زي ما فيه شخصيات تقدر تثق فيها وتحكيلها أسرارك وتستأمنها عليها وانت مطمن انها في بير عميق محدش هيقدر يوصله، في شخصيات تانية زي ما بيقولوا كدة “مبيتبلش في بقهم فولة”، مبيعرفوش يكتموا الأسرار، مش عيب فيهم لأ، بس عشان هما بيحبوا يتكملوا في كل حاجة واي حاجة تيجي على بالهم من غير ما يفكروا، ولإن الابراج ليها دور كبير في تحديد الملامح الأساسية لشخصية كل واحد فينا، هنقولكوا انهاردة من خلال المقال ده ايه هي الأبراج اللي مش بتعرف تكتم الاسرار عشان تاخد بالك وانت بتتكلم معاهم.

برج الحمل
1

مواليد برج الحمل من الشخصيات اللي مبتعرفش تتحكم في ردود أفعاها، خصوصاً لما بتتعصب، وبالتالي لو اتخانقت معاه أو حصل بينك وبينه أي مشلكة ممكن جداً تلاقيه بيقول أي كلام من غير ما يحس أو ياخد باله هو المفروض يقول ايه وميقولش ايه، وما بالك بقى لو كانت الخناقة دي في وسط ناس!

برج الجوزاء
2

مواليد برج الجوزاء من هواه “التلقيح” وبيعتبروه وسيلة للهزار والتسلية، يعني وانت قاعد معاه في وسط الناس ممكن تلاقيه راح راميلك كلمتين كدة ليهم علاقة بالموضوع اللي انت حكيتهوله، وفاكر ان محدش هيفهم غيرك، لكن للاسف طريقته بتبقى مكشوفة قوي وكل اللي قاعدين معاكوا بيفهموا قصده بسهولة جداً، وفي الأخر هو بيبقى اسمه محكاش حاجة لحد.

برج السرطان
3

مواليد برج السرطان من أكتر الشخصيات اللي بتعشق الرغي والدردشة، هتلاقيها طول ما هي قاعدة بتخرج من موضوع تدخل في اللي بعده، ومن غير ما ياخدوا بالهم ممكن يحكوا أسرارك في وسط كلامهم أو يستشهدوا بيها في موضوع تاني بيتكلموا فيه، مش سوء نية منهم، لكن عفوية وحسن نية، المهم أن النتيجة بتكون ان اسرارك ممكن جداً تبقى محور حديثهم من غير ما ياخدوا بالهم انهم بكدة بيفشوا اسرارك.

برج الحوت
4

مواليد برج الحوت بقى لانهم متقلبين المزاج جداً، مينفعش تحكيلهم أسرارك، لإن ببساطة أول لما يزعلوا منك في حاجة هتلاقيهم بيحكوا وبيقولوا ازاي يعمل معايا كدة، ده انا لما حكالي كذا وكذا وكذا وقالي متقولش لحد وقفت جمبه ومفتحتش بقي بكلمة، وطبعا مبيبقاش واخد باله انه بالفعل خلاص حكى أسرارك في وسط ما هو بيشكي.

لو كنت بقى من اللي بيحبوا الأبراج وبيهتموا بيها، ممكن تقرا مقال الأبراج العنيدة ومقال الأبراج الفضولية ومقال الأبراج اللي متنفعش في الجواز وغيرها من المقالات الكتير اللي هتلاقيها لو قلبت شوية في الموقع