8 أشياء يجب أن تتجنبيها في تعاملاتك مع الآخرين وذلك حتى لا تحملي نفسك أكثر من طاقتها وتُعكّري صَفوك، وتسامحي أحداً لم يكن حريصاً عليك. في هذا الصدد يؤكد الدكتور أحمد هارون استشاري العلاج النفسي وعضو الجمعية العالمية للصحة النفسية، على أن تجنب تلك الأشياء صعب بالتأكيد.. ويحتاج إلى شجاعة .. لكن تطبيقها يجعلك تحترمين نقسك وتجعل الآخرين يحترمونك لزاماً.. وهي كالآتي:
1-متتحمليش فوق طاقتك
سواء في علاقتك باصحابك أو بحبيبك أو حتى اهلك، مينفعش تحملي نفسك فوق طاقتها مهما كانت الأسباب لأن في الأخر انتي اللي هتتعبي ومش هتلاقي اللي يسندك، من الأخر محدش هينفعك غير نفسك.
2-اللي ميسألش فيكي متعبريهوش
اللي ميكلمكيش متكلميهوش، واللي ميسألش فيكي متعبريهوش، واللي كلمتيه مرة ومردش مترجعيش تتصلي بيه تاني، لو انتي مش فارقة معاهم مينفعش يفرقوا معاكي.
3-متديش فرصة تانية لحد مايستاهلش
يوم لما تدي فرصة تانية لحد لازم تكوني متأكدةه إنه يستاهلها،  لكن في ناس كدة بتصرفاتها بتقولك انا مستاهلش فرصة تانية، انا استاهل “فرصة سعيدة”.
4-مسج واحدة كفاية
بطلي زن، مكالمة ورا مكالمة ومسج ورا مسج، “إنت فين”.. “طمني عليك”.. “يا ابني رد عليا” .. لانه طبيعي لو شاف مسج واحدة بس هيرجع يكلمك ولو مشافش يبقى مش هيشوف الباقي، اما بقى لو شاف ونفضلك ده موضوع تاني خالص بقى..
5-متتحايليش على حد
اللي عايزك أو فارقة معاه مش هيستنى تتحايلي عليه أو تطلبي منه اهتمام أو تقدير، بالعكس ده انتي هتلاقيه بيعمل ده وأكتر من نفسه، وعشان كدة مينفعش تتحايلي على حد.
6-متسامحيش اللي غلك في حقك عمداً
اللي يغلط في حقك عن قصد أو يعمل حاجة عارف إنها هتضايقك مينفعش تسامحيه أو تقبلي منه أسف لمجرد أنكِ “باقية عليه ، وخصوصا لما يكون بيكرر نفس الغلط كل مرة.
7-متتنازليش عن كرامتك مهما حصل
مهما كانت الأسباب، اوعى تتنازلي عن كرامتك أو عزة نفسكن لانك لو معملتيش لنفسك قيمة الكل هيدوس عليكي ومحدش هيعملك حساب، سواء صاحب أو حبيب.
8-اللي يخرج من حياتك بمزاجه مترجعيهوش بمزاجك
وأخيرا بقى لازم تاخدي بالك كويس قوي من الجملة دي، أنت مش تحت أمر أي حد يدخل أو يخرج من حياتك في الوقت اللي يحبه، وعشان كدة اللي يخرج من حياتك من غير سبب لازم ترفضي دخوله حياتك مرة تانية.