عزيزتي حواء، اسمحيلي أخاطبك كأننا ف مجلة “الكواكب” سنة 1995 وبنكتب باب بريد القراء، النهاردة احنا ف زمن مبيرحمش، بما اني Strong Independent Woman وكتبتلكو المقال الي فات عن “ازاي تستقل بنفسك وانتا ف بيت أهلك” جيت النهاردة أقدملك انتي بالذات، روشتة ظريفة، تخليكي تعتمدي علي نفسك ف حاجات كتير، متحتاجيش فيها أي راجل، وترفعي عنك حرج كلمة “معرفش” وضحكة سخرية هتسمعيها بعد الكلمة دي.

 

فيه ست حاجات أساسية لازم تتعلميها ف زمننا ده، عشان تبقي علي الأقل شايلة نفسك ومكفياها، يلا نشوفهم مع بعض؟ يلا!

 

1- تسطيب الويندوز

1

بما إننا في عصرDigital ومحدش بيعيش من غيرلابتوب، انتي لازم يا استاذة تتعلمي تسطبي ويندوز، لأسباب كتير، منها ان فيه ناس بتعمل الموضوع ده بجميلة، وانتي ف غني عن جميل لشخص “لزج” كل موهبته انه بيدوس “Next” الموضوع سهل جدا، كل ما في الأمر انك تجيبي فيديو من يوتيوب بتسطيب الويندوز، وتشغليه وتمشي وراه واحدة واحدة و Voila الويندوز اتسطب، بعد كدة هتلاقي نفسك مش محتاجة أي مساعدة ف الكومبيوتر، ونصيحتي الأولي ليكي ف أي مشكلة تقنية: جوجل موجود..!

 

2- الطبخ

CcKujKaWAAAg6Do

مش عشان حاجة بنصحك انك تتعلمي الطبخ، الطبخ مش شئ مقرف أو وحش، الشئ الوحش انك تقولي لحد “مبعرفش أطبخ” فيبصلك بصة كدة مش اللي هي، زي بصة “أم طه” ل”رحاب” بالظبط الطبخ عامة هيفيدك لو عشتي لوحدك – يارب- أو حصل ظرف طارئ – مامتك مسافرة- ، أو علي أبسط الأحوال – آخر الشهر- ، هيحسسك بإنك بتدلعي نفسك، بتطبخي لنفسك، بتجيبي وصفة من  CBC سفرة وبتعمليها، كأنها فسحة أو لوحة بترسميها، بس ف معدتك..!

 

3- ادارة بيت

hqdefault

فنون كتير جوة بيوتنا محدش بيتعلمها، كام واحدة بتعرف تغير لمبة؟ بتركب انبوبة؟ بتعرف توصل فيشة مفصولة؟ تركب جلدة حنفية مفكوكة؟ بتعرفي تركبي زورار مقطوع؟ حاجات بسيطة جدا انتي لو بتعرفي تعمليها بنفسك هتوفري فلوس كتير؛الناس اللي عايشة برة بالذات هتقدر كلامي لما تجيب سباك بيتحاسب بالساعة، وكهربائي بياخد أجرة أكتر من مرتبك. اتعلمي ف بيت أهلك، عشان لو اتجوزتي ترحمي نفسك من الزن علي ودانه، وعشان لو عشتي لوحدك تقدري تعملي حاجات كتير، انتي مش أقل من أي حد ودي حاجات بسيطة جدا.

 

4- السواقة
2

بيوت كتير عندها عربية بس مركونة والست بتاخد تاكسي او تركب مواصلات، ليه؟ لأنها مبتعرفش تسوق..! تصوري لو محتاجة العربية ف مشوار مهم، حالة طارئة، أكيد جوزك مش متوفر 24/7 وانتي ممكن تتعلمي سواقة ف أي مدرسة قريبة منك، وتطلعي رخصة، وربنا يستر طريقك يا أختي

 

5- الاسعافات الأولية

33

من المهارات اللي لازم كلنا نتعلمها ولاد وبنات هي الاسعافات الأولية،عشان مش مفروض كل ما تتعوري ولا تتخدشي تقعدي تعيطي وتروحي لمستشفي ؛ اتعلمي دايما لمصلحتك الشخصية ان يكون عندك صيدلية صغيرة في البيت، فيها العلاجات السريعة، شاش وقطن ومطهر، مسكن، مضاد التهابات، بس متعيشيش الدور اوي وتعملي فيها دكتورة، دي اسعافات مش مستشفي الهلال الأحمر