من أكبر المشاكل اللي بنعاني منها في مصر هي التصنيف والتعميم .. يعني بناخد فكرة غلط عن حاجة معينة ونبدأ نعممها .. الموضوع ده ظاهر بشكل واضح لما بنتكلم عن فئات الشعب المصري.
يعني مثلاً المصريين بيعتبروا أن كل الدمايطة بخلاء وكل المنايفة .. ولا بلاش المنايفة عشان منروحش في داهية !
وزي ما كتبت عن المفاهيم الخاطئة اللي جزء كبير من الشعب المصري بيعتقدها عن الاسكندرانية .. بما أني اسكندراني المولد والمنشأ .. هتكلم النهاردة عن المفاهيم الغلط عن النوبيين في مصر .. بما أني نوبي الأصل والهوية
ما تيجوا نشوف
1- أنا مش زنجي أنا قوقازي وصحتي على قدي
الشاب النوبي في أي شلة بيتعامل معاملة الزنجي .. يعني صحابه بيعتبروه زنجي في المواصفات الجسدية .. يعني لو بيلعبو كورة مثلاً مينفعش صاحبهم النوبي يتعب .. هو في زنجي بيتعب !
فصيلة الزنوج ربنا خالقهم بمواصفات جسدية قوية عشان يتحملوا الطبيعة اللي هيعيشوا فيها .. إنما إحنا مصريين زيكم بناكل فول وبنشرب مياة مجاري وبنحلي بفاكهة مرشوشة وبيجيلنا فيرس سي ومخدناش من الزنوج غير اللون بس للأسف.
2- مش لازم أعرف أتكلم نوبي
تشتغل أغنية نوبية لمحمد منير وإحنا قاعدين في أمان الله .. تلاقي اللي بيقولك ترجملي يا معلم مش أنت نوبي وفاهم .. أيوة أنا نوبي، بس اللي متعرفوش أن معظم النوبيين مبيعرفوش يتكلموا نوبي وده لأسباب كتير .. وفي مبادرات محترمة دلوقتي بيقوم بيها بعض الناس لإحياء اللغة النوبية من تاني.
3- مش كل النوبيين بيحبوا منير
معظم النوبيين تقريباً بيحبوا منير .. بس مش كلهم .. ومش لازم عشان أنا نوبي يبقى by default كدة هحب منير .. أنا منير بالنسبة لي فنان زيه زي أي حد .. لو عمل حاجة كويسة قشطة ولو عمل حاجة وحشة مش هسمعها .. مش هاجي على نفسي عشان هو نوبي زيي.
4- مش لازم نتجوز من بعض
النوبيين مش ديناصورات هينقرضوا لو ما تجوزوش من بعض .. الكلام ده كان بسبب عادات وتقاليد زمان وعشان المجتمع النوبي كان من أكتر المجتمعات المنغلقة على نفسها .. فقشطة ممكن النوبي يتجوز من السلوم عادي
5- مش كل النوبيين زملكاوية
هو في نوبيين زملكاوية كتير أوي .. وأنا تقريباً من كل عشرة نوبيين بقابلهم بلاقي 9 منهم زملكاوية .. بس ده مش معناه أن النوبي زملكاوي بطبعه .. لا في نوبيين أهلاوية كتير مع احترامي لشيكابالا .. فمش عايز اسمع سؤال أنت ازاي نوبي ومش زملكاوي
دي كانت أكتر المفاهيم الغلط عن النوبيين في مصر واللي أنا جمعتها من مواقف اتعرضت ليها شخصياً .. قولوا لنا هل أنتوا واخدين نفس الفكرة دي ولا لا .. ولو أنت نوبي أو نوبية هل تتفق ولا لا.
