إحنا خلاص فعلياً نص حياتنا بقت على الفيبسوك سواء اعترفنا بده أو لا.. واللايك والتعليق بقى ليهم معنى في حياتنا مش مجرد حاجة في ابليكشن بنبص عليها سريعا ونكمل حياتنا.. لأ ده انت ممكن تقعد تتناقش في تعليق جالك والحيثيات اللي ورا التعليق دي.. والتعليقات دي بقى أنواع.. ودي أكتر الأنواع اللي بتوصلي أنا.. في أنواع بتجيلكم معرفهاش؟
-
الناس عمرها ما كانت مبسوطة
وده بيكون تعليق حزين جي من شخص حزين زيه كل مهمته على الفيسبوك أنه يفرغ طاقته السلبية في وش الناس مش بس على صفحته الشخصية. ياريت !.. لو على صفحته الشخصية هو حر وهنعمله unfollow و الموضوع هينتهي. لكن ده تلاقيه بيلف على كل بوستات صحابه زي الشخص المجذوب البائس وهو عمال يكتب ويعدد.. الإنهيار قادم.. ماعدش في حاجة حلوة في الدنيا. ولو الخبر حلو وأكيد مش مفرك يقولك “والله طيب كويس” عقبال كذا كذا كذا.. المهم أنه مش هيسيبك في حالك إلا لما ينكد عليك
-
في اوروبا والدول المتقدمة
وده الشخص اللي بيربط تعليقه بأي حاجة تخص الأوضاع في مصر.. شريط عمرو دياب الجديد مش حلو مثلا “يا عم ماهو لو مكناش في أم البلد دي كان عمل ألبوم أحلى” .. واحدة تنزل بوست انها حسا انها تخنت ” يا بنتي سيبي البلد دي وأمشي وأنتي هتخسي” .. المهم أنه مقتنع تماماً أن اي حاجة برة مصر هي الجنة وفيها كل الحلول
-
انا كنت معدية .. قولت أخد الجمعية
وده الشخص الشارد اللي غالبا مش فاهم اي حاجة بتحصل.. يكون مثلاً في بوست عليه خناقة كبيرة في ما يقرب من 150 تعليق.. وهو يصحى يبص ع الفيس بوك يلاقي البوست ويركز في البوست بس من غير ما يقرا الخناقة والردح اللي في الكومنتات وتلاقي وكومنته هو رقم 151 وتلاقيه بيقول مثلا ” الله .. مفيش لينك تحميل” .
-
وكلكم قمرات
وده الشخص الإيجابي بشكل أوفر.. تلاقيه كومنتاته عن كل البنات والولاد.. منور يا حبيبي.. منورة الدنيا يا حبيبة قلبي… قمر والله… تحسه كده شمعة بتحترق من أجل الآخرين.. وطبعا ده اللي بعد التحديث الجديد بيعمل قلوب حمراء بدل اللايك
-
لا يقولي عليا حمار
وده الشخص اللي عنده أزمة ثقة ف النفس رهيبة. وخياله الحزين ضحك عليه وفهمه أنه لما يعترض على كلام الناس ويهاجمهم فهو كده برنس في ذاته وبيفهم أكتر منهم وأحسن منهم وفلت خلاص. ودايما تلاقيه بيبدأ تعليقاته بـ “ياعم ماشي بس لأ”
-
التعليق البوست
وده التعليق اللي عادة مش بيتقري اساسا من اي حد ولا صاحب البوست نفسه. عشان مش منطقي ابداً ان الواحد يكون كاتب بوست سطر واحد ولا حاجة و يدخل يلاقي واحدة معلق له بعشر سطور وبيهري في المهري وياسلام بقى لو كان كمان كاتبه بالفرانكو اراب.. غالبا ممكن يتعمل له بلوك
-
التعليق المسموم
وده بيكون في شكله الظاهري فقط شبه التعليق بتاع بحبكم كلكم.. لكن صاحب البوست بيكون فاهم كويس نية الشخص اللي بيعلق وغالبا بيكون مش طايقة اساسا و غيران منه و مفروس وهيموت كل ما الشخص ده ينزل بوست لخبر حلو أو صورة مع مزة بس في نفس الوقت عايز يثبت حسن نيته فيقوم معليق تعليق شكله حلو ولكن الحقيقة انه بيستمه في سره.
-
التعليق الخِفة
وده عادة ما بيكون تعليق من ولد عند بنت معجب بيه وتوتره وارتباكه ورغباته المكبوتة مش مدينين الفرصة لعقله أنه يوصل لتعليق ذكي يعلق بيه البنت فكل كومنتاته بتكون أومليت خالص الصراحة
ابعتولنا اغرب التعليقات اللي بتجيلكوا انتوا كمان 😀