“برج الجوزاء” هو البرج الأكتر جدلا بين الابراج وده لكم التناقض اللي موجود في صفات مواليده وشخصيتهم، ولأن الازدواجية هي الصفة الأساسية في البرج ده فا عادي جدا لو حبيبك برج الجوزاء إنك انهاردة تحسي انه بيحبك جدا وبعدها بلحظات تحسي إنك ولا فارقة معاه، متزعليش المشكلة مش عندك ابسلوتلي انتي كويسة يا بنتي والعيب مش فيكي إطلاقاً، هما اصحاب البرج ده كدة محتاجين “كتالوج” عشان تعرفي تفهميهم، وعشان كدة قررنا انهاردة نكلمك شوية عن الحاجات الأساسية اللي لازم تاخدي بالك منها لو بتحبي راجل من برج الجوزاء.
  • اوعي تخنقيه

Ci-bqPvXAAEEWXs

 الراجل ده مفهوم غلط يا جماعة والله، بيقولوا عليه مالوش في الحب ولا الرومانسية وقلبه مش بيلين ابداً وده مش صح، راجل برج الجوزاء بيحب الحب لكن بيكره القيود وبيقدس الحرية وعشان كدة بيهرب من الارتباط، مش عايز وجع دماغ ولا قرف كل شوية، وعشان كدة لو ارتبطي براجل من البرج ده لازم تعرفي كويس ازاي تتعاملي معاه، بلاش تحسسيه انه متقيد عشان ميهربش منك، خليكي ذكية واعرفي ازاي تحتويه وتخليه ميقدرش يستغنى عنك، ولو عايزة تبقي الست الوحيدة اللي في حياته لازم تبقي دايما متجددة وتلعبي ادوار مختلفة كل شوية.
  • خليكي قوية

munch_2012_08_10_143417_400x400

راجل برج الجوزاء مش بيحب الست الضعيفة اللي بتعتمد عليه في كل حاجة، لازم يحس انك مستقلة وقوية بتعتمدي على نفسك ومش مستنية منه مساعدة، ولازم تعرفي ان الذكاء عامل مهم جدا في التعامل مع الشخصية دي، وده لأن اي حاجة غير كدة هتخليه يزهق منك بسرعة جدا ويهرب عشان يدور على التشويق والمتعة اللي بيحبها في حتة تانية ومع واحدة غيرك.
 
  • متحاوليش تغلطيه

mqdefault

راجل الجوزاء دايما شايف نفسه صح، مبيغلطش ابدا، ولو حصل تبقي انتي اكيد السبب، وعشان كدة اكبر غلط ممكن ترتكبيه في حق نفسك هو انك تحاولي تغلطيه او تقنعيه بحاجة غير اللي هو شايفها لانك اكيد هتطلعي خسرانة، وعشان كدة حاولي تريحيه وعامليه على انه طفل كبير، اضحكي عليه وقوليله “انت صح طبعا يا حبيبي” ساعتها بس هتكسبيه وهيبقي زي الخاتم في صباعك.
  • متحطيهوش قدام الأمر الواقع

2013_1374145878_583

لأن اراءه وافكاره وقناعاته بتتغير في لحظة، مينفعش تطلبي منه قرار فوري او تجبريه انه يحسملك حاجة في وقتها او حتى تحطيه قدام الأمر الواقع وتفاجئيه بحاجة، حاولي دايماً تديله وقته في التفكير ومتسلبيهوش حقه في انه يقرر، حتى لو بعد لحظة هيفاجئك بإنه غير رأيه وقرر قرار تاني خالص، مش بس مختلف، لأ ده ممكن يكون عكسه تماماً، لازم تتقبلي ازدواجيته دي لو فعلا بتحبيه وتعرفي تلاقي طريقة تانية غير الإجبار تتعاملي بيها معاه.