أغلب الممثلين مجانين، وجزء كبير من المجانين دول ممكن يفشخ نفسه حرفيًا عشان يحضر نفسه لدور معين.. في المقال ده هنركز على نوع معين من التحضيرات دي وهو اللي بيتطلب مواصفات جسدية معينة، وهنشوف شوية من المجانين دول عملوا إيه عشان يبقوا جاهزين، وهل الموضوع يستحق فعلًا ولا لأ.

 

1- يمكن المثال الأشهر هو كريستيان بال اللي تقريبًا ما بيصدق إن دور يجيله ويكون مطلوب منه فيه إنه يخس أو يتخن فشخ أو يعمل فورمة فشيخة، فيقوم عاملها على طول.. ويمكن المثال الأشهر في حالته هو فيلم The Machinist اللي خس فيه حوالي 30 كيلو في حوالي 4 أشهر بس، وكان ناوي يكمل كمان لولا إن الدكاترة قالوله إنه ممكن يموت!

كريستيان بال

 

2- مات ديمون كمان حصلته حاجة مشابهة في فيلم Courage Under Fire، اللي خس فيه 20 كيلو عشان يلعب دور جندي مدمن، فبعد ما خلص تصوير الفيلم، الدكاترة خلوه تحت الملاحظة لمدة 7 أشهر تقريبًا عشان يطمنوا عليه.

مات ديمون

 

3- عشان دوره كواحد مدمن وكمان عنده إيدز في فيلم Dallas Buyers Club، ماثيو ماكونهي خس حوالي 21 كيلو في حوالي 6 أشهر.. الموضوع طبعًا جه بفايدة وكسب الأوسكار سنتها.

ماثيو ماكونهي (1)

 

4- ناتالي بورتمان أصلًا رفيعة فشخ، بس عشان دورها كباليرينا في فيلم Black Swan؛ اتطلب منها إنها تخس حوالي 10 كيلو، وكانت بتدرب حوالي 6 ساعات كل يوم ومبتاكلش تقريبًا، وقالت بنفسها بعدها إن أوقات كتيرة كانت بتحس إنها هتموت خلاص، بس طبعًا وقت ما بتكسب الأوسكار كل حاجة بتهون.

ناتالي بورتمان

 

5- مثال تاني هو روبرت دي نيرو في فيلم Raging Bull.. دي نيرو بدأ تصوير الفيلم وأغلب مشاهده وهو فورمة حلوة تليق بملاكم محترف، بعدها التصوير وقف كام شهر عشان يدوله الفرصة إنه يتخن بتاع 30 كيلو عشان يكمل الشخصية بعد ما كبرت.

روبرت دي نيرو

 

6- مش سهل إن الواحد يلعب دور سوبرهيرو خصوصًا لما تكون ممثل كوميدي بالأساس ومكلبظ كمان، بس كريس برات عمل المفاجأة وعمل فورمة محترمة عشان دوره في فيلم Guardians of the Galaxy، اللي كان حظه برضه إن شخصيته كوميدية.

كريس برات

 

7- 50 سنت اتجنن وعملها وهو كمان عشان دوره كلاعيب كورة عنده سرطان في فيلم Things Fall Apart، ونزل وزنه بتاع 25 كيلو، وده عن طريق إنه كان بيجري كل يوم 3 ساعات وعايش ع السوايل فقط لا غير.

50 سينت

 

8- محدش يقدر ينكر إن تشارليز ثيرون مزة، بس ده ممنعهاش إنه تضحي بمزمزتها دي وتزيدلها كمان بتاع 15 كيلو عشان دورها في فيلم Monster، والحمدلله تعبها مراحش هدر وفازت بالأوسكار هي كمان.

تشارليز ثيرون

 

لو فاكرين ادوار تاني وممثلين تاني عملوا كده في نفسهم تقدروا تبعتولنا 🙂