مين فينا متفرجتش علي فيلم “كينج كونج” او علي الاقل سمعت حكايته واتاثرت بيها واتمنت لو انها كانت مكان البطلة عشان بس تتحب بالشكل ده حتي لو من “غوريلا”، وده طبعا ليه معاني كتير قوي جوانا اولها اننا كبنات مفتفدين لمعاني كتير في الحب منها مثلا الرومانسية والاخلاص ويمكن الحب نفسه اساسا، وعشان كدة قررنا انهاردة نتكلم معاكوا عن الدروس اللي ممكن نكون استفدناها من الفيلم العالمي “كينج كونج”

1-الحب مش بالشكل

صورة 1
ناس كتير ممكن تتأثر بالشكال فتفتكر انها بتحب وعشان كدة بنسمع كتير المثل اللي بيقول “العين تعشق قبل القلب احيانا” وده عادة بيكون حب موقت جدا لانك ببساطة لما تتعود علي شكل حبيبك وعينك تاخد علي ملامحه بيروح الانبهار ومبيفضلش غير الشخصية، فا لو مكنتش بتحبها هتنزل كلمة النهاية وتنتهي القصة،  وده اللي اتغير تماما في الفيلم ده، لان انا مثلا زيي زي اي بنت اتفرجت علي الفيلم لقيتني بتمني اكون مكان البطلة واتحب الحب ده حتي لو اللي هيحبني “غوريلا”.

2-الاخلاص بيكمل اي علاقة

صورة 2علي الرغم من انه “حيوان” مش بيتمتع بالقوة العقلية اللي عندنا كبشر، الا ان “كينج كونج” لما كان بيدور علي حبيبته في اخر الفيلم كان كل شوية يلاقي واحدة شبهها لكنه مكانش بينبهر يعني وفضل يدور علي حبيبته في شوارع المدينة كلها لحد ما قدر يلاقيها، وهي دي غريزة الاخلاص اللي مش موجودة للاسف عند كتير من الناس وده اللي بيحكم علي علاقات كتير بإنها تبقي “طياري” يومين واقلب.
 

3-الحب بيزيدك قوة

صورة 3كلنا شوفنا “كينج كونج” اللي طول الفيلم بيحارب عشان البطلة اللي حبها بكل قوته، وعلي الرغم من القوة الفظيعة اللي كان بيتمتع بيها، الا انه في اخر الفيلم كان متربط بسلاسل مستحيل كان يقدر يتخلص منها عشان يكون جزء من العرض النهائي، واللي مقدرش يخلصه منها غير رغبته الشديدة في انه يلاقي حبيبته ويقدر يوصلها، وده معناه ان الحب يقدر يخلينا نعمل حاجات مستحيل كنا نفتكر اننا نقدر نعملها في حياتنا العادية،فـ زي ما بيقولوا “الحب يصنع المعجزات”.

4-الحيوانات برضه بتعرف تحب

صورة 4
الحيوانات مش بس بتعرف تحب، دي يمكن بتحب اكتر مننا كمان، لانها لما بتحب بتبقي بتحب حب خالص مالوش اي اهداف، لا بتبقي عايزة مننا حاجة ولا مستنية مقابل لحبها ده، وزي ما الكلاب بتعلمنا الوفاء، كينج كونج برده بيعلمنا ازاي اصلا ممكن نحب.

5-التضحية دليل مهم على الحب

صورة 5وزي ما قولنا ان الحيوانات بتحب من غير ما تكون عايزة حاجة، فـ “كينج كونج” ببساطة جدا علمنا ازاي ممكن الواحد يضحي بنفسه عشان خاطر اللي بيحبه، وده اتجسد في اكتر من مشهد خلال الفيلم، لما كان بيحارب الديناصورات وغيرها من المخلوقات التانية بكل ما يملك من قوة بس عشان يحمي حبيبته اللي هي بطلة الفيلم من اي اذي ويحسسها بالامان.