مفيش حاجة كويسة ممكن تتقال وأنت بتفركش مع حد. الموضوع صعب جداً في كل الظروف. وكل اللي تقدر تعمله هو انك تطلع من الموقف بأقل الخساير عشان لما الوقت يعدي والقدر يخليك تقابل الانسان ده في مكان ما بالصدفة.. تبتسموا في وش بعض بدل ما تبصلوا لبعض من تحت لتحت والاجواء الرخيصة دي.. وعشان كده هنقولكم بعض الحاجات اللي ممكن تساعدكم أنكم تفركشوا بشياكة:
-
كل واحد عارف اللي له واللي عليه
من غير هري كتير.. رجع الهدايا الغالية. طبعا الطرف التاني هيعمل مجروح وحزين من الحركة وهيقولك مكنش العشم وهكذا. بس اديله اسبوع وهتلاقيه بيرقص من الفرحة. خاصة لو كانت الهدايا دي من منتجات آبل أو دهب يمكن يتباع ويطلع بفلوسه الساحل. رجعوا الهدايا الغالية وانا اضمن لكم أنكم لما هتقابلوا الإكس في مكان ما بعد الفركشة هياخدكم بالحضن.
-
مفيش داعي
طبعا احنا كلنا عارفين انك طالما بتفركش فأنت اكيد مضايق ومخنوق وكل حاجة. بس مفيش اي داعي وملهاش اي لازمة انك تقل أدبك في اللحظات الاخيرة. حاجة وحشة جدا الصراحة ومش هتفيدك بحاجة الا ان البنت أو الولد اللي بتفك معاه كل ما هيجيب سيرتك هيقول في حقك كلام زبالة ولو اتقابلتوا في مكان هيكون شكلك وحش لانك هتكون هديت وحسيت ان الكلام اللي قولته اوفر ومكنش لازم يتقال. فسيطر على اعصابك وانهي الموضوع بأدب
-
إت إز نوت يو.. إتس مي
انا عارفة ان كلمة “المشكلة فيا انا مش فيك” وانت بتفك مع حد اكلشيه.. بس صدقني ده اكلشيه حتمي ولازم يتقال.. اصل يا أما فعلا انت مع انسان كويس وبيعاملك حلو لكن أنت من هواة تعذيب الذات ومفتقد لشخص يطلع عينك في حياتك وهتسيب ده عشان تروح تدور على عذابك في حته تانية وساعتها هيكون فعلا انت السبب في فشل العلاقة. ياما انت مع شخص زبالة وهو السبب في فشل العلاقة. ومفيش حد هيحب تسمعه أنه السبب في فشل الموضوع وانت مش هتستفاد حاجة لما تقول كده. لأنه مش هيعترف بالحقيقة وهتبقى انت الشرير وخلاص وهتجيب لنفسك وجع الدماغ.. فهاتها فيك من الاول وريح مخك.
-
طير أنت