في ناس بتاكل عشان تعيش وناس تانية بتعيش عشان تاكل، ودول اللي الأكل بالنسبالهم “أسلوب حياة”، لما بيكونوا زعلانين بياكلوا ولما بيكونوا فرحانين بياكلوا ولما بيزهقوا بياكلوا برده، وحتى لما بيخرجوا وبيقابلوا أصحابهم بيدوروا على مكان حلو يروحوا ياكلوا فيه، من الأخر يعني بيحترموا الأكل وبيقدروه، بكل أصنافه وأنواعه، وعشان كدة بنسميهم “الأكيلة”.
انهاردة، وفي المقال ده هنقولكوا على الـ4 أبراج اللي بتنطبق عليهم المواصفات دي وبيصنفوا بأنهم أكتر الأبراج الضعيفة قدام الأكل.

برج العقرب

1

مواليد برج العقرب يعتبروا من أكتر الأبراج اللي بتحب الأكل وعشان كدة تلاقيهم مقضيين حياتهم كلها تيك أواي ومخلصين فلوسهم على تجربة أنواع وأصناف جديدة من الحلويات كل يوم، مرة وافل ومرة كريب نوتيلاً ومرة تانية ميكس محترم من الأيس كريم كدة يعني المهم انهم من الناس اللي مينفعش معاهم الدايت إطلاقاً 😀

برج الميزان

2

بتوع برج الميزان بقى ليهم ذوق مختلف، مش بياكلوا أي حاجة والسلام لأ، دول بيحبوا يتفننوا في الأكل، ولازم الطبق اللي هياكلوه أياً كان نوعه يكون شكله حلو ومتزوق بشكل يفتح النفس، وعلى الرغم من حبهم الشديد للأكل إلا إنهم عندهم دايماً وسواس الدايت، بيخافوا طول الوقت على وزنهم وبيلحقوا نفسهم في الوقت المناسب.

برج الأسد

3

برج الأسد بيختلف شوية عن غيره من الأبراج، وده لأن أصحابه عندهم فلسفة مختلفة في الأكل، يعني لأنه حاجة من أكتر الحاجات القيمة في الحياة، بيحبوا دايماً يكافئوا نفسهم بوجبة لذيذة ومميزة بعد يوم طويل ومتعب، وعلى الرغم من انهم مبيعرفوش يصمدوا قدام الدايت، إلا إنهم طول الوقت بيحاولوا وعندهم أمل 😀

برج الثور

4

وأخيراً بقى يجوا مواليد برج الثور، ودول هعترفهم لوحدك أول ما تشوفهم، وده لأن معظمهم بيكونوا “over weight”، لو مش كلهم يعني، طبعاً ماهو أكلهم كله باستا وبطاطس محمرة وبيتزا وكل أنواع الأكل اللي تتخيلها، واللي متتخيلهاش كمان، وبكميات مفيش بني أدم طبيعي ممكن ياكلها، مش بيوقفوا أكل لما بيشبعوا زينا كدة لأ، دول ممكن ياكلوا وهما نايمين كمان عادي جداً