ربنا بيدي لكل واحد حظ ونصيب من اسمه ما بالك بقى لو ادى لحد نصيب الاسعاد والونس ، يعنى حب الست دى ربانى كده ولله فـ لله
مش بس عشان هى ممثله شاطره وكاتبه ومنتجه لكن كمان عشان هى تاريخ طويل مع اجيال كتير وتعتبر مؤرخه لفترات كتير عاصرت فيها نجوم وكتاب ومخرجين وممثلين احنا كل دورنا اننا بنتفرج بس عليهم من خلال افلامهم وشغلهم
اسعاد يونس هى جسر بين الناس الحلوة والناس اللى ما شافتش من حلاوه الزمن ده غير شويه حواديت وحكايات بنسمعها منها ومعاها ومعاهم .
ربنا لما بحب حد اوى بيبسط الناس بيه بيخلى مجرد ذكر اسمه بهجه وونس وذكريات وشوق وحب وضحك وسعاده بيخلى صوته مبهج واسمه بهجه للجميع هى صاحبه السعاده الاسعاد والونس اسعاد يونس

نوستالجيا الناس اللى وحشتنا 

maxresdefault-10

اسعاد يونس مش بس بتفكرنا بناس وممثلين وكتاب ومنتجين واغانى والعاب من الماضى البعيد القريب الجميل اللى نسيناه بالتكنولوجيا السريعه الرخمه اللى بوظت حياتنا وتفهتها هى كمان بتفكرنا بالناس الحلوة دى في حوار كله ذكريات خالى من التريقه او السخريه او التقليل من امكانيات وموهبه الناس دى ولان رصيدها شاهد على مراحل كتير وتطورات اكتر فالسينما والاذاعه والتليفزيون والكتابه فهى في كل مره بتستضيف فيها الناس اللى وحشتنا بتحس انك قاعد جنبهم عالكنبه بتسمع حواديتهم وحكاويهم كانك جزء منها عايشها بخفه دمها ودموعها وبهجتها  .

الروح الكبيره بس لسه صغيره

maxresdefault-9

في كل مره بتتفرج عليها وهى بترقص او بتغنى عالمسرح بتديك امل فالحياه بان الضحكه الحلوة بتطول العمر ، وان فالحركه كل البركه وان الرقص والغنا احلى حاجه ممكن تسعدك وتصغر روحك وعمرك وتعيشك مبسوط

العيله واللمه والحب  

mn557d726ae61d241_1434284648

النجاح دايما صعب والوصول لمكانه الحفاظ على ميعاد برنامج عشان نتفرج عليه مع اهلنا وصحابنا وكمان نحكى عنه في قعداتنا هو ده سر الانبساط بيها وبكل اللى بتقدمه ومحدش ابدا بيستغرب لما حد ييجى يقول شوفت صاحبه السعاده جابت مين الاسبوع ده ، وبيبقي فيه ندم وتأنيب ضمير انك فوت حكاوى حلوة عشان ماتفرجتش على الحلقه ، ناس كتير مكانتش بتحب اسماء معينه في مختلف المجالات وحبتهم بس لما اتكلموا من قلوبهم مع الست العظيمه دى او لما شافوا جانب احلى من اللى دايما بيشوفوه وكانها واخده عهد على نفسها تتبسط وتبسطنا من غير مجامله ولا نفاق ولا انها تقول ولا تقدم حد هى شخصيا مبتحبوش .

التشجيع

371

فكره انها تقدم ناس مش مشهوره بالقدر الكافي وانها تدعبس فمين اللي بيعمل اكلات حلوة مين اللى الناس بتتكلم عنه عشان تديله فرصه ان الناس كلها تعرفه دى فكره ومبدأ يحترم لان غالبا محدش بيعمل كده فالزمن ده ولما بيحصل بيبقى مبهر لانه بكل التأكيد بيطلع من شخصيه بتحب الخير للناس ، غير انك فكل حلقه خلاص بقيت عارف فريق العمل اللى بيقدملك كل الحلويات دى لانها دايما بتشاركنا اساميهم ومابتنكرش ابدا دور اى حد بيشتغل معاها مهما كان صغير .

صندوق الدنيا ابو مزيكا

kdkdmmc

فاكرين علبه المزيكا اللى لما كنا بنفتحها بنلاقي عروسه حلوه بترقص باليه على مزيكا مريحه نسرح معاها ونفتكر وننبسط ، اهى الست اسعاد يونس عامله كده بالظبط ، بتفتح صناديق حكاويها القديمه والجديده وحتى اللي لسه ماتعرفوش بتفتح صندوقه قدامنا وتعرفه وتعرفنا عليه ، صندوق حكاوى التراث واغانيه ومزيكته وافلامه ولبسه وطقوسه بريحته كمان
الناس البسيطه ، والناس الجميله ، الناس النجوم والناس اللي نسيتها النجوم ، الناس العايشه بس ميته والناس الميته بس لسه عايشه جوانا هما دول ابطالها الحقيقيين .

كل حاجه وعكسها

unnamed-524

نفسك بتهفك على كل الاكلات اللى بتقدمها ، بتدور بعد كل حلقه على الناس دى ازاى توصلها وتساعدهم وتبسطهم لثقتك ان اسعاد مش هتقولك على حاجه وحشه ، حتى الرجيم والرياضه ، كتير منا ابتدى يدور على المنتجات المصريه ، هي وش الخير والسعد والهنا على كل واحد عدى من جنبها مش بس اتكلمت معاه او عنه ، حتى في طريقه لبسها مره بتلبس عبايه ومره فستان ومره بنطلون الوانها حلوه ومبهجه محدش مابيبصش عليها الا لما يقول الله عالشياكه والروح والحلاوه اللى جوه قبل اللى بره للناس ، الكبيره مقام والصغيره فالروح ، فرحه الاطفال ووقار العظماء ، دلع الستات وخشونه الزمن وريحه الذكريات والجسر اللي ربطنا باهلنا وذكرياتنا وبلدنا بحلوه ومره ، صاحبه السعاده الحلوة بزياده اللي صعبت الفرجه على اى حاجه غيرها اسعاد الونس اسعاد يونس .
كل واحد فينا عنده سبب سعاده مختلف انتوا كمان احكولنا ليه بتحبوا صاحبه السعاده عشان هما اكيد مش 6 اسباب بس .