4 حاجات لو عملتها هيقربوك من حبك الحقيقي‎

كائن السينجل دايماً حزين وحاقد ومخنوق من المجتمع وحاسس انه مظلوم ومخدش حظه من الدنيا.. الفكرة هنا اننا ساعات كتير بنعمل حاجات بتبعد الحب الحقيقي عنا أو بمعنى اصح بتطفش الشخص المناسب..اه طبعا هو نصيب انك تلاقي الشخص المناسب ليك.. بس كل حاجة بتحصلنا في حياتنا لازم بشكل  او باخر بيكون ليها يد فينا.. وفي حاجات معينة ممكن نعملها عشان تقربنا من ظهور الحب الحقيقي ده في حياتنا او بمعنى أصح تمهد له الطريق.

• انت عايز تستقر؟

أول حاجة لازم تتأكد منها الاول قبل ما تقعد تولول انك سنجل وتعيط وتشير صور عن حزن السناجل..  هل فعلاً انت عايز تكون في علاقة مستقرة؟ ولا هو هري وخلاص.. في ناس كتير بيقعدوا يتكلموا في حوار انهم سنجل ده وانهم مضايقين واول ما تظهر ادامهم بشاير لعلاقة جد وممكن تكون فعلا حب حقيقي في حياتهم يطلعوا يجروا لأنهم مش مستعدين للاستقرار اساسا.. اتأكد انت عايز ايه بجد الاول.

• مين دول؟

الناس الكتير اللي في حياتك اللي مش مفهوم علاقتك بيهم ايه.. خرجهم من حياتك تماماً.. ازاي تتوقع ان يظهر في حياتك حب حقيقي  وانت في حياتك بتاع 3 اشخاص لا انت محدد هما صحابك ولا انتوا في علاقة حب مفتوحة ولابتعاكسوا بعض ولا مفهوم انتوا تقربوا لبعض ايه اساسا.. طول ما الناس دي موجودة في حياتك هتفضل من غير وعي منك رافض دخول حب حقيقي في حياتك  عشان متخسرش الامتيازات دي.

• خليك معقول

لازم تكون عارف مواصفات الشخص اللي عايز تكمل معاه حياتك.. اه طبعا الحب ملوش سبب وكل الكلام الجميل الرفهيف ده.. بس عشان نتكلم بصراحة شوية مع بعض مفيش علاقة في الدنيا العقل مش بيتدخل فيها.. ولازم تشغل عقلك وتعرف مواصفات الشخص اللي يناسبك تكمل حياتك معاه.. مش الشخص اللي هتخرج وتتفسح معاه ..وياريت ونبي وانت بتفكر في المواصفات دي تكون شخص  معقول في الصفات اللي عايزها في الشخص اللي هتحبه.. لأن صدقيني – ايوة بكلمك انتي- مفيش راجل متحرر ومتفهم ومثقف وغني ووسيم وكريم ودمه خفيف.. بطلوا خيال علمي بقى.. اختار اولوياتك في الشخص اللي انت عايزه وخليك صريح مع نفسك في الحاجات اللي تقدر تستغنى عنها .. وفي راي انا.. الفلوس هي اول حاجة ممكن تضحي بيها في فارس/فارسة الاحلام.. لأنها فعلا بتروح وتيجي.

• تجاربك السابقة

انا عارفة.. عارفة والله انك مريت بالعديد والعديد من التجارب القاسية والفاشلة.. بس انت قدامك حل من الاتنين .. ياما تخلي التجارب دي زي ما بوظت جزء فات من حياتك.. انها تكمل على الباقي من حياتك.. او انك تتخطى الماضي تماماً وتنساه وتفضل تدور على الاحباب السابقين وتحاول تتفوق عليهم وتحاول تتنقم منهم.. عمرك ما هتعرف تكمل حياتك بشكل طبيعي لو فضلت تفكر كده.. انساهم وسيب الكارما تقوم بدورها معاهم.. هما هيروحوا من ربنا فين.

وياريت بليز لما الشخص ده يظهر ماتطلعش تجري.. ادي لنفسك فرصة.. والخوف مسيطر عليك للدرجة دي مفيش اي مشكلة انك تلجأ لمساعدة نفسية.. خاصة لو كنت مريت بعلاقات سابقة كتير ونفسيتك اتشوهت تماماً.