exes
الحب والعلاقات دى حاجه حلوة جدا والبنى ادم مابيحسش ان موده حلو الا وهو في علاقه حلوة ومريحه وطبعا ده نادرا الحدوث عشان احنا بنعز النكد والمشاكل والخناقات بنفس المقدار اللى بنفرح بيه . وكاننا شعب بيستخسر يعيش في هدوء وسلام رومانسي وعاطفي ومع فرضيه ان فيه طرف مقرر يتبسط في العلاقه فلازم الطرف التانى يتلكك ويتخانق على اتفه حاجه كنوع من اثبات الوجود . كل الكلام ده مش مهم المهم بعد قصه الحب دى او العلاقه دى انت بتتحول لاكس ل وبدل ما بتقول فلان ده حبيبي او صاحبي او خطيبى فجأه بياخد لقب الex  بتاعى .. والاكسات انواع هنحاول نقولك عليها لانك اكيد واحد منهم :

 

1- الإكس النكد

اكس النكد

وده كائن بيعز النكد زى عينيه دايما محبط ومكتئب وبيصدر طاقه سلبيه عن الحب والعلاقات لو بنت هتعيط طول الوقت ولو ولد هيصدرلك اد ايه الحياه وحشه وهو مالوش مكان فيها وايما كلامه كله انا مش مبسوط انا مبقتش اعرف اتبسط والنوع ده تشائمى كئيب بيسمع لكل مطرب الاغانى النكد بتاعته بس ولو فاهم فالمزيكا هتلاقيه بيسمع اغانى اجنبي عن الموت والخلود والزهق والعيشه الهباب .

 

2- الاكس الكاتب

الاكس الكاتب

وده اخطر انواع الاكسات لانه بيحول القصه اللى عاشها لروايه او مقال ولو ضميره وحش قوى بقى بيكتب اسامى وده مايتقالش عليه غير الله يكون في عون اللى اكسه كاتب عموما ده شخص رايق بيصفى حساباته بهدوء ورواقه حتى لو بعد سنين بس بالكتابه حتى لو بكتابه بوست على الفيسبوك .

 

3- الاكس الفاشونيستا

الاكس الفاشونيستا

والنوع ده بيحول كل فشله لانتصارات في عالم الموضه واللبس والازياء بيحول الانتكاسه العاطفيه لانسان شيك بيتصور كتير وبيشترى لبس كتير عشان موده يبقى احلى ويثبت انه احلى لما ساب الطرف التانى ويندمه انه سابه بالشياكه .

 

4- الاكس الرغاى

الاكس الرغاى

والنوع ده للاسف مابيسيبش حد حتى لو السايس او البواب بتاع العماره الا لما يحكى تفاصيل قصه حبه الفاشله وازاى سابوا بعض وجاب هدايا بكام وخرجوا سوا فين ولازم يحكى عن صحابها واخواتها وعيلتها بادق التفاصيل الممله .

 

5- الاكس الفتاى

الاكس الفتاى

الفتى اصلا صفه وحشه في كل البنى ادمين اللى ربنا بلاهم بمرض الفتى والاكس الفتاى خطورته انه ممكن يفضل يقول للناس قصص وهميه من نسج خياله ويصدق كدبته وبالتالى بيشوه صوره الاكس المأسوف عن عمره اللى سابه بقصص ماحصلتش وذكريات مش موجوده اصلا وربنا يستر على ولايانا من النوع الواطى ده

 

6- الاكس الحبوب

الاكس الحبوب

وده نوع مسالم جدا تقبل الامر الواقع ولانه رومانسي بزياده فقرر انه يشكر فالطرف التانى وأد ايه كانوا مبسوطين سوا وبيحترموا بعض وليهم ذكريات ماتتنسيش مع بعض ولازم يختم كلامه بكلمه مالناش نصيب وربنا يوفقه او يوفقها هى او هو يستاهل كل خير وده بنى ادم جميل اوى نادر الوجود .

 

7- الاكس المباحث

المباحث

والنوع ده للاسف متوافر فالبنات اكتر من الولاد ، ويتلخص في جملتين هى دايما متابعاه من بعيد وقريب ومسخره عدد كبير من البشر عشان تعرف هو مع مين وبتاكل ايه وبيقول عليها ايه وعمل لايك لصوره مين وكتب ايه على الفيسبوك واشترى ايه وخارج مع مين وفين وليه واخباره فالشغل ايه واخباره على القهوه مع اصحابه ايه وعمل ايه فالهدايا اللى جابتهاله والنوع ده شاطر جدا لكل مهام موظفين الموساد والمخابرات وعندهم طريقه كده فالسهوكه تخليك تطوع كجاسوس مدسوس لنقل الاخبار والمساهمه في معرفه كل تفاصيل بنى ادم ماتعرفوش .خطورة النوع ده ان سيرتك وقصصك بتبقى عند كل الناس ومحدش على وجه الارض ماتسألش عليك عنده !

 

8- الاكس المتحرش

الاكس المتحرش

وهذا النوع طيب بس منتقم قرر انه ينتقم من اللى سابه في النوع كله بالتحرش اللفظى او احيانا الجسدى دايما شايف الطرف التانى يستاهل وان كلهم حيوانات ناطقه وبيتحول لحد لا بيحب ولا بيكره بس بيتحرش من بعيد ليعيد او من قريب لقريب وغالبا ده نهايته وحشه بفضيحه .