تقريباً حياتنا كلها على أرض الواقع وعلى الفيسبوك بقت عبارة عن سلسلة متواصلة من الحزن والكآبة على أن كل واحد مش عارف يوصل لحلمه  وهدفه في الحياة. وساعات بحس ان بعض الناس بتقضي وقت في الحزن على احلامها اللي متحققتش اكتر ما بيقضوا وقت يحاولوا يحققوا فيه الحلم ده.. وبناءاً على تجربة ضئيلة في الحياة اكتشفت ان في حاجات معينة لو الواحد قدر يعملها فعلاً. هتكون بداية الطريق انه يوصل لحلمه الحقيقي

 

  • انا عايز جملة مفيدة

1

للأسف ساعات كتير الواحد مننا بيبقى مش عارف هو عايز ايه .. هو بيكون متخيل انه عارف هو عايز ايه.. بس لو ركز شوية مع نفسه في هدوء بعيد عن صخب الحياة هياخد باله أن احلامه نفسها مشتتة.. او يكتشف انه مركز في حاجتين عكس بعض.. او انه احلامه كتيرة جدا ومش بيلحق يمشي خطوة واحدة في حلم معين وبعدين يسبه وبروح يدور على حلم تاني.. ف أول خظوة وأهم خطوة أنك تحدد فعلا أن ايه هو حلمك في جملة واحدة مفيدة. لأن الكون مش بيستجيب لأي أفكار مشوشة.. الكون فعلا عايز منك جملة مفيدة محددة يقدر يشتغل عليها ويساعدك انك توصلها.

 

  • ماتقولش كده أنت جميل

2

ساعات كتير مش بنصدق اننا احنا اول عقبة في تحقيق احلامنا.. لأن للأسف بنكون اتعرضنا لاحباط كتير وبدأنا نصدق أننا مانستحقش احلامنا دي اساسا..أهم حاجة فعلاً تصدق انك تستحق الحلم اللي أنت حلمته وحطيته في جملة مفيدة.. طالما عقلك قدر يفكر في الحلم ده يبقى انت قادر تعمله وتنفذه فعلا.. صدق أنك تستاهل تتحط في الجملة المفيدة دي عشان ماتكونش عقبة في طريقك
  • إللي بيخاف.. يطلع بره

3

في فيلم البجعة السوداء.. المدرب بتاع البطلة كان دايما يقولها أنها هي الشخص الوحيد الوحيد اللي واقف في طريقها.. وده بسبب الخوف.. في ناس مش بتصدق انها ممكن تحقق احلامها وبيكون الموضوع كبير على استيعابها.. فلما يبتدي الكون يرمي للناس ناس حاجات تكون بداية تحقيق الحلم ده.. يبتدي الشخص يخاف.. ايوة احنا فعلا بنخاف نوصل بأحلامنا.. وتقريباً دي من أهم الخطوات اللي لازم تعملها أنك تبطل خوف تماماً.
  • الصبر

4

لما تشوف  من بعيد حياة الناس اللي حققت احلامها.. اوعى تفتكر ان ده حصل في يوم وليلة.. الموضوع فعلا صعب بس يستحق.. الصبر شيء مهم جداً لو كنت شخص ناوي يحقق احلامه مش يعيش حياة عادية.. لازم تكون صبور وبدون غضب أو تأفف.. لازم يكون جواك يقين أن حلمك هيتحقق وتستني ده بهدوء وحب من غير زن او توتر او تصرفات هوجاء تضيع كل اللي بنيته بأيدك
واللي أهم من ده كله بعد ما توصل بإذن الله لأحلامك ماتتغرش في نفسك.. وخلي عندك يقين ان اي حاجة وصلت لها ممكن تروح منك في لحظة لو اتنطط على خلق الله او تباهيت  بشكل متعجرف عن اللي حقتته وكأنك فتحت مصر.. وكمان ياريت لما تيجي تفرح افرح مع نفسك وفي هدوء وبلاش السياح على الفيسبوك