البنات عادة لما بتفك إرتباط مهما كانت النهاية شيك ومحترمة بيكون داخلها رغبة دائمة في الإنتقام حتى بدون وعي منها، والإنتقام ده عادة بيفرق من بنت لبنت لكن دايما كده بيكون في حاجات عادة مشتركة بين البنات بيعملوها بشكل لا إرادي للإنتقام من الـEx… زي الست حاجات دول عمرك عملتي حاجة منهم.. بصراحة؟
1- رياضة ودايت ..دايت ورياضة
أكيد في علاقة كونية فيزيائية ما بين فك الإرتباط والخسسان، البنت أول ما تفك مع صاحبها بيكون داخلها رغبة قوية أنها تخس، كنوع من أنواع الإنتقام، أو معنى أصح كأنها بتوصله رسالة أنا ممكن أخس عادي بس أنت اللي كنت منكد عليا ومخليني أطلع همي في أكل
2- غيرت شعري كومبليتلي
طبعاً النيو لوك من أهم أنواع الإنتقام، البنت بتكون فاكرة انها بتعمل كده عشان تحسن من نفسيتها، لا.. اطلاقا.. ابسلوتلي.. هي بتعمل كده عشان توصل رسالة معينة لحد معين وهي عادة رسالة من نوعية ” ده انت فايتك كتير اوي”
3- نافذة على الجحيم
طبعاً الولد في الحالة دي بيكون فاكر أن البنت خلاص صفيت وأنهم ممكن العلاقة ترجع طبيعية عادي ومفيش حد مجروح وكده
مسكين!
البلوك اللي اتفتح ده حضرتك بوابة من الجحيم أتفتحت في وشك عشان تبين لك هي أد أيه سعيدة في حياتها من غيرك، صور في الساحل، صور في مطاعم، صور مع ولاد كتير بقى وبردو عشان تشوف النيو لوك وأنها خست .. أمال المجهود المبذول الصرف اللي حصل ده يروح ع الفاضي
4- سونة كانت بتغمز لك يا عاطف
في بنات بيوصل معاها الجبروت أنها تبدأ تقرب من صاحبه الأنتيم، والخطة دي عادة بتنجح لما بيكون صاحبه الأنتيم اصلا سيس وبيجي سكه وساعتها تخيل رد فعلك وأنت صاحبك جي يقولك أنه رايح يقابل الإكس بتاعتك عشان الويندوز بتاعها وقع !
5- الله يرحمه كان سالف مني جنيه .. هاته
لازم تفهم أن حياتك العاطفية كلها معرضة للخطر بسبب الـEx بتاعتك.. وطبعا ده لأن البنات عادة بتروح تسأل الـEx قبل ما ترتبط بواحد.. صدقني بيعملوا كده.. ولو هي مسألتش التانية هتتطوع وتبعت لها رسالة بكل التفاصيل..و عادة هتبدأ الرسالة ب “هو كويس وكل حاجة بس …..” وأنت ونصيبك وضميرها بقى .