“القهوة عشق”، جملة مش هتسمعها غير من حد القهوة بالنسبالة هي مصدر الحياة اللي ميقدرش يعيش من غيره، ولأني واحدة من عشاق القهوة اقدر اقولكوا أن الناس دي يا جماعة محتاجة معاملة مختلفة، يعني مثلاً الهدايا التقليدية اللي بتيجي لأي بنت دي زي الورد والشيكولاتة والدباديب والحاجات دي متفرحنيش قد علبة كبيرة من نوع البن اللي بحبه، أو صندوق مليان بأنواع مختلفة من القهوة، وغيرها من التفاصيل الكتيرة اللي لسة هقولكوا عليها.
١– متكلموش قبل فنجان القهوة بتاع الصبح
مدمن القهوة ده مستحيل يقدر يبدأ يومه أو يتعامل مع الناس عادي كدة قبل ما يشرب فنجان القهوة بتاعه بتاع الصبح، هو ده اللي بيخليه يقدر يعيش ويتعايش مع العالم الخارجي.
٢– نص المرتب طاير على القهوة
أنواع وأصناف ونكهات القهوة المختلفة، تعتبر بالنسباله واحدة من الأولويات الأساسية اللي عادة بيطير عليها نص المرتب، هتلاقيه يدخل اي سوبر ماركت عينيه تقع على الستاند الخاص بالقهوة يجري فوراً عليه، أو يعدي مثلاً من جنب أي محل بيبيع قهوة وبمجرد ما يشم ريحيتها يلاقي رجليه ماشية لوحدها على المحل، ده غير طبعاً الكماليات بقى زي الفناجين والسبرتاية وغيره.
3- صداع .. صداع .. صداع
مدمن القهوة هتلاقيه كتير جدا عنده صداع، وده لو اتأخر شوية عن اخذ جرعة القهوة اليومية بتاعته، وعشان كدة حاول تتجنبه في المرحلة دي وياريت لو تلحقه بفنجان قهوة دبل بن تقيل كدة يبقى كتر خيرك.
4- بينام ويصحى في أوقات غريبة
مدمن القهوة دايماً نومه ملخبط، بينام في أوقات غريبة ويصحى في أوقات غريبة، وعادة مش بياخد كفاينته من النوم وبيصحى مقريف يجري يشرب فنجان القهوة عشان يعدله مزاجه.
5- إنسى معاه الهدايا التقليدية
أحلى هدية لعشاق القهوة زي ما قولنا هي “البن”، وعشان كدة لو فكرت تشتريله حاجة مميزة أو تحسسه إنك دايماً فاكره هاتله أنواع مختلفة من البن أو حتى مشروبات القهوة سريعة التحضير بنكهات المختلفة، ده طبعاً لأن القهوة بالنسبة مش بتقتصر على شكلها التقليدي بالعكس تماماً، مدمن القهوة ده دايماً بيحب يجرب أصناف وأشكال مختلفة من “حبيبة قلبه” القهوة.
6-ريحة القهوة بالنسبالة أحلى من البرفان
وطبعاً حاجة زي دي مش اي حد يفهمها، حقيقي يا جماعة ريحة القهوة بالنسبة لعشاقها “SEXY” و”مغرية” أكتر من البرفان، دي كفيلة لوحدها تحسسه ببهجة وسعادة غير طبيعية.
7- دلق القهوة بالنسباله مش خير خالص
وأخيراً، خد بالك كويس قوي قبل ما تفكر تقرب من فنجان القهوة بتاعه، ده بينتظره بلهفة وإشتياق ولا كإنه ابنه، وخصوصاً لو استناه كتير على ما يتعمل، وعشان كدة اعتبر ده تحذير وخط احمر في حياة عشاق القهوة.
وبعد كل ده أحب اقولكوا إن عشاق القهوة دول ممكن يبيعوا أي حد وأي حاجة عادي جدا عشان يشربوا فنجان القهوة بتاعهم، اعذروهم يا جماعة معلش اصلكوا مش متخيلين يعني إيه “قهوة” بالنسبالهم.
