تعبان
بلد التسعين مليون مهندس، بلد التسعين مليون شيخ، بلد التسعين مليون مغني، وأخيرا، بلد التسعين مليون طبيب ….
علي رأي محمود عبد العزيز في فيلم “جري الوحوش” “اسأل العليل ولا تسأل التحاليل”، كل مصري بيقوم بدور “طبيب نفسه” علي أكمل وجه، كل واحد بيفتي في الطب، وف الدوا، وبيخرب الدنيا ومبيروحش للدكتور اللي صرف دم قلبه، وسهر الليالي سبع سنين وبعدهم ماجستير ودكتوراة، بدعوي “الدكتور هيعمل ايه أكتر م اللي انا عملته” والنتيجة: مرض مبيتعالجش..!
فيما يلي أشهر أربع أساطير مصرية طبية، بتوضح لنا قد ايه اننا شعب نعشق الفتي..!

 

  • اديها مضاد حيوي..!

 المضادات الحيوية

“ماما انا عندي برد”
خد مضاد حيوي
“ماما انا معدتي بتوجعني”
خد مضاد حيوي
“ماما انا شلت مادتين”
خد مضاد حيوي…
أول حاجة بيفكر فيها الشخص المصري الأصيل، اول ما يجيله شوية مغص، أو اسهال، أو رشح وبرد وزكام هو شريط المضاد الحيوي المتين، مش مهم ان المضاد الحيوي بيعالج العدوي البكتيرية، مش الفيروسية، أي أم مصرية أصيلة لو ابنها سخن شوية هتظرفه حبايه أو معلقتين مضاد حيوي، كأنه بون بون بالظبط.
طبعا اساءة استخدام المضاد الحيوي تسببت في ظهور أنواع جديدة من الأمراض مبتتعالجش أصلا، زي البيروسول كدة من كتر ما رشيناه ع الناموس بقي يشمه ويقول “كمان”، وكل واحد ربنا كرمه بشوية معلومات يروح يضرب تلات حبات “فلوموكس”، ويقولك لا ده 500، خد مضاد حيوي ألف!! خلاص بقيتو دكاترة وبتدو دوا وبجرعات..!
  • اشرب نعناع

 hqdefault

الرد الرسمي لأي حد بيقول “بطني بتوجعني” هو “اشرب نعناع” ومتفهمش ايه سر ثقتهم في ان النعناع علاج سحري..! هو النعناع مفيد في حالة التقلصات أو الغازات الزيادة، لكن ملوش دعوة بأوجاع القولون، او الكلي، أو المصران الغليظ، او عسر الهضم، أو التسمم الغذائي، الأنكي ان النعناع أو المشروبات الساخنة عامة ممكن تزود العدوي البكتيرية أو الفيروسية بسبب انها بتحب الأوساط الدافية.
يعني باختصار لما حد بيكون عنده مشكلة ف معدته وانتا بتشربه نعناع، ف انتا كدة كأنك اديت الفايروس دوش عشان يقوم منتعش ويكمل شغل علي نضافة 😀
  • ادهن أبو فاس

 download

“أعطني أبو فاس ومرهم فازلين وسأعطيك حاجات بتحرق وبتلزق ع الجلد :D”، أكيد مش هتلر اللي قال الجملة دي، اللي قالها هو مخترع العلاج الخزعبلي “أبو فاس” وهو عبارة عن مرهم أحمر اللون، فيه زيوت طيارة بتحرق، فلما بتدهنها بتعمل عمليه تشتيت للجهاز العصبي عن الألم، فبيتهيألك ان “أبو فاس” ده هو علاج سحري، وترياق ناجع، في حين انه مش أكتر من هجصة كبيرة.
انتا لو عندك مشكلة تمزق مثلا، أبو فاس مش هيحلها، لو عندك انزلاق غضروفي، أبو فاس مش هيحلها، المهم تروح لدكتور يشخص الحالة صح..

 

  • سف مسكن….!

Catafast-Sachets
صديق الانسان … وقت مايكون تعبان
عندك صداع؟ خد مسكن..! صداع ممكن يكون سببه من أول الأنفلونزا لحد “ربنا يعافيكو” سرطان المخ، مع ذلك علاج الصداع الأساسي عند المصريين هو “المسكن”، المشكلة الأساسية عند المصريين انهم معتبرين الصداع ده عرض مش مرض..!
نظام جسمك عامة بيقوم ع الانذارات، الصداع اللي بيجيلك ده له سبب تاني، ممكن يكون ضغط، ممكن يكون جيوب أنفية، ممكن يكون عطش، ممكن يكون جوع، ممكن يكون من ودنك، بالتالي كتر تعاطي المسكن بيسبب الادمان أولا، ودي حاجة خطر جدا، وبيخلي جسمك يتعود عليه ومع الوقت ميعملش أي حاجة. ثانيا بيصرف نظرك عن المشكلة الأساسية، اللي بتنسي تعالجها وللأسف بتكتشفها بعد فوات الأوان..!