مش كل الناس اللي متجوزة بتحب النكد و بتكره بعض وعندهم مشاكل مع بعض، في ناس متجوزة وعايشة في سلام جوا بيتها ومتأقلمة، بس هل الكوكب بيسيب الناس اللي زي دي في حالها، نو واي طبعاً، العوامل الخارجية اللي بتبوظ الجوازات ساعات كتير بتكون اكبر وأكثر تأثيرا من المشاكل اللي جوا البيت دي.. والحاجات لازم يتعلم كل حد متجوز ياخد باله منها لو عايز يكمل من غير ما يطلق.
  • الأهل

hqdefault (1)

لازم تفهم كويس انك لو محطتش حاجز وحدود تمنع أهلكم من إنتهاك خصوصيتكم هيتكون بداية النهاية بالنسبة لك، هتلاقي مامتك بتكلم جوزك تناقشه في طريقة لبسه، وتلاقيك مامتك بتكلم مراتك تناقشها في لون شعرها، ولو الموضوع كان فكاهي وعدى بشكل لطيف في المرة الأولى ومحصلش مشكلة، صدقني بعد كده هيقفلك جوزك\مراتك منك أنك مقدرتش تفهم اهلك انهم ملهمش الحق يكلموا شريك حياتك في حاجات خاصة بيه.. وطبعا ده غير المصيبة الاكبر لما يقرر اهلكم انهم يقفشوا على بعض..كده تبقوا دخلتوا في مرحلة الوحش
  • الصحاب

hqdefault (2)

ودول بيبقوا اخطر وابشع من الاهل لو نيتهم مش صايفة من ناحيتك، لانهم يعرفوا عنك اللي اهلك ميعرفهوش وممكن جدا يكونوا بيدخلوا بيتك اكتر من اهلك، ودايما تلاقي ان الشخص اللي بيحبك وقريب منك معرض انه يغير منك اكتر من حد بيراقبك من بعيد ميعرفش تفاصيلك، مش بارانويا بس لازم تكون حريص من صاحبك على مراتك ولازم تكوني حريصة على جوزك من صاحبتك، بلاش ننكر ان ده ممكن يحصل والتاريخ مليان بالمآسي دي
  • الشغل والفلوس

338253589520247940

ودي دايرة مغلقة حزينة، هتشتغلوا كتير هيبقى معاكوا فلوس كتير وحلوة بس مش هتلاقوا وقت تتهنوا بيها وتقربوا من بعض اكتر، هتشتغلوا قليل، الفلوس هتبقى قليلة ومسئوليات الحياة هتقتل الرومانسية فيكم، وياسلام بقى لو قرر الزوج انه يسافر عشان يكون نفسه ويأمن اسرته وتضيع احلى سنين عمر الاتنسن في غربة وشقة وحاجة ما يعلم بيها الا ربنا، انا مش متأكدة ايه الحل في الحوار ده بس دايما التوازن بيكون الحل الأمثل لكل شيء
  • التكنولوجيا

50060011 (1)

ممكن متصدقش، بس فعلا في حالات انفصال وطلاق بتحصل بسبب الفيسبوك او الواتساب، الموبايلات بقت شخص له كيان مادي في البيت وله تاثير على شكل العلاقة بين الراجل ومراته، وممكن جدا خناقة كبيرة تبدأ بتعليق الزوج على صورة واحدة حلوة والخناقة تطور لاكتر من كده، وتخيل لما تعليق يعمل كده ، امال لو الزوجة قفشت شات مش ولابد بين جوزها وواحدة صاحبته، او هو شاف واحد مشكوك فيه مهتم بمراته على الفيسبوك، بجد يا جماعة المهازل دي لازم توقف تماماً.
الفكرة كلها ان لو انتوا الاتنين بتحبوا بعض بجد، لازم يكون في وعي للعوامل الخارجية اللي بتأثر عليكم بشكل سلبي، لما هتطلقوا وكل حد يقعد يحط ايده على خده مفيش حاجة من الحاجات اللي فوق دي هتنفعكم، دايما بدي شريك حياتك عن اي حد واي حاجة وحسسه انه له الاولولية لأنكم في الاخر اللي فاضلين لبعض.