1- إنت عندك كام سنة

Point 1

الأب والأم – وخصوصاً الأم – عندهم فوبيا سن الجواز .. بالنسبة للبنت من 20 لـ 25 ده توقيت موسم التزاوج ، من بعد الـ 25 كده البنت دخلت مرحلة الخطر ، أما بالنسبة للشاب الموسم بيبدأ من الـ 25 ويبقى نهاره مش فايت لو قرب ع الـ 30 ولسه قاعد جنب أمه!

2- عايزين نطمن عليك

Point 2

جملة “نطمن عليك” دي جملة مريبة وغامضة وشائكة – ومهينة نوعاً ما – يعني إيه نطمن عليك؟ هو أنا كـ شاب لو عندي مشكلة كده ولا كده مش هاعرف ولا هالاحظ نفسي يعني! لازم أتجوز عشان أعرف أنا كويس ولا لامؤاخذة؟! عيب عليكي يا حاجة إبنك زي الفل والله!

3- إحنا لازم نفرح وننبسط

Point 3

من أول يوم ولاده والأم بتحلم باللحظة إللي هاتكون فيها “أم العريس” أو “أم العروسة” ، ماتفهمش هي ليه ساعتها بتحس إنها الملكة إليزابيث وبتبقي في حالة فخر وفشخرة معنوية كده طول وقت الفرح من أوله لآخره!

4- عايزين حتة عيل

Point 4

لو مش عارف الخطة هاتمشي إزاي أو كل مرحلة هتاخد وقت قد إيه ومطلوب منك فيها إيه ماتقلقش ، الست الحاجة أكيد مظبطة كل حاجة. الأم دايماً عاملة خطة لكل حاجة في حياة إبنها ، كل التفاصيل وبالتوقيتات المحددة من أول مرحلة الخطوبة ثم الجواز ثم المولود الأول ثم المولود الثاني “ليه كده : عشان عيالك يطلعوا في رجليك”.

5- نظرية قص الريش

Point 5

دايماً هاتلاقي أمك بتزعقلك وبتنتقدك على مصاريفك .. أهمها وأشهرها إشتراك الجيم وعلبة الباودر وسفرية الساحل والموبايل إللي كله شوية تغيره ولازم هاتسمع جملة “إنت كل شوية تروح تشتريلك طقم ، ما الدولاب مليان هدوم يامفتري” .. كل ده بالنسبة للأم ثروات مهدرة وشكليات مالهاش أي تلاتين لازمة ، عشان كده هي لازم تجوز إبنها عشان يصرف فلوسه في حاجة مفيدة ومايبقاش في أي مجال للتبذير الشخصي والكلام الفارغ ده.

6- غور وإرحمنا بقى

Point 6

ودي أكتر علامة واضحة عشان تعرف إن أمك عايزة تجوزك وإنك دخلت في مرحلة “يلا بقى” .. فجأة كده يا صاحبي هاتسمع جمل بتتكرر كتير زي “أنا قرفت من غسيلك ، كل دي مكوه ، أنا تعبت من وقفة المطبخ عشان أعملك الأكل ده ، أنا مش  قادره قوم إنت حضر الأكل لنفسك ، نضف أوضتك أنا إيدي وجعاني مش هاعمل حاجة” .. دي المؤشرات إللي تعرفك إنها خلاص بتمهدلك وبتجهزك نفسياً لفكرة إنك لازم هاتسيب البيت قريب وفي واحدة تانية هاتشوف طلباتك ، أو بمعنى آخر “واحدة تشيل قرفك”.

7- دي سنة الحياة

Point 7

الأم في أغلب الاوقات مابتعترفش بحاجة إسمها الـ career goals  والـ life goals بتاعة إبنها مهما كان ناجح أو عنده طموح .. طالما في شغلانة بتجيب فلوس يبقى مات الكلام بالنسبالها .. زي ما البنت مالهاش غير بيتها وجوزها ، الولد برضه أخرته لمراته وعياله .. دي سنة الحياة يابني .. إسمها كده “سنة” بس هي فرض إجباري!
م الآخر .. مهما كانت شخصية الشاب قوية وإصراره على تحقيق أهدافه قوي .. إبقى قابلني .. زن الأم المصرية لا يقاوم .. هاتلبس هاتلبس .. بمزاجك أو غصب عنك .. إن شاء الله وألف ألف مبروك!