من أكتر الحاجات اللي ممكن تحير أي حد في علاقة، هل أنا في الفريندزون ولا لأ؟ هل البنت اللي بكراش عليها، هي كمان معجبة بيه ولا لأ؟ 

ولكن، احنا عندنا خبر حلو! احنا هنقدر نساعدك تعرف انت في الفريندزون ولا لأ، من خلال 6 علامات واضحة، عشان تقرر بعدها علاقتك بالبنت/ الولد دي هتستمر ولا لأ.

تساعدك تديت مع بنت تانية

أول علامة من علامات إنك في الفريندزون، هي علامة واضحة جدًا، وبتقول إنك في أعماق الفريندزون، مش الفريندزون بس. هتلاقي البنت اللي انت معجب بيها، بتقولك على بنات ممكن تديت معاهم، وازاي تخلي البنت دي تعجب بيك وتحبك.

ببساطة، انت ممكن متقبلش ده، ولكن هتلاقي عندها إصرار غريب إنك تديت مع البنت دي، عشان تكون سعيد في حياتك، ولكن هي متعرفش إن هي اللي هتخليك سعيد في حياتك.

مبتحبش تكون معاك لوحدها كتير

دي برضه من العلامات الواضحة وضوح الشمس، إنك في الفريندزون. لإن لو في حالة إعجاب متبادل، هتلاقي إنها عايزاكم تكونوا مع بعض لوحدكم كتير، والعكس صحيح. يعني لما تلاقيها، دايمًا، تقول عايزين نخرج مع الشلة.

فمثلًا، لو قلتلها تعالي نروح فيلم سوا أو نتعشى، فهيكون رد فعلها التلقائي، إنها تقول لأصحابها، وتقولك قول انت كمان لصحابك.

انت زي اخويا

الكلمة دي ممكن تكون سمعتها كتير: “انت زي اخويا”، وبتفضل تقول لنفسك لأ انا هحاول برضه. بس احنا عايزين نقولك، إنها لما تقول انت زي اخويا، فهي بتقصدها بشكل كامل.

وبالشكل ده، انت رسميًا في أعماق الفريندزون؛ ودي علامة إنك متحاولش كتير في إنك تحول الأخوة دي لحب، فلازم تبدأ تقنع نفسك إن خلاص الموضوع رسميًا انتهى.

تتجاهل مغازلتك بشكل كامل

عشان تقدر توصل لقلب البنت، فانت محتاج تغازلها من فترة للتانية كده، ودي الطريقة اللي هتحس بيها إنها مرغوب فيها. لكن، مع البنت اللي حطاك في الفريندزون، فالموضوع بيمشي بالعكس.

بمعنى؟ لإنك ممكن تقولها كلمة حلوة، فبيكون رد فعلها، انت مضحك أوي، أو على فكرة صاحبتي هيعجبها كلامك أوي. وبالتالي، هي حطت قدامك حيطة سد، مش هتعرف تتخطاها، لأنك في الفريندزون!

بتسألك على نصيحة عشان الولد اللي هي معجبة بيه

العلامة الخامسة هي إنها تعتبرك بما إنك ولد، فانت عارف كل حاجة عن الولاد. وبالتالي، هتجري عليك، مع أول ولد هتعجب بيه، وتبدأ تسألك ازاى تقرب منه، وكأن دي حاجة مش هضايقك أو هتؤذيك.

وأكتر من كده كمان، ممكن تطلب منك تساعدها تقرب من الشاب اللي هي معجبة بيه، وهنا احنا عايزين نقولك انت في أعمق نقطة في الفريندزون، لأنها بالفعل مهتمة بحد تاني أصلًا. 

استشاري الحب

لو عايز تعرف إنها مبتفكرش فيك نهائي، فانت ممكن تلاقيها في يوم جاية ليك بتعيط، وبتشكي ليك عن علاقتها مع الولد اللي هي مرتبطة بيه، وهتفضل مقربة منك، لحد ما مشكلتها تتحل، لأن دورك هيكون هنا انتهى .

على الرغم إن دي حاجة مؤلمة جدًا، ومش سهل إنك تتجاوزها، إلا إنها علامة واضحة تانية، إنك في الفريندزون.

في النهاية، عايزين نقول، إن طبيعي إن الصداقة، في بعض الأحيان، تتطور لعلاقة حب، ولكن مهم أوي إنك تحترم قرارات الطرف التاني، لأن لو مش هو بيعتبرك حبيب/ حبيبة، فالموضوع منتهي، ولازم تحترم قراره.

كمان، احنا عارفين إن الموضوع مؤلم جدًا، إنك تعتبر شخص حبيبك، وهو يكون معتبرك مجرد صديق، ولكن لازم تتجاوز ده، وعمومًا زحمة الحياة، هتنسيك كل حاجة، فاشغل نفسك بحاجات كتير، والموضوع هيعدي.

قولنا في التعليقات، ايه علامات تانية ممكن تعرف من خلالها إنك في الفريندزون؟

خلال الساعات اللي فاتت، انتشرت بوستات كتير على تويتر وفيسبوك، بتتكلم عن حوار البرجر، والبرجر وإسلام برجر؛ بعض الناس افتكرت إن ده تريند أكل، ولكن الحقيقة إن ده مش تريند أكل. احنا، النهاردة بنتكلم عن إسلام اللي خبى إنه متجوز ومخلف لمدة 9 سنين!

إسلام (برجر).. قصة جديدة ظهرت على السطح لرجالة بتكذب وبتتلاعب بمشاعر البنات التانية، وتخبي عليهم انهم متجوزين ومخلفين. وده يمكن يفكرنا بترند، ظهر في ابريل اللي فات، على تويتر، بيتكلم عن خ.م، واللي كان متجوز ومراته حامل وكاتب كتابه على واحدة تانية وخاطب واحدة تالتة ومصاحب الرابعة. 

الحقيقة، سواء اللي عمله إسلام (برجر) أو اللي عمله خ.م، احنا بنواجه مشكلة خطيرة، وهي أن بعض الرجالة بتدي لنفسها الحق إنهم يخبوا حاجات مهمة زي إنهم متجوزين أو مخلفين عن البنات التانية، عشان يستغلوهم تحت إسم الحب. في المقال ده، هنتكلم على تريند حوار البرجر، وليه اللي عمله إسلام، مش مقبول.

متجوز ومخلف

ده كان كلام نور، اللي كانت ضحية لإسلام (برجر)؛ لمدة 9 سنين، خبى إسلام إنه متجوز ومخلف، بل والأكتر، كان بيقولها إنه مش بيفتح فيسبوك، عشان متكشفوش، وفي النهاية كشفته بعد يوم من قراية فاتحتهم.

ولما جت واجهته إنه مقالهاش، قالها: “افتكري يوم ما كلنا برجر”. الحقيقة، القصة اللي اتعرضت لها نور، واحدة من القصص المأساوية، اللي بقت تتعرض لها بنات كتيرة، خلال الفترة اللي فاتت، وهي إن بعض الرجالة المتجوزين بيخبوا حاجة زي دي، عشان يبدأوا يتلاعبوا بمشاعر البنات التانية.

الكذب

تريند حوار البرجر، بيخلينا نؤكد على حاجات كتير، ممكن متكونش واضحة عند ناس كتير وهي، مينفعش تكون في علاقة، وتكون العلاقة دي قايمة على الكدب. ومينفعش تكون في علاقة، وتخبي على شريكك/ شريكتك، حاجات مهمة، زي إنك متجوز ومخلف!

إنك تكذب على البنت، اللي بتدعي إنك بتحبها، عشان تكسب نقطة عندها، وتخبي عليها لمدة 9 سنين حاجة مهمة زي دي، ده بيدل على إنك إنسان مريض ومحتاج تتعالج، لأنك فعلًا بتعاني من أزمة شخصية، والموضوع مش مجرد إنك نسيت تقول أو كذبت، الموضوع أكبر من كده.

لو بنتكلم على (ألف باء) علاقة صحية، هو إن يكون في صراحة بين الطرفين، إن كل طرف يقول للتاني عن حياته وعلاقاته، وعيلته وأصدقائه، ومراته لو متجوز! لأن ببساطة، لو قلت من البداية حاجة زي دي، كان الموضوع اتحل، من غير ما تتلاعب بمشاعر البنت.

كلمة أنا بحبك عقد

كلمة أنا بحبك عقد.. اللمسة عقد النظرة عقد.. الوعد بالجواز ده اكبر عقد – أحمد زكي، اضحك الصورة تطلع حلوة 1998.

واضح إننا بنواجه مشكلة كبيرة، مش بس في علاقات الحب والجواز، ولكن حتى في علاقات الصداقة، وهي إننا وصلنا لمرحلة اللعب بالمشاعر! إنك تعشم حد بحاجة وتلعب بمشاعره لغاية ما يحبك ويتعلق بيك، وبعد كده تقول أصل مش هقدر أكمل، أو أصلي متجوز، دي من أسوء الحاجات اللي ممكن أي شخص يعملها.

والمشكلة الأكبر، إن اللي بيعمل كده، بنسبة كبيرة، هو عارف بيعمل ايه، يعني كمثال إسلام (برجر)، هل مكنش يعرف انه متجوز ومخلف؟ هل مكنش يعرف إنه لازم يعرف البنت بحاجة زي دي؟ بشكل عقلاني، بالتأكيد هو عارف، ولكن ايه اللي يخليه يعمل كده غير انه بيلعب بمشاعرها!

وعايزين نقول هنا، احنا مش بنتكلم على الرجالة بس ولكن الستات كمان، مينفعش تلعب بمشاعر الآخرين، وتخليهم يتعلقوا بيك ويحبوك، وفي لحظة معينة تخليهم يوصلوا إنهم يكرهوك!

في النهاية، خلينا نتفق على أكتر من حاجة، أهمها إن اللي عمله إسلام (برجر) شيء مقزز ومش مقبول، ومش من الطبيعي تكون على علاقة بواحدة لمدة 9 سنين من غير ما تقولها إنك متجوز ومخلف. وإنك تكذب على واحدة، عشان توصل لغرضك من العلاقة، ده من أسوء الحاجات اللي ممكن حد يعملها. وإن، تحت أي مسمى، مينفعش تلعب بمشاعر الآخرين. 

معلش يا بنات ابقوا اسألوا اللي متقدملك/ بتحبيه/ خطيبك/ جوزك نفسه، في ساعة صفا كده “انت متجوز؟” أصل بعض الرجالة بتنسى تقول: “انا متجوز ومخلف”.

واضح إن بقى مطلوب من البنات، قبل ما يرتبطوا بأي حد، إنهم يسألوه “إنت متجوز”؟

فيلم ريش عمل ضجة مرتين، المرة الأولى بعد ما فاز بجايزة أسبوع النقاد في مهرجان كان، ووقتها الناس كلها احتفت بالفيلم والإنجاز اللي عمله. والمرة الثانية، بعد عرضه في مهرجان الجونة، وبعدها بدأ عدد من الفنانين يتكلموا عن انه فيلم مسيء لمصر. في المقال ده،هنعمل مراجعة لفيلم ريش، وهنتكلم عن القصة والتمثيل والموسيقى التصويرية والتصوير.

القصة

فيلم ريش بيتكلم عن عيلة فقيرة من 5 أفراد، وفي عيد ميلاد الإبن، الأب بيجيب ساحر عشان يفرح إبنه، وفي فقرة من الفقرات بيحول الساحر الأب لفرخة، ويفشل إنه يرجعه مرة تانية. وخلال أحداث الفيلم، الزوجة (دميانة نصار) بتحاول ترجع جوزها زي ما كان، وفي نفس الوقت بتحاول تعوض غياب الزوج.

من بداية فيلم ريش لنهايته، هتحس إنك في دايرة مغلقة، لأن الأحداث مشابهة لبعض، للدرجة اللي هتخليك تحس بالملل، أثناء مشاهدتك للفيلم، وواضح من أحداث الفيلم إن في مط كبير جدًا، فاحنا بنتصور إن ساعة للفيلم كانت كفاية أوي عشان توضح المغزى من الفيلم.

على الرغم أن الفيلم بشكل رئيسي بيتكلم عن الفقر والجوع والعشوائيات، وبيوضح كم المعاناة اللي بتعانيها الطبقة دي، إلا أن الآثار النفسية اللي ممكن يسببها جواك الفيلم آثار سلبية، وده يمكن اللي ميخلكش تقدر تكمل الفيلم للآخر.

التمثيل والأداء

بشكل عام، خلال أحداث الفيلم هتلاحظ (فتور) واضح في أداء الممثلين، ويمكن ده بسبب الجو العام اللي حب “عمر الزهيري” يخلقه في الفيلم. وبما إن “دميانة نصار” كانت هي بطلة الفيلم، واللي اتكلم ناس كتير عن أدائها التمثيلي، حابين نتكلم على نقطة هنا!

إننا نتعاطف مع “دميانة نصار” باعتبارها ست مصرية من الصعيد، وقدرت توصل للعالمية، ده شيء جميل وإنساني بالدرجة الأولى، لكن المستوى التمثيلي الضعيف اللي ظهرت عليه، أثر بشكل كبير على تجربة المشاهدة للفيلم.

وعلى الرغم من كدة، احنا شايفين ان ده حصل بناءًا على طلب “عمر الزهيري”، وبالتالي هو اللي يتحمل بالأساس المشكلة دي، وهي الأداء التمثيلي الواحد لدميانة، سواء من ناحية الانفعالات أو التجسيد، اللي متغيرش تقريبًا طول الفيلم. 

الإخراج

الحقيقة، يُحسب لعمر الزهيري، مخرج فيلم ريش،اهتمامه بالتفاصيل إخراجيًا، سواء من ناحية الديكور، اللي كان مناسب بدرجة كبيرة للجو (القاتم للفيلم)، أو من ناحية التصوير والكادرات، عايزين نقول إن فيلم ريش ممكن يتاخد منه لقطات فنية رائعة، بسبب الكادرات الجميلة للفيلم.

اختيار عمر الزهيري للكادرات الضيقة في البيت والكادرات الواسعة بره البيت كان أكتر من رائع، وده اللي خلى التجربة البصرية مناسبة لحد كبير للجو اللي خلقه في الفيلم. 

كمان، اختيار الأغاني لفايزة أحمد وفرقة المصريين وغيرهم،أضاف لمسة جمالية للفيلم. وبالنسبة لاختيار ملابس الشخصيات، فهي كانت مناسبة لحد كبير، وأضافت للعمل. 

في النهاية، بعد ما عملنا مراجعة لفيلم ريش،حابين نقول إن الفيلم مش من نوعية الأفلام اللي ممكن تتفرج عليها كذا مرة،ولكن مشاهدة واحدة كفاية. من وجهة نظرنا، التجربة الإخراجية المتميزة لعمر الزهيري، من ناحية اهتمامه بالتفاصيل، هي اللي خلت فيلم ريش يستحق جايزة في مهرجان كان.

لو اتفرجت على الفيلم، قولنا هل فيلم ريش يستحق كل الضجة دي ولا لأ؟

خلال طفولتنا، كانت الألعاب بتمثل جزء مهم من حياتنا، سواء كانت ألعاب أتاري أو كمبيوتر أو بلايستيشن 1، ولأن الألعاب دي احتلت جزء كبير من حياتنا، ولغاية دلوقتي مرتبطين بيها، قررنا نجمع أكتر 10 ألعاب مهمة بالنسبة لجيل التسعينيات.

فلو كنت من جيل التسعينيات، فالمقال ده موجه ليك، هناخدك في رحلة للطفولة، عشان نفتكر مع بعض أهم الألعاب، زي ماريو وازي تخنق جارك وبيبسي مان، تعالوا مع بعض نشوف ايه هي الألعاب دي.

بيبسي مان

واحدة من أهم الألعاب اللي شكلت طفولتنا، كانت لعبة بيبسي مان، وهي لعبة من ألعاب بلايستيشن 1. اللعبة في الأساس صدرت سنة 99 وكانت لعبة سيجا، وبعدين تم دبلجتها باللهجة المصرية.

احنا ارتبطنا ارتباط كبير بلعبة بيبسي مان، ولو انت مكنش عندك بلايستيشن 1 وقتها، فأكيد ممكن تفتكر، أيام ما كنت تنزل محل البلايستيشن، وتلعب اللعبة مع اصحابك. 

طرزان

تاني لعبة على قايمتنا، من ألعاب الكمبيوتر، وهي طرزان، كلنا ارتبطنا باللعبة دي ارتباط كبير، وفي مننا اللي قفل اللعبة كذا مرة، من كتر حبه للعبة.

طرزان كانت بتاخدنا في رحلة معاها، بدايةً من طفولة طرازان لحد ما يقابل البوص في النهاية. وهي اللعبة اللي كنا بنخلص المدرسة، ونجري على البيت نلعبها على الكمبيوتر.

كابتن كلاو

واحدة من الألعاب اللي منقدرش ننساها كابتن كلاو أو كلاو علطول، واللي بتتكلم عن قط عايش وسط عالم من الكلاب، وبيحاول خلال اللعبة يدور على كنز كبير من الدهب، وخلال رحلته بيواجه مجموعة من العقبات والتحديات اللي خلت اللعبة تاخد جزء كبير من طفولتنا.

ازاي تخنق جارك

واحدة من أشهر ألعاب المقالب، واللي عملت رواج كبير أوي وقتها، واللي حبناها في الطفولة، مش بس عشان الكوميديا والضحك اللي كنا بنشوفهم خلال اللعبة، ولكن كمان عشان كنا بنحتاج نفكر ازاي نعمل المطلوب من غير ما الجار ياخد باله مننا.

هركليز

واحدة من أفضل وأقوى ألعاب الأكشن في طفولتنا هي هركليز، وبرغم إنها صدرت من مدة طويلة، إلا إن في كتير مننا ميقدرش ينسى الأيام اللي كنا بنلعب فيها اللعبة، وفي مننا لغاية دلوقتي، اللي بيحاول يحمل اللعبة على الكمبيوتر، عشان يلعبها من وقت للتاني.

بيت الرعب

تعتبر لعبة “بيت الرعب” واحدة من أوائل الألعاب، اللي كان فيها زومبي، وده اللي بيخليك طول الوقت في اللعبة بتحاول تحافظ على حياتك وتموت الوحوش أو الزومبي دول. ولو فاكرين، فلعبة بيت الرعب كانت الراعي الرسمي لكوابيسنا في الطفولة، وده اللي خلانا مرتبطين بيها لحد دلوقتي.

سوبر ماريو

لو هنفتكر مع بعض ألعاب الطفولة، فأول لعبة هتيجي على بالك هي سوبر ماريو، واللي بيحاول خلال رحلته يوصل للأميرة عشان يحررها، وخلال رحلته بيقابل سلاحف وخنافس وتنانين، كل ده عشان يوصل لحبيبته، وهتفضل لحظة تحرير سوبر ماريو لأميرته، اللحظة الأجمل في طفولتنا.

باك مان

واحدة من أكتر الألعاب التقليدية، اللي لعبناها في الطفولة، هي باك مان، لأن ببساطة أنت طول اللعبة بتبدأ تتحرك عشان تاكل كور صغيرة، وخلال ده، في مخلوقات عجيبة بتحاول تموتك. فكرة اللعبة البسيطة، ولكن احنا قضينا ساعات بنلعبها.

السيرك

من أحلى ألعاب الأتاري، اللي حبيناها في الطفولة، هي لعبة السيرك، واللي كانت عبارة عن بهلوان وبنشوف رحلته في السيرك بداية من وهو راكب الأسد وبيحاول يعدي من حلقات من النار، وبعدين تحديات تانية مختلفة مع القرود والحصان، وغيره.

كونترا

آخر لعبة على قايمتنا هي كونترا، واللي صدرت 1987، وخلال اللعبة انت بتحارب جميع أنواع الوحوش، وتقريبًا من أول لحظة انت بتضرب نار لحد ما بتوصل للبوص، وبعدين بتسيب الجزيرة بهليكوبتر بعد ما تفجر الجزيرة. وهي تعتبر واحدة من أهم ألعاب الطفولة، ولو تسأل أي حد كان عنده أتاري،  ايه أهم الألعاب اللي لعبها؟ هيكون رده لعبة كونترا.

هل هي دي الألعاب كلها؟ بالتأكيد لأ، فلو هنتكلم على ألعاب الطفولة، ففي ألعاب زي كراش وجتا 4 وسبايدر كمان وزوما ونينجا وصيد البط وغيرها من الألعاب اللي منقدرش ننساها، ولكن احنا اتكلمنا على 10 من أهم الألعاب دي، ومحتاجين نسمع منكم!

قولولنا في التعليقات ألعابكم المفضلة، واللي ممكن نضيفها للقايمة؟