيرفيس محترم، هتبقى برضه مضطر كل يوم تختار من منيو أكل جديدة أو توصيهم على حاجات معينة بتحبها أو مبتحبهاش فى أكلك، لكن أول ما بترجع بيكون وحشك مطعمك المفضل لما تكلمهم وتطلب منهم طلبك المعتاد ويعملوه زى ما بتحب ويوصلوه لحد عندك وطبعا نفس الكلام على السوبر ماركت اللى بتكلمه هتلاقيه عارفك وعارف طلباتك كمان من غير ما تقول ومش محتاج تنزل مخصوص عشان تشترى اللى محتاجه

10- هوم سويت هوم

T6HCeG2

حتى لو مفيش كل الأسباب دى ويمكن أكتر، إحساس انك رجعت “البيت” اللى بتفضل حاسس بيه لمدة يوم أو اتنين بعد رجوعك، لوحده بيبسطك ويديك إحساس بالراحة ..