21 مارس اليوم اللي بنفضل بنفكر فيه من اول الشهر, الناس الناصحة بتعرف تحوش عشان تجيب هدية لامهاتهم لكن المبذرين زي حالاتي احيانا بتواجههم المشكلة دي واليوم بيعدي منغير هدية وساعتها مفيش قدامك غير حل من ال2.
اما انك تطنش خالص كانك ناسي بس ساعتها ماما هتزعل واظن محدش يحب ان ماما تبقي زعلانة منه
الحل التاني بقي انك تعمل فكرة بسيطة تفرح ماما وفي نفس الوقت تبقي مش مكلفة كتير او مش مكلفة نهائيا
واليك 5 افكار ممكن تستخدمهم
1- اكتب جواب لماما
في الاول وفي الاخر ماما ست والستات عموما بيحبوا الجوابات وبالذات لو كان مكتوب بمشاعر حقيقية يمكن حتي متقدرش تعبر عنها لامك بالكلام بس ممكن تكتبها في ورقة وتغلفها وتديها لماما وصدقني هتحتفظ بيه للابد
2- ساعدها في شغل البيت
لو ماما شغالة في البيت كل يوم تطبخ وتنضف وتوضب وتغسل مواعين يبقي من حقها تاخد يوم ” او اسبوع ” اجازة وانت تعمل ده مكانها .. الحل ده هينفع البنات اكتر لان عندهم خلفية عن الموضوع
” طبعا هي مش هتسمحلك تزود المدة عن يومين عشان غالبا انت هتبقي مبتعرفش تعمل اي حاجه من دول “
3- فسح ماما
خد ماما السينما, قعدها في كافية, هاتلها ايس كريم حتي صدقني هتنبسط
4- نزل صورتك وهي حاضناك علي انستجرام مع هاشتاج #حافظ_علي_حضن_أم
جهينة اعلنوا انهم هيتبرعوا ب١.٥٪ من مجموع المبيعات لمستشفي بهية للكشف المبكر عن سرطان الثدي عن كل بوست زي ده ينزل علي انستجرام
ساعتها مش بس هتبقي عملت حاجه تبسط ماما لكن كمان هتبسط امهات كتير تانيين وهتشارك مع ناس تانية في الحفاظ علي حضن ام
5- خد ماما لبهية عشان تعمل كشف دوري مجاني
لو عملت المكتوب في النقطة رقم 4 وزودت كمان هاشتاج #وصلها_لبهية هتاخد توصيلة مجانية من أوبر رايح جي لمستشفي بهية عشان تعمل كشف دوري مجاني وهيتبعتلك Promo code عشان تاخد التوصيلة
