دايما لما بتقرر تسافر بتفكر: مين من صحابى ممكن ييجى معايا؟! وعمرك ما فكرت تسافر لوحدك! خايف من مخاطرة انك تكون لوحدك بالذات لو رايح مكان لأول مرة، خايف متنبسطش، خايف يحصلك حاجة، خايف، خايف.. خايف.. طب ما تيجوا نشوف:

1 – الخوف

الخوف من المكان اللى مسافرله لوحدك لأول مرة هو أول سبب، لكن لما بتتجرأ وتقوم بالتجربة مع كل خطوة فى السفرية الخوف بيقل وثقتك فى نفسك بتزيد.. متخافش! انت مش صغير وهتعرف تتصرف. وافتكر ردك دايما على ماما كل ما تقولك: مش خايف يحصلك حاجة لما بتتأخر بره كده؟
انت: هتخطف يعني !

5b0ab3224b3a341072f218e91ba82d3a

2 – الفلوس

لو سافرت مع أصحابك وقررت تتجنن شوية وتصرف كل اللى معاك، هتلاقى اللى يقولك “يابنى القرش الأبيض ينفع فى اليوم الأسود” ومحدش عارف بكره فى ايه وكلام كتير يحسسك بالذنب مع كل قرش بتصرفه وتندم مع كل كلمة بتسمعها. ده غير الحكم عليك كشخص “مبذر”، ومعندوش إحساس بالمسئولية! .. سافر لوحدك واصرف زى ما تحب من غير حساب لغيرك ولا لكلامهم، احنا مرة كام هنعيش

3 – التعليم

مش بس لما تقرر تسافر لوحدك تتعلم، لكن سفرك مع أصحابك عموما بيلهيك عن حاجات كتير ممكن تتعلمها فى السفر زى انك تتعلم لغة البلد وانك تعمل حاجات لأول مرة لوحدك فتقدر تتعلمها بشكل أفضل زى التخييم مثلا أو حتى انك تتعلم ازاى تعيش وتبص للدنيا بشكل مختلف فتكتشف حاجة مكونتش شايفها قبل كده “راجع فيلم love & pray, eat ..هو طويل حبتين بس يستاهل”

eat_pray_love_movie_night

4 ­ الكسل:

فى سبب وجيه أكيد ورا ان الكسل هو واحد من الخطايا السبعة المميتة! آه مميتة؛ وانت لما تكسل تعمل حاجات كتير فى حياتك مش هتموت بالبطئ؟ وكسلك ده مانعك تعمل ايه؟ مانعك تنجح، مانعك تغّير كاريرك وتشتغل الحاجة اللى بتحبها، مانعك تخلص الكتاب اللى بدأته فى أيام الجاهلية ومش عارف تخلصه، مانعك تكلم البنت اللى عاجباك من أولى الكلية، ومانعك تسافر! .. عرفت ازاى مميت ؟

Se7en

5 ­ الخناق والخلافات

وانت مسافر مع أصحابك ومهما كانت درجة اتفاقكوا وحبكوا لبعض، لازم هتختلفوا حتى لو كان على “نعمل ايه النهارده؟ ننام طول النهار ونسهر طول الليل؟ ولا نخربها الصبح وننام بدرى عشان نلحق تانى يوم من أوله؟” كل ده مبيبقاش موجود لما بتسافر لوحدك، بترتاح من وجع دماغ وخناقات كتير ومبترجعش لحد فى قراراتك ولو قررت تعمل تغيير مفاجئ فى خططك مبتلاقيش اللى يلومك أو يقولك لأ مش هينفع احنا سستمنا نفسنا خلاص.

 

6 – الاكتشاف

السفر لوحدك هيخليك تكتشف حاجات مبهرة فى المكان اللى مسافرله أكتر من وانت مسافر مع أصحابك لأنك ببساطة مش ملهى معاهم فى الرغى أو التصوير وفى المقابل ده هيخليك كمان تكتشف حاجات فى شخصيتك زى انك تقدر تتأقلم مع ثقافات مختلفة، وده لوحده اكتشاف مهم ويستاهل التجربة. ده غير اكتشاف طبيعة تانية مختلفة مينفعش يفوتك الاستمتاع بيها من غير ما حاجة تلهيك.

7 – التجربة

وجود أصدقاء معاك دايما بيخليك متقيد بموافقتهم على أى حاجة حابب تجربها ومش سهل انك تنفصل عنهم وتعمل اللى انت عايزه، وده مبيبقاش موجود لما تسافر لوحدك؛ سفرك لوحدك بيخليك تجرب أكتر وبشكل عفوى فبيكون عندك تجارب أكتر قمت بيها لأول مرة تخلى ذكرياتك عن السفر مليانة تجارب من غير قيود أيا كانت لأن قيود الصحبة مش مجرد موافقتهم ومشاركتهم فى نفس التجربة، لكن كمان صعب تلاقى حد يسيبك تجرب حاجات كتير من غير ما يحكم عليك أو يقوم بدور الواعظ، حتى لو كانوا أصحابك.

9ec29abae5cbcab3b98ece5d4350f744_123650618_147

8 ­ دايرة معارف أكبر

السفر لوحدك بيخليك لازم تتعرف على أهل البلد اللى انت رايحها، بعكس ما وجود أصحابك بيغنيك عن أى معرفة حقيقية لأغراب عنك. يمكن خوفك من الغريب هيحجمك فى الأول ويخليك تتعامل بحذر لكن مع الوقت ومعرفة أهل المكان فى تعاملاتك اليومية هتلاقى الحواجز الحضارية والثقافية بينكوا بتروح ومعرفتهم بتأثر بشكل إيجابي على تقبلك للآخر مهما كان اختلافه عنك.

126_251_0_2010_12_23_9

9 ­ الوقت والقرارات

تعاملك مع عنصر الوقت ونظرتك ليه هتختلف بمجرد سفرك لوحدك سواء بتقديرك ليه أكتر أو بمحاولتك الاستفادة من كل ثانية منه على قد ما تقدر. ونفس الشئ بينطبق على طريقة اتخاذك للقرارات؛ فلو كنت شخصية مترددة هتبتدى تاخد قراراتك بشكل أسرع وقاطع والعكس. افتكر دايما ان وجودك لوحدك فى مكان غريب عليك هيسيب علامات مهمة فى شخصيتك وهيبنيها ويشكلها أحسن كتير من اختيارك الآمن للسفر مع اصحابك.

lost-in--amreica-arabic

10 ­ الانبساط

دايما لما بييجي فى بالك فكرة السفر لوحدك بيصاحبها فكرة انك ممكن متنبسطش على أساس إن “جنة من غير ناس ما تنداس”. بس بذمتك مش هتنبسط من التجربة لو اكتشفت هناك ان الجنة بتنداس من غير ناس عادى لأ وراجع مبسوط أكتر من أى سفرية سافرتها مع أصحابك!

612

11 ­ هروح فين

الأماكن اللى ممكن تروحها وتنبسط فيها لوحدك كتير بس يمكن وانت بتخوض التجربة لأول مرة هتحتاج يكون اختيارك ناحية البلاد اللى بتشتهر بكرم ضيافة أهلها وودهم زى: إيطاليا، اليونان وتشيلى. أما لو حابب تقوم بده جوه مصر الأول فمش هتلاقى أنسب من الأقصر وأسوان أو دهب.
اسوان
اسوان
دهب
دهب
ايطاليا طبعا
ايطاليا طبعا
اليونان
اليونان