في كل فيلم كوميدي، فيه بطل، وفيه صاحب البطل،ابن خالته، ابن اخته، أي حد قريب منه، الحد ده دوره كله في السيناريو انه يسند البطل، يرميله افيهات عشان يبان مضحك وظريف، وملوش حل، ومفيش منه اتنين…
بما ان دايما عيني بتجيب الأبعد من البطل، وبتبص علي اللي وراه، ف جيت النهاردة ومعايا أبطال مساعدين، زي ما بيسموهم برة Supporting actor اللي لولاه مكانش هيكون فيه بطل، ولا أي حاجة، دعامة بتقوي السيناريو وبتخليه واقعي، بما اننا بنحب الكوميديا كلنا، هنتكلم عن ال Supporting Actors الكوميديين..!
-
أبو راوية “سيد العاطفي”
بلال فضل لما جه يكتب فيلم “سيد العاطفي” بصراحة وزع الأدوار بالتساوي ما بين عبلة كامل، طلعت زكريا، وتامر حسني، لكن في الافيهات بصراحة، طلعت زكريا أخد نصيب الأسد.
شخصية أبو راوية في الفيلم شخصية فعالة، بتطلع منها كمية افيهات ملهاش حل، أعتقد ان الافيهات كانت اجتهاد شخصي لطلعت زكريا، وكلها حاجات لا تنسي، بداية من مشهد أغنية “أكدب عليك” لما طلع بالصاجات، ثم “سمير كمونة، محتاجينه في الأكل يا خالتي” و “زيس از زا لاست سن اوف مانكراع” 😀 وازاي بيضحك علي السياح بخفة دم..
انتهاءا بماستر سينه في الفيلم:
“هو انتا قبل ما تعرف راوية كان اسمك ايه يابو راوية؟
أبو عزة”
-
عاطف “الناظر”
من أول مشهد ظهر فيه “عاطف” في الفيلم وهو معلق معانا، مشهد صامت من غير ولا كلمة لكن لسه حافظينه صم “يا حيوان يا متخلف”، ومرورا ب “انت طول عمرك ممل يا صلاح”، عاطف في السيناريو، أحمد عبد الله خلاه مهمش تماما، محدش واخد باله منه تماما، ولا هو واخد باله من حاجة أصلا، ممكن تلخصه ب عبارة اللمبي قالها ف نفس الفيلم “مش فاكرك ياض”، ولا وفاء فاكراه، ولا اللمبي فاكره، ولا أستاذ سيد ضاحي فاكره، ولا أبوه نفسه واخد باله منه
طبعا مش هننسي الجملة الماستر بتاعته في الفيلم:
“عاطف
ها
مش عارفه ليه كل اما بقرب منك بحس ان قلبي بيدق
حبيبتي اجيب لك كوبايه شاي بلمون ؟
ميرسي كتير انا لسه ضاربه كشري..!
-
أم طه “وش اجرام”
العظيمة لبلبة هي أروش واحدة عملت دور الأم في السينما المصرية، سواء في عريس من جهة أمنية، أو ف وش اجرام، أو ف فيلم “فرحان ملازم آدم”، لبلبة في الفيلم ده كانت افيهاتها بتعلي علي افيهات هنيدي ف حاجات كتير..وكلت منه الجو ف مشاهد أكتر..
أم طه أم مصرية عادية، بتلبس بونيه علي شعرها، فساتينها من قديم الأزل، بتمسك بوك ف ايدها، وبنشوفها ف البيت مع طه شعرها منكوش 😀 ست عظيمة..!
مش هننسي افيهاتها طبعا، من أول:
“اسمك ايه؟
اسمي نانسي..
ابتدينا نكدب..
جاية ف ايه؟
ف الميكروباص..
ابتدينا نستظرف”
والسؤال الأعظم: “أمك ولا رحاب يا طه؟”
انتهاءا بمشاهدها ف خطوبة طه لما ضربت عيلة رحاب، وغنو أغنية “رحاب دي بت زرقا مرمية ف كل حتة” 😀
-
جابر الشرقاوي “فول الصين العظيم”
مش محتاجين نتكلم علي افيهات الراجل العظيم “سامي سرحان” اللي متفهمش وهو صغير كان بيعمل شرير ليه، مع انه كوميديان عظيم، من أول “الدكتور قالي أقف ف حتة طراوة” ف التجربة الدنماركية، ودوره كمطرب ف “عبود ع الحدود”، لكن تبقي أجمل أعماله هو “جابر الشرقاوي” جد “محمد هنيدي” ف “فول الصين العظيم”.
من أول مشهد ظهر فيه جابر الشرقاوي، وهو بيضحكنا، أكتر من محمد هنيدي:
“بقي انا جابر الشرقاوي عم اشقية مصر
يطلعي حفيد خيخة زيك..
عمال أحطلك ف أفلام رعب ف كل حتة
لجل ما قلبك يقوي..
لكن تقول ايه: جبلة..!”
لحد المشهد الي بيموتني م الضحك فعلا :
“ابني حبيبي هيقتلوه يا جابر يا شرقاوي..
ان شاء الله
وجملته اللي بقت شعارنا كلنا: “الصين حلوة”
-
اللمبي “الناظر”
من كتر اعجابي بفيلم “الناظر” بصراحة مقدرتش أقاوم اني أحط اللمبي ف ليستة الشخصيات ف المقالة، اللمبي هو أجدع سنيد ف تاريخ السينما المصرية، جدع، وروش، ودمه خفيف، وحاجة كدة مفيش منها اتنين..!
اللمبي من كتر تسامحه مع كل الناس، وبرغم ان “صلاح” ابن الناظر مكانش بيحب يقعد جنبه خالص، إلا انه ساعده كذا مرة، مرة لما ودا صلاح للمزة الروسية، ومرة لما كان بيعلم صلاح الشقاوة ع السطح، ومرة لما وداه ل”ميخا” عشان يتعلم كاراتيه، والمرة الأخيرة لما لقي بنات جايين لعاطف وصلاح ف الشقة، ف سابهم زي أي راجل جنتلمان عشان يفضيلهم الجو 😀
طبعا افيهات اللمبي كلها ف الفيلم، عظيمة وعلي سبيل المثال وليس الحصر:
“ونسمع سلام لشهادة الوفاة” ، “عارف الراس الكبيرة؟ ده راسه أكبر منه” ، “انت كداب يابو صلاح” ، “هو ده الواد يابو صلاح؟ خلص وحصلني 😀 ” ، “بلا لمبي بلا زفت” 😀
اللمبي بلا منازع هو أجدع صاحب ف السينما المصرية !
-
الريس حنفي “ابن حميدو”
علي ذكر الأفلام القديمة، ملقتش سفير للمرحلة دي، أكتر من “عبد الفتاح القصري” ممكن يعبر بشكل آو بآخر عن عبقرية فكرة السنيد، الريس حنفي في الفيلم هو “شيخ الصيادين” اللي بيستضيف حسن وابن حميدو في بيته، وبيديهم “نورماندي تو” واللي كانت بارودي علي الباخرة نورماندي الي كانت من إحدي معارك الحرب العالمية التانية، القصد: الريس حنفي أجدع صياد في السينما..
“بناتي، مالهن، حد اعتدي عليهن؟”، الشئ الغير مفهوم، ازاي الريس حنفي ومراته يخلفو هند رستم وزينات صدقي مع بعض 😀 ايه التطور الجيني اللي يخلي هند رستم أخت لزينات صدقي؟ محدش عارف 😀
وأكيد مش هنقعد نعد افيهات الريس حنفي في الفيلم، لكن أهمهم وأبرزهم هو:
“ماله الباز أفندي؟ دنا راجل، ذات نفسي أستمناه..
ده عليه كرافتة ترد الروح 😀“
-
سراج “لا تراجع ولا استسلام”
