انا عارفة طبعاً إن مفيش مرة بتقعدي فيها مع “انتيمتك” إلا وبتجيبوا في سيرة الشعب المصري كله، ومبيتسيبوش حد في حاله، وده لأن القاعدة متحلاش من غير نم البنات بتاعنا والرغي في الحوارات اللي مبتخلصش، التافه منها قبل المهم، كل ده انا معنديش أي معاه مشكلة، لكن تخيلي بقى إنك ممكن تضري نفسك من ورا رغيك ده، اللي كله بيكون من باب الفضفضة والتسلية!!
وعشان كدة، وقبل ما تقعدي ترغي في الفاضي والمليان، هقولك على كام حاجة كدة لازم تبعدي تماماً عن الكلام فيهم مع “انتيمتك” وتتجنبي المشاكل اللي ممكن تحصلك بعد كدة، وده لأن انتيمتك دي في أول مشكلة بينك وبينها هتبقة أقوى عدو ليكي، لإنها الوحيدة اللي تعرف كل أسرارك ومشاكلك ونقط ضعفك وتفاصيل حياتك كلها.

1- تفاصيل علاقتك بحبيبك

1

زي ما بيقولوا كدة “داري على شمعتك”، وعشان كدة أول حاجة لازم تاخدي بالك منها كويس قوي هي علاقتك بحبيبك، متحكيش مشاكلكوا لأي واحدة من صاحباتك ولا تاخدي رأي حد في حاجة وده عشان متديش فرصة لحد يستغل نقاط الضعف اللي في علاقتكوا لصالحه، وافتكري كويس قوي إن الضربة مبتجيش غير من القريب.

2- مشاكلك مع اهلك

Couple arguing, girl (12-13 years) covering eyes with hands, waist up

تاني حاجة بقى هي مشاكلك العائلية وتفاصيلها، يعني أسرار بيتك متخرجش برة البيت، وعشان كدة لازم تكون خاصة جداً ومتتحكيش لأي مخلوق مهما إن كان، حتى لو كانت صاحبتك الأنتيم، وده لإنها لو خرجت من البيت ممكن تكبر، غير إنها كمان ممكن تشوه شكل أهلك قدام اصحابك.

3- أسرارك الخاصة

3

جينا بقى عند أهم نقطة وهي أسرارك الخاصة، ولأن مفيش واحدة فينا مبتغلطش، سواء كانت الغلطات دي بقصد أو عن غير قصد، وسواء برضه ندمتي عليها أو لأ، فا دي حاجة تخصك انتي وبس، مينفعش تحكيها لأي واحدة من صاحباتك حتى لو كانت اقربهم، وده لأسباب كتير قوي منها إنها ممكن في يوم من الأيام تعايرك بأخطائك دي أو تطلع أسرارك أول ما تتخانق معاكي، خلي بالك.

4- مشاكل صاحباتك البنات

4

الحوارات بين البنات وبعضها مفيش أكتر منها، دي قالت كذا على فلانة ودي قالت كذا على علانة، وقايمة طويلة عريضة من الحكايات اللي مبتخلصش، وعشان تتجنبي الدخول في أي مشاكل بينك وبين صاحباتك حاولي على قد ما تقدري تخرجي نفسك من أي حوارات، ومتحكيش أي حاجة تتقالك حتى لو كانت لاقرب صديقة ليكي، لانها هي كمان اكيد عندها صديقة تانية قريبة هتحكيلها وهتلف الدايرة..

5- حالتك المادية

5

أخر حاجة في القايمة دي بقى هي حالتك المادية، اعتقد مفيش حد في الدنيا من حقه يعرف انتي عايشة ازاي ولا رصيدك كام في البنك وهل معاكي فلوس أكتر ولا اقل منه، حتى لو كانت صاحبتك الأنتيم.

 

بعد كل ده الولاد لو ليهم اي ميزة في علاقاتهم باصحابهم …هتلاقي انهم معندهمش اي مشكلة من اللي فوق دي