مش متاكدة ان كان “هو” بيعتبرك مجرد صديقة مقربة ولا هو فعلا حاسس نحيتك بحاجة؟ هو انا فعلا في ال” فريند زون ” ؟  شايفة ان نفس السيناريو البائس بيتكرر مرة ورا مرة وده مخليكي في موقف غير مريح و اسالة كتير بتدور في دماغك مش لاقيالها اجابة, والحيرة دي ممكن تؤدي انك تخسري هذا الصديق المقرب او الشخص اللي معجبة بيه
غالبا معظمنا عاش موقف شبه ده مرة علي الاقل, بتبقي محتارة مش متاكدة هو انا عاجباه زي ما هو عاجبني ولا هو حاططني في ال” فريند زون “, عشان كده بعد بحث وتدوير وتفحيص وتمحيص قدرنا نوصل لمجموعة من العلامات اللي لو ظهروا قدامك اعرفي انك اتحطيتي في ال ” فريند زون ” وانك محتاجه تراجعي قراراتك و تحاولي متتورطيش عاطفيا اكتر من كده

1- دايما انتي اللي بتبدأي اي حاجه

انتي دايما اللي بتقترحي انكوا تتفرجوا علي فيلم في السينما سوا مثلا, انتي كل مرة اللي بتكلميه او تبعتيله رسالة الاول وهو عمره ما بيعمل كده من نفسه, حتي في الفليرتنج ( الملاغية يعني ) انتي برضه اللي بتبدأي كل مرة, اه ولو تفاعل معاكي ده مايتحسبش علي فكرة!بداية فريند زون

2- مبيغيرش

من طبع الرجالة انهم يبقوا علي اعصابهم لو حسوا بتهديد لمكانتهم عندنا؛ ده اللي بيسموه الغيرة. لو مبيظهرش اي فتفوتة غيرة او لو مفيش اي دراما بتحصل من وقت للتاني, زي مثلا خارجة مع مين او مين بيكلمك او فلان ده بيكلمك بالطريقة دي ليه .. لو كل ده مبيحصلش يبقي هنا لينا وقفة!

الضغط كله عليكي انتي

 ملحوظة: متحاوليش تختبري موضوع الغيره عنده ده عن عمد والا هتكون العواقب مش سليمة ابدا

3- الملامسة مفيش خالص

لو انتي عاجباه فعلا يبقي مستحيل ان ميبقاش فيه اي تلامس بينكوا سواء كان متعمد او لأ, دايما هيلاقي مبرر لانه : يشيل حاجه ماسكة في شعرك, يمسك ايدك وانتوا بتعدوا الشارع قال يعني بيعديكي , او حتي لو بيديكي بالبوكس! ده انجذاب طبيعي مش هيقدر يقاومه … ده لو انتي عاجباه.

مني ذكي صعيدي في الجامعة الامريكية -فريند زون

4- بيتكلم معاكي عن بنات تانية معجب بيهم

كل شوية بتظهر بنت معينة كده في كلامة وبيبقي واضح جدا وهو بيحكي معاكي انه معجب بيها, طبعا انتي هتبقي فاكرة انه كده بيختبرك او بيشوف هتغيري عليه ولا لأ, ده ممكن يبقي احتمال ضعيف وساعتها لو بان انك بتغيري هيقولك فعلا ان انتي اللي عجباه .. بس الاحتمال ده ضعيف جدا وفي الاغلب هو فعلا معجب بالبنت التانية فوقي بقي 😀

بحبها يا خلف

5-دايما دايما دايما مشغول

مبيبذلش اي مجهود, ولا حتي بيحاول يفضي وقته عشانك , مشغول معظم الوقت حتي لو كان مبيشتغلش ومعندوش هواية وموارهوش حاجه خالص .. كده تعرفي انك مش من اولوياته

فريند زون 2

6- بيرد متاخر علي المكالمات والرسايل

شبه العلامة اللي قبلها. خلينا نتفق انه في العصر الحديث الناس كلها بقت لازقة في تليفوناتها فلما يرد علي رسالتك تاني او تالت يوم فلازم هنا يعني يبقي لينا وقفة!

محمد هنيدي الو ممكن اشارك

7- الاعذار

حاسه انك كل شوية بتلتمسيله العذر ؟ ( عنده اجتماع, ساكن بعيد قوي, قطة الجيران عيانة والقائمة طويلة من الاعذار ) .. لو الولد فعلا معجب بيكي يبقي هيعمل المستحيل عشان يشوفك او يسمع صوتك ( حتي لو هيشوف وجهك الملائكي وانتي لسه صاحية من النوم ) لو مبيعملش كده يبقي انتي مش عجباه قوي

اعذار فريند زون

8- بيفضل الخروج مع الشلة

هيبقي باين قوي يعني انه مبيفضلش يقضي وقت معاكي لوحدكوا ودايما عايز يخرج مع شلة

شلة صعيدي في الجامعة الامريكية

9- معندوش اي فضول من نحيتك

لو مهتم فعلا هتلاقيه بيسال اسالة كتير عن حياتك, من اول بتحبي تشربي القهوة ازاي لحد اسم المدرسة اللي كانت بتدرسلك في الحضانة؛ ممكن يقعد بالساعات يسالك في تفاصيل حياتك منغير ما تزهقي او هو يزهق

صعيدي في الجامعة الامريكية فريند زون

من الاخر يعني البنات عموما بيستبقوا النتايج و بيميلوا لتصديق اللي عايزين يصدقوه. طبعا لكل قاعدة استثناءات وفيه اللي بيشوفوا العلامات اللي فوق دي و يغيروا من تفكيرهم. عشان تبقي في السليم خليكي صبورة, متعلقيش امال علي حاجه مش حقيقية, ولو عاجباه بجد يبقي متقلقيش هيعرفك ده بطريقة او باخري
وساعتها هتودعي ال” فريند زون ” للابد