من وأنا صغيرة وأصحابي الولاد أكتر من أصحابى البنات، أمى دايما كانت تقولى صداقة الراجل ب 100 ست. بس مع الوقت ولما كبرت ابتدت الناس تسألنى وتشك فى نيتي من ناحية أصحابى الولاد! عشان كده كان لازم أوضح ليه بفضل أصحابى الولاد عن البنات..
نو مور نفسنة أور غيرة
طبعا أصحابى الولاد عمرهم ما هينفسنوا عليا ولا يغيروا منى عشان اترقيت ولا جبت تيشرت شبه اللى هو لابسه ولا حتى صاحبت واحد أحسن منه ومش هيأسفني عند مديري عشان ياخد مكانى أو لمجرد الأذى.
بهدوووووووووووووووء
الولاد بطبعهم مش رغايين ولا هرايين، كلامهم على القد ومفيش مجال ان الواحد يصدع أو يسمع رغى فاضى لمجرد انهم يملوا الفراغ وأحيانا كتير الواحد بيحتاج يرتاح من الزن والكلام الكتير اللى مالوش لازمة.
بيست أسامة منير إيفر
صاحبك الولد هو أحسن مستشار عاطفى لكل مشاكلك فى علاقاتك، لأنه هو الجنس الآخر اللى انتِ معندكيش فكرة بيفكر ازاى. عشان كده دايما الأفضل ترجعى لصاحبك الولد وتاخدى رأيه فى أى مشكلة بينك وبين اللى بتحبيه أحسن من لما تجرى على صاحبتك البنت تحكيلها ودماغكوا تسوحكوا سوا.
مفيش جوسيب بوي
الجوسيب أو النميمة هى صفة متأصلة فى البنات لكن صعب أوى أو نادرا لما تلاقيها فى ولد، وبما ان سيرة الناس مش مادة حلوة للكلام للدرجة دى فالواحد بيحتاج صاحب ولد فى الظروف دى عشان مش طبيعي ان كل حياتنا تكون “قعدات نميمة” .. وعشان كده اتعمل مسلسل اسمه ” Gossip girl ” لكن استحالة يعملوا مسلسل باسم “جوسيب بوي”
ملك الكوميديا
بمقارنة بسيطة هتلاقى ان الولاد تكسب بسهولة مقارنة الكوميديا، لأن تقريبا قصاد كل 5 ولاد دمهم خفيف ممكن تقابل بنت دمها خفيف بجد مش صُحابها الولاد بيطبلولها عشان عايزين يصاحبوها
الكرييتف
خلينا نعترف وبروح رياضية وبمنتهى التصالح مع النفس ان الولاد فعلا كرييتف أكتر مننا كبنات، أو على الأقل لو احنا تيم فيه مثلا 3 ولاد و3 بنات الاحتمال الأكبر ان ولدين يبقوا كرييتف قصادهم بنت واحدة كرييتف وبالنسبالى ده جزء منه راجع لموضوع الكوميديا اللى برضه الغلبة فيه للولاد والجزء التانى هو سبب لتفوقهم فى الكريتيفتي والكوميديا؛ ألا وهو القدرة على الأباحة أو بمعني أدق انه لو جه على باله نكتة جنسية أو فكرة فيها مرجع جنسي أو أبيح بشكل عام يقدر يقولها بمنتهى الأريحية بعكس البنت أولا بحكم انها مش هتعرف تقول ده حتى لو جه فى دماغها عشان محدش يحكم عليها طبعا انها متربتش أو مش كيوت وبتتكسف وثانيا لأن فى حالات تانية برضه النكتة أو الفكرة اللى بيبقى ليها مرجع جنسي أو أبيح مبتجيش فى دماغ البنت أصلا ولو اتقالت قدامها ممكن أوى متفهمهاش، ولنا فى إفيهات برنامج البرنامج عبرة.
يا هاجرني طالت مواعيدك
طبعا مواعيد البنات حدث ولا حرج مفيش بجنيه تقدير حتى، مواعيدهم مفيش أسوأ من كده، تقولها نتقابل 8 تلاقيها بتتحرك من بيتها 10 ! وكل ده بسبب انها محتارة تلبس ايه وتقعد تعيط نص ساعة انها مش لاقيه حاجة تلبسها بعدين تسيكب وتقولك مش نازلة وتكلم صاحبتها اللى تقعد تهدى فيها ساعة عشان تستهدى بالله وتقوم تلبس وتنزل وفين وفين لما تقرر تجهز وقال يعني جاية على نفسها عشان زن صاحبتها بس وبعدين ناخد ساعة تانية بقى فى اللبس والميك أب وممكن توصل لأصحابها تانى يوم! لكن الولد، لو كلمتيه قلتيله ننزل هيقولك ربع ساعة وأبقى هناك حتى لو ساكن بعيد عن المكان اللى هتتقابلوا فيه برضه هتروحى تلاقيه وصل قبلك!
الموضوع مش حرب على البنات لصالح الولاد لكن هى حقايق لو أنكرناها نبقى بنحوّر على نفسنا بصراحة، وعشان احنا حقانيين فخلينا نقول ان اللى أسوأ من كل صفات البنات المكروهة دى هو الصاحب الراجل اللي قالب علي صاحبتك مش صاحبك ؛ ده بقى اللى ست فى هيئة راجل “مش حرفيا لأ” بس بيمتلك كل ما هو سئ فى أتيتود البنات ودماغهم وعيوبهم زى كل اللى قلناه فوق ده مثلا.. ده النوع الوحيد من الرجالة اللى لو قابلتيه اوعى تصاحبيه أو حتى تتعاملى معاه.
