لو كنت بتحب أو مرتبط، لازم تبقى عارف إن فيه شوية حاجات كدة مينفعش تقولهم لحبيبتك (ولأي بنت اصلا مش بس حبيبك) .. حتى لو على سبيل الهزار، ولو غلط وقولت حاجة فيهم لازم تعتذر فوراً ومتكررهاش تاني، ده لمصلحتك صدقني!

1-انتي تخنتي

أول حاجة واهم حاجة هي جملة “انتي تخنتي” واللي دايماً بتكون مصحوبة بجملة تانية وهي “لازم تخسي”، ودي واحدة من أكتر الجمل اللي ممكن تضايق أي بنت، خصوصاً من حبيبها، لإنك المفروض بتحبها وبتشوفها حلوة في كل حالاتها، حتى لو تخنت شوية يعني.

2-انتي غبية

مش حاجة لطيفة خالص انك حتى في وسط هزارك مع حبيبتك تقوم راميلها “انتي غبية يا بت انتي؟!” وكإنك بتهزر يعني، لإنك هتيجي في مرة من المرات وتقولهالها وانتوا بتتناقشوا في موضوع بجد، وساعتها انت مش هيبقى قصدك حاجة وحشة وهتبقى بتقولها بحكم العادة، لكن هي هتاخدها على قلبها قوي وهتبدأ بقى ترد عليك بجمل تانية من نفس العينة، طب وليه من الأول؟!

3-انا مش بحب ستايل لبسك

بعيداً عن انها قلة ذوق يعني، إعجابك بستايل حبيبتك دي حاجة من أكتر الحاجات اللي ممكن تزود ثقتها بنفسها، فما بالك بقى لما تقولها ان ستايلها مش عاجبك وانك عايزها تغيره مثلاً؟! دي مش بعيد تنهار يا اخي، ده غير انك اصلاً زي ما ليك ستايلك وذوقك الخاص اللي بتختار بيهم لبسك بكل حرية، من حقها هي كمان تختار اللبس اللي يعجبها وتكون مرتاحة فيه.

4-انا وحبيبتي القديمة بقينا مجرد صحاب

“احنا بقينا مجرد صحاب ومفيش حاجة بينا” دي جملة عُمر حبيبتك ما هتقتنع بيها أو هتدخل دماغها مهما كانت درجة صدقك انت ووجهة نظرك في الحكاية، وده لإن حبيبتك القديمة دي تعتبر عدوتها، اوعى تستهون بالموضوع او تفكر تكلمها فيه وتبقى متصور انها ممكن تسمعك، دي مش بعيد تحدفك بحاجة في وشك!

5-انا مش بحب صحابك او اهلك

نيجي بقى لنقطة تانية مهمة جداً وهي رأيك في صحابها وافراد اسرتها، واللي دايماً لازم يكون ايجابي، وده لإن تقديرك لاهلها وصحابها القريبين منها من تقديرك ليها، وحتى لو عنك اي تعليقات سلبية على تصرفاتهم مثلاً، لازم تختار الوقت المناسب والطريقة الصح اللي تتكلم بيها معاها في الموضوع من غير ما تضايقها أو تحسسها انك رافض وجودهم اصلا.