بقلم محمد خالد
حياتنا كلها مواقف واحداث بتبين الكويس والوحش , اغلب المواقف ديه بنعديها علشان نقدر نكمل ونتعايش مع الاخرين , لكن فى مواقف مينفعش تعدى بسهولة فى حاجات لازم نقف عندها لحظة ونقول لا و ألف لا , لانها بتستهلكنا وبدمرنا نفسيا, حاجات تعتبر حمل زايد لازم نرميه على الارض ,لان الحياة أقصر من اننا نفضل فى مكان بنكرهه فترة كبيرة أو اننا نهاتى مع الناس فى بديهيات أو اننا نفضل مع الناس الغلط. لذلك أستعد انك تقول لا .
اولا- مديرك.
حب ما تعمل علشان تعمل ما تحب , اشاعة غير صحيحة بالمرة , الصح أنك لازم تحب مديرك علشان تحب ما تعمل فعلا , لازم يكون بينكم كيمياء ,علشان تقدر تأدى وتنجز المطلوب منك وتزود عليه بمزاج رايق , لكن لو مديرك رخم وعامل ضغط عصبى عليك وبيطلب طلبات عجيبة زى انك تكون أحسن واحد بيشتغل لكن أشتغل زيادة علشان خاطر الفريق, لازم تقوله
-لا هذا يكفى- و ” زعق فيها ” .
ثانيا – الشغل.
بعد فترة ما أى شغل بيتحول لنوع من الروتين , لكن مش معنى كدة أنك تسيبه علشان حضرتك زهقت ومليت , ممكن تأخد أجازة وترجع تانى عادى , السبب اللى يخليك تقول للشغل “لا “أنه يكون بيستهلكك كليا , بيستنزف طاقتك , بحيث أنك متكونش قادر تعمل حاجة تانية معاه أو تضيف حاجة جديدة ليه , الشغل لما بيتحول لحياة كاملة و روتين بيكون مهلك حتى لو كنت بتحبه فى الاصل , لذلك قول لا للشغل للاسباب ديه و اوعى تقول لا من غير ما يكون عندك خطة بديلة ليه -الحاجة غليت وولعت –
ثالثا – العلاقات
عارف والله ان العلاقات البشرية جميلة ولطيفة ومنقدرش نعيش من غير بشر ومن غير الجنس الاخر و الكلام الحلو ده وأن العلاقات زى الشجر بتحتاج للاهتمام والمجهود علشان تكبر و نعيش فى ضلها , لكن فى علاقات مرهقة علاقات سخيفة بتستنزفك وتخليك تدبل وتصفر مهما عملت , العلاقات اللى من النوع ده لازم تنهيها وتقول لها “لا” وتبعد عنها علشان تقدر تعيش حياتك مستريح من غير تأنيب ضمير .
رابعا – الفضوليين
الناس اللى بتنط فى حياتك وعايزة تعرف كل تفاصيلها بالتفاصيل اللى انت نفسك متعرفهاش , فطرت ولا لا ؟ , بتحبها ولالا ؟ طيب هتتجوز أمتى ؟, خلصت تعليم ولا لسه , والدتك عاملة أكل ايه النهاردة ؟ , وطبعا أنت بتبقى واقع فى حيرة بين أنك ترد بالاجابة العادية , أو ترد باجابة قليلة الزوق زى ” وانت مالك أصلا ” “ملكش دعوة ” ” خليك فى حالك ” مع ابتسامة قرف بسيطة كدة , وطبعا هتتحرج ترد بالاجابات ديه , لكن معلش تعال على نفسك ورد رد سخيف يحرج و يخرج الشخص الفضول ده من حياتك نهائيا , طبعا لازم تفرق بين الفضوليين وصحابك الاساسين والاصليين واسالتهم .
5 – الطفوليين
وفى قول أخر الكائن البارشوط , وهى كائنات حية تعيش على الاخرين تلتهم كل شئ لديهم , مش بيلتهموا اكلك وفلوسك بس لكن ممكن يلتهموا طاقتك و يلتهموك أنت شخصيا لو جاعوا , وتعرفهم عن طريق تكررهم للجمل ديه “ممكن تدفعلى علشان مش معايا فكة , ممكن تخلص الشغل مكانى النهاردة علشان عندى مشوار مهم , والكائنات ديه مش بتحب تكلف نفسها قرش أو تستهلك طاقة , بتوفرها لحاجات أهم , ايه هى محدش يعرف .
فكر واتعلم انك تقول لا فى المواقف اللى تستدعى ده فعلا , متسمحش لحد انه يستغلك أو يركب فوق كتفك علشان يوصل , زى ما انت بتتعب وتشتغل هو كمان لازم يتعب ويشتغل وساعد لو تقدر , لكن أوعى تيجي على نفسك .
