كبداية لازم نشيل من ذهننا فكرة أن الشخص الكسول هو شخص سيء أو لا يعتمد عليه.. خالص.. آبسلوتلي.. دي مش حقيقة بالمرة.. وستيف جوبز او بيل جيتز – مش فاكرة ومكسلة اسيرش- بس هو حد منهم يعني قال قبل كده أنه بيختار في المهمة الصعبة في الشغل حد كسلان لأنه بمعجزة ما هيلاقي أسهل طريقة لتنفيذ الشغل ده عشان خاطر كسلان يعملها بالطريقة الصعبة..
-
الكنسله في اللحظة الأخيرة
الشخص الكسلان بيحب صحابه وكل حاجة ومش بيكره الخروج.. لكن مش بيحب الخروج قد أوضته وتلفزيونه وجهاز الكمبيوتر بتاعه وسجايره وعالمه الخاص اللي بيقدر يعيشه وهو لابس أقل لبس ممكن ومأنتخ على ضهره.. فلما صحابه بيطلبوا يقابلوه وبيحددوا – المتهوريين- ميعاد قبلها بكذا يوم.. بيوافق ومش بيكون بيخدعهم.. لكن لما بيكلموه ساعتها بيقولهم انه مش هينزل وعلى حسب درجة خبرته في الكسل بيقول العذر.. لو هو كسلان مبتدأ بيختلق أعذار.. عمتي بتتجوز..خالتي بتولد.. اما الكسلان المحترف بيقولها وش :” لا يا عم مش طالبه معايا أقوم البس وأنزل”
-
فلترة الصُحاب
بعد مرات متعددة من الكنسلة وعدم حضور الشخص الكسلان في مواقف معينة لأنه كسلان. ده هيخلي بعض صحابه يبعدوا عنه.. في البداية هيفتكر أن ده شيء حزين ويضايق.. بس بعد كده هيكتشف أن كده أحسن بكتير.. لأن الصحاب اللي هيفضلوا معاه هيبقوا فاهمينه ومتقبلينه باسلوبه ده من غير ما ينتقدوه وبكده هيعيش حياته سعيد جداً ومش هيضطر يقول أعذار مش حقيقة وهيكنسل بالسبب الحقيقي وهي أنه “كسلان” وبعد كده هيحصل الحدث الأعظم أنك هتتجمع بالصديق الكسلان اللي زيك اللي بتقضوا معظم الوقت في البيت تاكلوا وتأنتخوا وتتفرجوا على حاجات.
-
كسل = سلام
هل أنت ممكن تتخيل أن شخص كسلان مهما كانت وظيفته هيكون بيفكر في الحرب أو أنه يتخانق أو أنه يخون .. الأفعال دي كلها محتاجة مجهود ذهني وبدني كبير جداً وحرقة أعصاب ومؤمرات الخ. انما الشخص الكسلان معندوش الطاقة لده. ولو انتي مرتبطة بشخص كسلان هتلاحظي انه بيتجنب فكرة أنكم تتخانقوا من الأساس.. وهتبقى مطمنة عشان هو اصلا مش هيخرج من البيت يروح في حته عشان يخونك ده بينزل يقابلك بالعافية.
-
ممنوع الهري