اغلب المشاكل اللى بتحصل فى العلاقات مش بتبقى بسبب ان فيه طرف فعلا غلطان لكن بسبب ان كل واحد بيبقى ليه شخصية وطباع مختلفة وممكن يتصرف تصرف تلقائى وعادى جدا بالنسباله لكن بالنسبة للطرف التانى حاجة تزعل . واحنا “كرجالة” بنعانى فى مواقف كتير بتبقى فعلا مش مقصودة بس البنات بتاخدها بحساسية زيادة علشان كده لازم تعرفى شوية حاجات عن طبيعة الولاد وتحاولى تاخدينا على قد عقلنا فيها علشان تتجنبى اكبر قدر من القفش.
الولاد شايلين تاريخ :
اغلب الولاد شاطرين جدا فى الجغرافيا واللف والاماكن بس فعلا ساقطين تاريخ ,وذاكرة الولاد فى الارقام والتواريخ مش تمام “ماعدا فى ماتشات الكورة” وغالبا لو سألت اى ولد عن تواريخ اعياد ميلاد اخواته مش هيعرفها فمتاخديش الموضوع بشكل شخصى علشان هو مش قاصد ينفضلك فى عيد ميلادك ولا فى ذكرى اول يوم اتقابلتوا فيه ولا فى اى يوم تانى انتى عاوزاه
و استكمالا لموضوع الذاكرة والتركيز فالولاد برضه مبيركزوش فى ان الطقم ده جديد ولا ان اللون الليلا ده اول مره تلبسيه”ايه الليلا ده؟” ,التركيز عندنا بيبقى فى حاجات فيزيائية شوية فى اللبس “ضيق ,واسع ,قصير ,مفتوح”لكن مش لازم يعلق عليه زى ما هو مبيعلقش على لبس واحد صاحبه “الا لو بيحفلوا عليه” ومعتقدش انك هتحبى الحالة دى .
وبالمناسبة عادى انك تكررى الطقم اللى شافك بيه “ولا هيقول دى معندهاش غيره ولا هياخد باله غالبا ” لان هو نفسه بيقابلك بنفس البنطلون الجينز كل مره صيف وشتا بس بيغير التيشرت 😀
وانتى عارفه اللى فيها بقى :
طبعا حقك انك تسمعى دلع وكلام حلو طول اليوم, بس المشكلة انه هو بيحس انه كفاية كده وانتى بتحسى انه لأ مش كفاية ,هو مش قصده كفاية انه يحبك لأ ,الموضوع ليه سببين اولا ان الولد احيانا بيحس انه هيبدتى يكرر فى الكلام “اللى هو اقولها بحبك طيب ما لسه قايلها كده طيب اقول ايه جديد؟!!” و بيعتبر ضمنيا انك عارفه انه بيحبك وخلاص فمش لازم كل شوية يفضل يعيد ويزيد .
السبب التانى ان الولد متعته فى الاحساس ان كلامه ده ثبت البنت اللى قدامه و انبهرت بيه او يلاقى اى ريأكشن بيدل على ده, فلو عاوزاه يفضل يقولك كلام حلو كتير وصليله احساس انك جامد وانا ضعفت بعد الكلمتين دول .
ملحوظة لو انتى من البنات اللى لما يتقالهم كلمة حلوة بتقوله ربنا يخليك والله يباركلك والجو ده فأحب ابشرك انك مش هتسمعى كلمة حلوة طول ما انتى عايشة
لوك لوك …لوك لوك :
من الفروقات الكبيره ما بينك وما بين الولد انك بتحبى تحكى وتفضفضى و ترغى فى مشاكلك على عكس الولد اللى غالبا ده مش طبعة يعنى مش هيفضل يحكيلك عمل ايه فالشغل و كلم مين وقفش على مين ودخل الحمام كام مرة وقبض ولا لسه . فهو بيتكلم اقل لان دى طبيعته مش لان هو مش عاوز يتكلم معاكى “ممكن تشوفى قعدته عالقهوة مع اصحابه وهم ساكتين تماما لفترات طويلة وهتفهمى” ولو حكالك مشكلة او موقف حاولى متديلوش نصايح فى وشه كده تحسسه انه مش عارف يتصرف وانتى اللى مسيطرة وخلصتى الحوار لانه ساعتها هيرجع يتكلم اقل معاكى .
شوية مراحل
اى علاقة بيبقى فيه مراحل بتبتدى للنظرات والاستهبال و بحبك ومسك الايد وانت طالع بقي “او نازل على حسب” , حاولى تخليه هو اللى يروح للمرحلة اللى بعدها متسبقيش “يعنى هو اللى يمسك ايدك اول مرة مثلا” علشان زى ما قولنا متعة الولد انه يحس انه بيبهر البنت اللى قدامه وانه اجرأ ,انتى بس وصليله احساس انه اشطه موافقه وهو “هينط” عالمرحلة اللى بعدها علطول . بس حاولوا متنطوش بسرعة علشان متوصلوش لمرحلة الفركشة بسرعة.
