كتابة: صفاء أحمد.

الست القوية هى الست اللى بيكون عندها وعي وقدرة على اشباع حاجاتها ومسئوليتها بنفسها مش بتعتمد على حد فى أنه يلبي احتياجاتها، بالرغم تحفظ الراجل على فكرة الارتباط بست قوية بحكم طبيعته اللى بتخليه عايز يكون الطرف الأقوي فى العلاقة الا أن فكرة استقلالية الست اوقات كثيرة بتشد الراجل خصوصًا لو كان واثق من نفسه ،خلينا نقول إيه الأسرار اللى وراء انجذاب الرجل للست القوية.

1 – السسبنس يافندم

الست القوية بالمفهوم الصحيح هى ست مستقلة عندها حياة خاصة بيها مليانة شغل واهتمامات وحب للأفكار ولأصحابها وللسفر وللكتب وحاجات ثانية كثيرة بحسب كل ست ، الجزء دا من حياتها مهم ومش بتقدر تستغنى عنه سواء كان فى راجل فى حياتها او لا، ودا بيخلق نوع من التحدى جواه الراجل أنه قدام الأهتمامات دى عنده تحدى بأنه هيقدر يسعدها ويكون هو كمان جزء مهم من حياتها، فى الحقيقة هو السسبنس مهمة اوى فى العلاقات !

2 – بيحس معاها بالأمان

فكرة الاستقلالية اللى بتتمتع بها الست القوية بتخفف الضغط من علي الراجل من أنه يكون المسئول الأول عن سعادته أو إنه يحل مشاكلها طول الوقت، ولو عايز يعمل دا هيعمله وهو حاسس أنه حر مش لأنه مضطر. كمان بيحس بنوع من الأمان أنه مع ست قادرة تتعامل ويعتمد عليها وقت لما يكون الراجل واقع فى مشكلة معينة ، ودا حاجة مهمة عند الراجل إحاسسه بالحرية والأمان مع شريكة حياته.

3 – التمثيل ووجع الدماغ

“A real girl isn’t perfect and a perfect girl isn’t real.”

الثقة بالنفس سر من الأسرار المهمة فى الانجذاب بين الراجل والست، الست القوية الحتة دى عندها مستقرة ومش محتاجة تثبت حاجة لحد ولا عندها هدف فى ابهار الراجل اصلاً غير إنها تكون نفسها وبس، التركيبة الحقيقة دى بتخلق جاذبية لا تقاوم عند الست لأنها من وجهة نظر الراجل هى شخصية مش مصطنعة تخليه يحس بحاجز فى التعامل معاها بالعكس هيشوفها طبيعة وجذابة اكثر .. أصل الحكاية مش ناقصة تمثيل ووجع دماغ!

 

 

4 – الخبرة هتوفر عليه كثير

فكرة الحرق الكثير فى العلاقات متعبة أوى لكن التجارب اللى مرت بها الست القوية خلت عندها خبرة وسينس فى التعامل ودا هيريح الراجل كثير يعنى مش هيكون مشاكل من نوعية (مكلمتنيش ليه- ودى مين وبتكلمك ليه- الشغل أهم منى- مبتحبنيش زى الأول.. إلخ )، ودا لأن حياتها اصلًا مليانة حاجات زى الراجل هيخليها تكون مقدرة فكرة أنه مشغول والأولويات ولكل حاجة وقتها ومش هيكون عندها وقت كثير للتركيز على المشاكل اللى بيخلقها الفراغ.

 

 

5 – هيعرف ينبسط

الست القوية بتقدر قيمة الانبساط والروقان لأنه مصدر قوتها وشحن طاقتها، الراجل لما بيشوف الست اللى معاه مبسوطة فى حياتها اصلاً دا بيطمنه أنه مش داخل على ممر ظلمة ومشاكل تخنقه، فى الغالب هتكون عندها تجارب للسفر والحفلات يعنى فكرة الانبساط مش جديدة عليها ولاهتشوف الراجل المصباح السحري اللى هيحقق حلمها فى السعادة ودى من الحاجات اللى بتجذب الراجل أنه يكون مع ست بتعرف تنبسط بحياتها وتبسطه هو كمان، بس ياترى الست دى موجودة فى الوجود ؟!

 

 

الست القوية هى فى النهاية ست لها مشاعرها وضعفها البشري ولكن الاختلاف كله بيتلخص فى قاعدة مهمة عندها وهى:-

If you want to be respected, place a high value of yourself

حبها لنفسها واحساسها بقيمتها دا السر وراء انجذاب الرجل لها .