من ساعة ما أغنية أه لو لعبت يا زهر انتشرت والناس كلها قاعدة بتعدي دلوقتي ان الزهر يلعب، وهما مش واخدين بالهم أن الزهر لما بيلعب مش بيكون في مصلحة البني ادم بنسبة 100 %، يعني لو لعب معاك في جزئية مش بعيد ابداً انه يلعب عليك في أجزاء تانية أنت مش متوقعها، سميها بقى ضريبة النجاح، سميها سنة الحياة، بس في حاجات كده عادة بتحصل للانسان اول ما الزهر بيلعب معاه
  • صحابك

s22011188546

لو الموضوع وصل معاك لمرحلة متفوقة من اللعب، والزهر كبر بقى كده وعمال يدحرج ويجري حواليك، أعرف أنه بدون ما تقصد في مرة واحد من الزهر ده هيقع فوق حد من صحابك يفطسه، يا ما هتكتشف ان صاحبك ده نفسية ومش عاجبة الوضع، ويبدأ يسال اسئلة من نوعية هو اشمعنى الزهر يلعب معاه هو وملعبش معايا انا، وزي ما ثمرت معاه تثمر معايا، ياما هيكون صاحبك بيحبك وفرحانة لك وكل حاجة بس عاطفي زيادة عن اللزوم ومش هيقدر يستحمل فكرة أنك مشغول في المحافظة على لعب الزهر، مهو لو الزهر لعب اكيد حياتك هيكون في مشاغل كتير.
  • أهلك

0

أهلك بقى بيختلفوا عن صحابك، وده مش معناه ان مش هيكون فيهم حد نفسية، ده اكيد هيطلع منهم حد نفسية وهيكون نفسية اوفر كمان، بس الفرق بين الاهل والاصدقاء، ان مقاطعة الاهل مش بنفس سهولة البعد عن الاصدقاء، وأول ما الزهر يلعب معاك اي كان الرقم اللي بيدخلك شهريا اعرف انهم في مخهم ضربوه في عشره، ومتوقعين منك أنك تتبناهم مادياً ونفسيا ومعنوياً، وياسلام لو الزهر لعب معاك في حاجة ليها علاقة بالمشاهير، جو برشطة بقى وهات لنا صورة من النجم واجواء رخيصة هتخليك تشك في اليوم اللي دعيت فيه ان الزهر يلعب اساساً
  • لو كنت مرتبط

unnamed

مش كل العلاقات طبعاً، بس النسبة الأكبر من العلاقات بتتهز لما حد من الطرفين الزهر يلعب معاه، خاصة لو كان الطرف المؤنث هو اللي الزهر لعب معاه، بيبتدي الراجل يحث انه بيضمحل وبيختفى قدام الاحداث المثيرة اللي بتحصل لحبيبته وهو حياته لسه هي هي مش بتتغير، غصب عنه بيبقى عايز يحس انه اهم من الزهر ده، بس للاسف ساعات الاحساس ده بيترجم في حاجات سيئة خاصة لو كانوا متجوزين فيأفور في طلبات البيت ولو معملتش اللي مطلوب منها كزوجة بسبب انشغالها بالزهر اللي عمال يلعب يبتدي يبقى سخيف بقى ويلقح كلام، ولو الراجل هو اللي الزهر لعب معاه، مراته هتاخد الزهر وهتنزل تعمل بيه شوبنج اساساً
  • نفسيتك

CDIDI36W4AAeQmT

لازم تراقبها كويس، أكتر من أهلك وصحابك وشريكك، لأنها أول حد هيتغير عليك وعلى اللي حواليك، مهما كنت حد كويس ومهما كنت طيب وحنين ولطيف، غصب عنك حتة جواك هتبتدي تتفرعن وتتنطط على خلق الله، اقعد افتكر دايما لما كنت عمال تحفر كده عشان تستخرج الزهر اساسا، وميغركش الزهر اللي عمال يلعب ده ممكن يقلب عليك في لحظة، حاول تحافظ هلى شخصيتك زي ما هي بقدر الإمكان.
  ونيحة أخيرة، تقبل التغييرات اللي هتحصل للناس اللي حواليك ببرود واعتبرها فلترة مجانية للبشر اللي في حياتك، وكده كده مش هيفضل جمبك الا اللي بيحبك وفرحان لك بجد، لأن برضه اللي طمعان فيك مش هياخد وقت طويل على ما يظهر على حقيقته.