إحنا كاسكندرانية بنتعامل مع الاسكندرية على أنها دولة مستقلة في حد ذاتها .. ليها عاداتها وتقاليدها وخصوصياتهم اللي بتميزها عن أي محافظة تانية في مصر .. بس للأسف في ناس كتير واخدين فكرة غلط عن الاسكندرانية وده بنسبة كبيرة بسبب التلفزيون .. الله يخربيت السيما اللي بوظت دماغكم على رأي مارد الكدواني.
وعشان كدة جه الوقت اللي نصحح فيه المفاهيم دي للي لسه مقتنع بيها وبيتعامل مع الاسكندرانية على أساسها. يلا بينا ..

1- مش بنقول “أيووووووه” ومش بنتكلم بصيغة الجمع

2
الاسكندرانية مش بيقولوا “أيوووووووه” ويحزقوا فيها كدة زي ما بنشوف في أي فيلم أو مسلسل بيتكلم عن الاسكندرانية .. ومفيش اسكندراني بيقول “أني” .. بنقول “أنا” عادي حضرتك .. ومفيش حد بيتكلم عن نفسه بصيغة الجمع زي ” أني هنروحوا” أو ” أني هنقطعكوا ” .. حضرتك ده حلاوة العنتبلي هو اللي كان بيتكلم كدة.

2- مش كل الاسكندرانية بيحبوا السمك

img_1374968495_285
حضرتك أنا ممكن أكون اسكندراني ومش بحب السمك عادي .. ممكن أكون اسكندراني وبحب الكفتة .. ممكن أكون اسكندراني وبحب الفاكهة .. ممكن أكون اسكندراني ونباتي .. إحنا مش بنتمرمغ في السمك طول اليوم .. الفكرة بس هو إنه متوافر أكتر عندنا عشان البحر.

3- مش كل الاسكندرانية بيعرفوا يعوموا

3
” إيه ده .. هو في اسكندراني مبيعرفش يعوم ؟! ” .. اه والله تصدق طلع فيه .. وفيه كتير كمان .. مش لازم عشان أنا اسكندراني أبقى مايكل فيلبس يعني .. شغل البحار مندي ده فككوا منه .. إحنا ورانا مشاغل عادي ومش بنقضي حياتنا في البحر.

4- مش بنحلف بالمرسي أبو العباس

5
مفيش حد في اسكندرية بيحلف بالمرسي أبو العباس .. ممكن الكلام ده كان زمان أوي في القرن التمنتاشر مثلاً وفي منطقة بحري بس .. إنما أبو العباس بالنسبة لنا منطقة من مناطق اسكندرية .. مش معقول هحلف بمنطقة يعني .. يعني مش هقول لحد وحياة سان ستيفانو أو وغلاوة محطة الرمل عندك !
في شوية مفاهيم تانية غلط عن الاسكندرانية .. أغلبها في الكلمات وطريقة النطق وكدة .. بس اللي فوق دول أهم حاجة .. أتمنى تكون الرسالة وصلت .. وحذاري تتعامل مع حد اسكندراني وأنت واخد عنه فكرة غلط .. إوعى !

7