تخيل نفسك واقف ورا شخص وحاطط على رقبته سكينة، سامع صرخاته وهو بيستنجد بالناس، وشايف دموعه، وسامع دقات قلبه، والخوف والضعف مسيطر عليه. ده اللي حصل في جريمة الإسماعيلية! مجرد تخيل ده هيخليك تحس بالخوف والشفقة على المجني عليه، وأكيد فكرت ازاي اتحول سفاح الإسماعيلية لمجرم؟

من أقوال السفاح تيد بندي الشهيرة “نحن القتلة المتسلسلون أبناؤكم، أزواجكم، نحن في كل مكان، وسيكون المزيد من أبنائكم موتى بحلول الغد”.

بعد إحالة أوراق سفاح الإسماعيلية لمفتي الجمهورية، بدأ البعض يفكر، ليه هو اختار الطريق ده؟ وليه محسش بالألم وهو بيعمل الجريمة دي؟ ايه اللي خلاه يعمل ده بكل دم بارد ومن غير تردد؟ ايه اللي حصل في حياته وخلى حياته تنتهي النهاية المأساوية دي؟

في المقال ده، هنحاول نجاوب على التساؤلات دي، بطريقة مبسطة، نقدر من خلالها نفهم ايه هي فئات المجرمين وعلاقة الإجرام بالاضطرابات النفسية، ونظريات لومبروزو في الإجرام.  

فئات المجرمين

على مستوى العالم، في كتير من المجرمين، والسفاحين حتى، كانوا ناس طيبة، ولما اتقبض عليهم، بدأ الناس حواليهم يقولوا: مستحيل يكون قاتل أو ده جاري وعمره ما يعمل حاجة زي كده أو ابني طيب ومتدين وأكيد عمل ده لأنه “ممسوس”، زي ما قالت والدة سفاح الإسماعيلية.

وفي كتير من المرات، بيكون المجرمين والسفاحين واضحين وضوح الشمس، وكل اللي عرفهم بيقول إنهم، بالتأكيد، هم اللي عملوا الجريمة البشعة دي، عشان كده احنا ممكن نصنف فئات المجرمين لصنفين رئيسيين: 

الفئة الأولى

أول فئة من المجرمين، هم الأشخاص، اللي بيتحملوا مسؤولية أفعالهم مسؤولية كاملة، وفي الغالب بيكونوا اتسجنوا قبل كده، أو دخلوا الأحداث وهم صغيرين. 

الفئة الثانية

أما الفئة التانية، فهم الأشخاص اللي بيعملوا الجرايم دي من غير أي إدراك أو وعي، لأنهم مصابين باضطرابات نفسية وعقلية، وفي الغالب بيكونوا أحرار، وبيدخلوا المصحات النفسية عشان ياخدوا العلاج اللازم لحالتهم. 

الإجرام بين الجينات والاضطرابات النفسية

على الجانب التاني، هنلاقي إن بعض العلماء بيأكدوا أن الفعل الإجرامي أو القتل أو العنف، بيكون ليه سبب جيني وبيولوجي واضح، وبيصنفوا المجرمين تحت واحد من اضطرابين أساسيين، وهم: 

اضطراب الشخصية الحدية

في الحالة دي، بيكون المجرم معندوش القدرة على التحكم في مشاعره بشكل كامل، عشان كده ممكن تلاقي إنه ممكن يعمل الجريمة دي ضد أي حد من اللي حواليه، بيما فيهم أهله. 

اضطراب الشخصية المعادية للمجتمع

أما في الحالة دي، فالمجرم أو السفاح بيرتكب الجريمة من غير ما يحس بأي تردد أو خوف أو أي مشاعر طبيعية أو حتى الندم بعد ما يعمل الجريمة. 

وعلى الرغم من أن أعراض الاضطرابين مختلفين عن بعضهم، ومفيش مجال نخوض في ده حاليًا، إلا إنهم مشتركين في إنهم أمراض عقلية بتسبب ضرر للدماغ. الدراسات بتؤكد أن الأشخاص المصابين بالاضطرابات دي بيكون عندهم نقص في هرمونات معينة أو انكماش في مناطق معينة في المخ، ونتيجة ده المجرم بيبدأ يهدد كل اللي حواليه.

تشيزري لومبروزو: ايه اللي دفع المجرم للطريق ده؟

يعتبر تشيزري لومبروزو واحد من أشهر العلماء، اللي حاولوا يفسروا السلوك الإجرامي، ومن أشهر أعماله “النظريات الخمسة لتفسير الإجرام”. في البداية حاول تشيزري لومبروزو الربط بين الشكل وطبيعة الإجرام، من خلال نظرية “المجرم اتولد عشان يكون مجرم”، واللي خلص فيها إن في 21 صفة مشتركة بين المجرمين، منها اللي متعلق بحجم الأنف وشكل الأذن والعين، وغيرها. 

وفي عام 1878، ظهر الجزء الثاني من نظرية تشيزري لومبروزو عن “الرجل المجرم”، واللي تعمق فيها في دراسة الأوشام على أجسام المجرمين، واللي لاحظ فيها إن المجرمين، على جسمهم أوشام غير أخلاقية، واتكلم كمان عن اللهجة، اللي بيتكلموا بيها والميل للانتحار والدعارة. 

وفي 1884، ظهر الجزء التالت من النظرية، واللي اتكلم فيها عن الجنون الأخلاقي، وهي إن المجرم بيكون متجرد من الأخلاق، وبيرجع للهمجية والوحشية، ومبيكونش عنده أي مشاعر تجاه الآخرين. وفي الجزء الرابع، اتكلم عن إن المجرم بيعمل ده، بدافع التمرد على المجتمع، وفي الخامس، درس أكتر الصفات الإجرامية وفسرها.

وفي النهاية، أقر لومبروزو، أن أسباب الجريمة، مش بس صفات بيولوجية أو جسدية، ولكن ليها علاقة بالبيئة المحيطة بالمجرم، مش بس الأشخاص المحيطين بيه، ولكن كمان المناخ والطقس والتلوث!

وأخيرًا، عايزين نقول، إننا مش متخصصين في علم النفس الإجرامي، عشان كده مش هنقدر نقول هو ازاي سفاح الإسماعيلية اتحول لمجرم، ولكن كل اللي نقدر نعمله إننا نوضح نظريات مبسطة، في علم النفس الإجرامي، ومن خلال ده تقدر تبدأ تفكر في الأسباب اللي دفعت سفاح الإسماعيلية إنه يبقى مجرم.

قولنا، في التعليقات، ازاي اتحول سفاح الإسماعيلية لمجرم؟

بعد مرور 20 سنة على عرض أول فيلم من سلسلة هاري بوتر، هيجتمع الثلاثي دانيال رادكليف وإيما واتسون وروبرت جرينت في هوجورتس من جديد، في حلقة لم الشمل (العودة إلى هوجورتس) على منصة “إتش بي أو ماكس”، عشان يتكلموا أكتر عن مغامراتهم، مع المخرج كريس كولومبوس، اللي أخرج أول فيلمين من السلسلة. 

العودة إلى هوجورتس

تُعرض الحلقة الجديدة، تحت عنوان “الذكرى العشرين لهاري بوتر: العودة إلى هوجورتس”، في يوم راس السنة 1 يناير 2022، وحسب المنصة، فالحلقة هتتكلم عن إنتاج السلسلة من خلال مقابلات جديدة مع أعضاء الفريق، وكمان هتعرض لقطات من خلف الكواليس من الأفلام التمانية.  

بالإضافة لده، تعتبر حلقة لم الشمل (العودة إلى هوجورتس)، تكريم لكل اللي اتأثرت حياتهم بالسلسلة، بدايةً من الممثلين لطاقم العمل، للمعجبين. وعن الحلقة ، قال المنتج التنفيذي كيسي باترسون: “الأجواء ساحرة، مع الممثلين، اللي بيرجعوا لهوجورتس، بعد 20 سنة. نجوم هاري بوتر مستعدين ياخدوا معجبيهم في رحلة خاصة عشان يعرفوا أكتر عن رحلة صنع الأفلام”.

ردود الأفعال

بعد الإعلان عن حلقة لم الشم، كان في ردود أفعال كبيرة، خاصةً من عشاق السلسلة، اللي عرفوا أبطال هاري بوتر، وهم صغيرين عندهم 11 سنة، ودلوقتي هيلتقوا بيهم مرة تانية، ولكن وهم في التلاتينيات، عشان يتكلموا بعض القصص الخفية، اللي محدش يعرفها عن السلسلة. 

وبعد الإعلان، نشرت إيما واتسون، على إنستجرام، صورة مع أصدقائها، وصورة كمان مع المعجبين، وكتبت: “كان هاري بوتر بيتي وعيلتي وعالمي، ولسه شخصية هيرميون، هي شخصيتي الخيالية المفضلة”. وشكرت الجمهور على استمرار دعمهم حتى بعد عرض آخر جزء من السلسلة. 

بحسب الواشنطن بوست، الكاتبة البريطانية جي كي رولينج، مؤلفة مجموعة الروايات اللي بتستند ليها السلسلة، مش هتحضر الحلقة، وطلبت الواشنطن بوست تعليق ممثلي الكاتبة، لكنهم رفضوا التعليق، ومكشفتش شركة وارنر براذرز المنتجة للحلقة عن سبب إن الكاتبة مش هتكون موجودة.

سلسلة أسطورية

حققت سلسلة “هاري بوتر”، المكونة من 8 أفلام، والمستوحاة من من كتب رولينج، نجاح كبير، بعد ما حصدت أكتر من 7 مليار دولار في شباك التذاكر، وحتى الآن، تعتبر واحدة من أشهر سلاسل الأفلام على مستوى العالم، اللي بيستناها عشاق السينما، لما بيتم عرضها على التليفزيون. 

وعلى الجانب التاني، حققت روايات هاري بوتر نجاح كبير، بعد ما اتباع منها أكتر من 500 مليون نسخة، وتم ترجمتها لأكتر من 80 لغة. عشان كده، تعتبر الحلقة، اللي هتعرض يوم 1 يناير 2022، حدث كبير، لأن ملايين من البشر هيكونوا مستنيين الحلقة، عشان يشوفوا أبطال السلسلة، بعد مرور 20 سنة من إنتاج أول جزء من السلسلة.

في النهاية، كلنا هنستنى يوم 1 يناير 2022، عشان نشوف أبطال السلسلة بعد ما كبروا وبقوا في التلاتينات، وكلنا حماس، عشان نعرف أكتر عن السلسلة اللي كلنا حبيناها وارتبطنا بيها من واحنا صغيرين، وعشان نعرف ايه اللي حصل وراء الكواليس، وازاي السلسلة دي طلعت للنور. 

قولنا، في التعليقات، توقعاتك لحلقة العودة إلى هوجورتس؟

بعد انتشار صورة سفاح الإسماعيلية، وهو بيقبل رجل والدته، بدأ بعض الناس، تتعاطف مع المجرم، وده كان بالنسبة لكتير من الناس شيء غريب، ومش عقلاني ومش منطقي ومش إنساني، ولكن في التقرير ده، احنا، بالتأكيد، مش هندافع عن المجرم، ولكن عايزين نفهم، ليه بيتم التعاطف مع المجرمين بشكل عام؟ 

حادثة الإسماعيلية

في عز الضهر، وفي واحدة من المناطق الشعبية في مدينة الإسماعيلية، حصلت جريمة من أبشع الجرايم اللي ممكن تحصل، وده بعد ما دبح شاب، في العشرينيات من عمره، واحد من المواطنين، وقطع راسه ومشي بيها، وسط حالة (ذهول) من الأهالي.

وحسب اعترافات سفاح الإسماعيلية، قال: “اللي حصل إني كنت ماشي في شارع البحيري ولقيت أحمد (المجني عليه) معدي بالتروسيكل، فأنا رحتله أسأله على “مكواة الشعر”، اللي كنت مدهاله عشان يصلحها، فقالي إنها في المحل بتاعه”.

وأضاف: “بعد كده طلب مني أروح له المحل، واستلمها منه هناك، بس اشترط إني أمارس معاه “الفجور”، زي ما كنا بنعمل قبل كده، فأنا قلتله هشوف الدنيا وأكلمك، وقالي بعدها: “لو مجتليش وعملت كده معايا هفضحك”،  فالدم غلي في عروقي، ورحت مطلع السكينة ودبحته”. 

هل من الطبيعي التعاطف مع المجرمين؟ 

صدق أو لا تصدق، فده أمر طبيعي. أيوة بالظبط، زي ما قريت، ده أمر طبيعي، ولكن ليه؟ ببساطة، لأن أغلب الناس بيحبوا قصص الجريمة زي سلسلة شارلوك هولمز، أو رجل المستحيل لنبيل فاروق، أو أجاثا كريستي، وغيرها كتير. 

شكلت الروايات دي علاقة عاطفية بين القراء والمجرمين، فبقى في دافع طبيعي جوانا لـ التعاطف مع المجرمين، حتى اللي مبيحبوش القراءة، فمن الممكن يكونوا شافوا أفلام ومسلسلات كتيرة بتتكلم عن ده. وفي أغلب الأوقات، بيحاول المخرج يخلينا نتعاطف مع المجرمين، وده اللي خلا بعض الناس تتعاطف مع سفاح الإسماعيلية. 

الخير والشر جوانا

الحقيقة إن الخير والشر جوانا، وفي كتير من الأوقات، بنميل للتعاطف مع الطرف الشرير، لأننا بنلاقي، في بعض الأوقات، الأفكار الشريرة بتيجي في دماغنا، حتى لو مقلنهاش، لكن احنا عارفين كويس انها جوانا، لكن الظروف المحيطة والقيم اللي بيؤمن بيها كل شخص، هي اللي بتجبره ياخد اتجاه الخير. 

انت نفسك، هتوصل في مرحلة ما من عمرك، لما تلاقي مجرم، هتبدأ تسأل: ايه اللي حصله عشان يعمل كده؟ أكيد في حاجه في ماضيه، خلته يعمل كده. هل عنده مشكلة نفسية؟ مش ممكن يكون الدافع ورا الجريمة منطقي؟ باختصار، احنا عارفين إن جوانا خير وشر، وإن دايمًا في حافز لأي جريمة بشعة، وده اللي بيخلي، بعضنا يتعاطف مع المجرمين. 

مصيره ايه؟

في أغلب الأحيان، أو من الطبيعي، إن الناس تتعاطف مع الضحية، لكن التعاطف مع الجاني، ممكن يبان غريب، لكن هو مش غريب، ليه؟ تخيل نفسك انك مجرم، وخلاص هيتم الحكم عليك، أيًا كان الحكم ايه. كتير مننا بيتخيل نفسه مكانه، وننسى اللي عمله، ونبدأ نركز على مصيره وعلى مصير عيلته.

وبالتالي، التفكير في مصير سفاح اسماعيلية، ومصير أهله، ودوافعه، بتخلي بعض الناس، تبدأ تفكر: طيب لو انا كنت مكانه كان هيحصل ايه؟ طيب هل كنت هعمل كده؟ والتفكير الكتير ده، بيكون نتيجته، التعاطف معاه لا إراديًا.

في النهاية، عايزين نقول، إن مفيش أي مبرر لجريمة الاسماعيلية، وإننا في المقال ده مش بنبرر للمجرم، اللي عمله، ولكن بنحاول نفهم أسباب تعاطف بعض الناس معاه، واللي هو، في نفس الوقت، شيء مش طبيعي، لأن اللي عمله جريمة بشعة، وتستحق العقوبة.

قولنا، في التعليقات، ليه بيتم التعاطف مع المجرمين؟

بعد رحلة علاج لمدة 8 شهور، استضافت الفنانة إسعاد يونس، في برنامجها “صاحبة السعادة”، الإعلامية إيمان الحصري، في أول ظهور ليها على شاشات التليفزيون، بعد ما عملت  7 عمليات جراحية في 21 يوم. تعالوا، في المقال ده، نتعرف على أبرز اللي قالته عن رحلة مرضها وعن مشاركتها في حفل طريق الكباش. 

رحلة مرضها

بدأت إيمان الحصري كلامها عن رحلة علاجها، بأن حياتها كانت طبيعية وكويسة، لكن فجأة حياتها اتشقلبت، وبعد ما كان مفترض تدخل تعمل عملية بسيطة وتطلع بعدها بيوم أو يومين، استمرت رحلة علاجها لمدة 8 شهور.

ولكن، ايه اللي حصل عشان رحلة علاجها تمتد لـ 8 شهور؟ حسب إيمان الحصري، فالمشكلة مكنتش في العملية، ولكن المشكلة كانت في الخطأ الطبي اللي حصل في العملية، والمشكلة الأكبر في الطريقة اللي تم التعامل بيها مع الخطأ الطبي أو على حسب وصف الدكاترة اللي تابعوا الحالة بعد كده، “المهزلة” اللي حصلت.

وأضافت، لو كان تم اتخاذ إجراءات صح، حتى مع الخطأ الطبي اللي حصل، كان ممكن متقعدش الفترة دي في المستشفى، ولكن النتيجة كانت إنها عملت سبع عمليات في 21 يوم. لك أن تتخيل، سبع مرات تنزل أوضة العمليات وتاخد بنج كلي، على أمل إن الحالة تتحسن، لكن اللي حصل إن الوضع كان بيسوء أكتر، فالنتيجة إن إيمان الحصري قعدت 8 شهور في العلاج. 

وبتحكي إيمان الحصري عن رحلة مرضها، إن في فترة معينة، مكنتش حاسة بحاجة خالص، كانت بين السما والأرض، لغاية في مرحلة من المراحل قعدت 3 شهور في المستشفى، منها شهر في العناية المركزة، وده بسبب إن حصل تسمم في الدم بسبب المشاكل الكتيرة والأخطاء اللي حصلت. 

“أنا خصلت كل حاجة معاها، ادعولها” – الطبيب المعالج. 

وأضافت: “الحالة على الورق كانت بايظة، كل حاجة مش موجودة، كل المؤشرات الحيوية لبقاء إنسان على قيد الحياة مش موجودة”. وعن وجودها في العناية المركزة، قالت: “كان عندي وقت كبير أقعد مع نفسي، احنا عايشين في نعم، كنت بحس الكلام ده قبل كده إنشائي، ولكن ده بجد”. 

طريق الكباش

وعن مشاركتها في حفل طريق الكباش، قالت إيمان: “كلموني وقالولي هتبقي معانا في حدث كبير، وعلى الرغم إني كنت فرحانة ومبسوطة، إلا إني كنت قلقانة وخايفة.. كنت خايفة من ردود أفعال الناس لأني لقيت الناس كلها فرحانة لي”.  

وأضافت: “يومها حسيت إن ربنا بيقولي في حاجة كويسة حصلت أحسن من حاجات كتير حصلت قبل كده.. انبسطت اني اشتركت في الحفلة، وانبسطت كمان بردود فعل الناس عن عودتي”. 

إيمان الحصري

تعتبر إيمان الحصري واحدة من أبرز الإعلاميات المصريات، اللي اشتغلوا في عدد من القنوات التليفزيونية منها التليفزيون المصري وقناة النيل وقناة المحور وقناة صدى البلد، وكذلك برنامج البيت بيتك. تم اختيارها من قبل رئاسة الجمهورية لتقديم المؤتمر الاقتصادي وافتتاح بعض المشاريع القومية زي افتتاح قناة السويس.

في النهاية، عايزين نقول، إن احنا افتقدنا إيمان الحصري في فترة الـ 8 شهور، اللي غابت فيهم، وكان عودتها في حفل طريق الكباش، وظهورها في قادرون باختلاف، ومع صاحبة السعادة، ليه أثر كبير على نفوس كل محبيها، اللي بيحبوا يشوفها دايمًا على شاشات التليفزيون.

بعد ظهورها من جديد على شاشات التليفزيون، افتقدناكِ الفترة اللي فاتت!

في خلال الأيام اللي فاتت، وبعد حلقة محمد صلاح مع عمرو أديب، وتصريح محمد صلاح عن الخمور، زاد الهجوم عليه، وكان مبرر الهجوم ده إن هو مقالش إنه مبيشربش خمور عشان هي حرام. والحقيقة، إن الأزمة دي بتفكرنا بأزمات تانية ظهرت قبل كده، بتبين أد ايه احنا مجتمع نرجسي!

محمد صلاح والخمور

في حوار محمد صلاح وعمرو أديب، كان الحوار كالتالي:

– عمرو أديب: في المجتمع الغربي، وانت في حفلة مثلًا وحد اجبرك تشرب كاس شمبانيا مثلًا أو واين، بتتغلب على ده ازاي مبتشربش واين، ازاي مبتشربش شامبين؟

– محمد صلاح: معرفش يعني بحس ان عمري مثلا نِفسي ما راحت لاني انا اشرب حاجة، حقيقي يعني السؤال نفسه مبفكرش فيه كتير.

بعد ما انتشر الحوار، لاحظنا هجوم كبير على محمد صلاح، البعض قال: “مكسوف تقول حرام يا منافق”، و”مقالش حرام عشان ميزعلش الكفار”، و”ناقص يكتبولك الكلام اللي بتقوله”، وغيرها من الحاجات، اللي احنا شايفين إن مفيش مبرر ليها. 

والحقيقة، إن الأزمة دي وأزمات مشابهة قبل كده، بتبين لنا أد ايه احنا مجتمع نرجسي، شايف نفسه هو بس اللي صح، وبعد ما بيطلع بالمشاهير زي محمد صلاح، السما، بينزله سابع أرض ويشتمه ويهينه ويقلل منه، طيب ايه هي اضطراب الشخصية النرجسية؟ 

اضطراب الشخصية النرجسية

يعتبر اضطراب الشخصية النرجسية نوع من أنواع اضطرابات الشخصية، وهي حالة نفسية بيصاب بيها المريض وبيكون عنده شعور مبالغ فيه بأهميته، ولكن خلف قناع الثقة بالمبالغ فيها دي، بيكون في ثقة (هشة) في نفسه.

ونتيجة اضطراب الشخصية النرجسية، بيكون في مشاكل في علاقات الشخص ده أو شغله أو مدرسته، وعادةً بيكون أصحاب الشخصية النرجسية مش مبسوطين في حياتهم، وعندهم إحباط لما محدش يهتم بيهم، ولاضطراب الشخصية النرجسية أعراض، زي:

– عنده شعور مبالغ بأهميته وأهمية رأيه.

– بيتوقع الاعتراف بأن رأيه هو الصح من غير أي دلالات.

– الاعتقاد بإنه متفوق وأحسن من غيره.

– عايز هو اللي يتكلم بس والناس تسمعه، لأن هو الصح.

– الغطرسة والغرور والتبجح.

طيب ايه علاقة ده بتصريح صلاح عن الخمور، ببساطة اضطراب الشخصية النرجسية، مش لازم يكون لأفراد بس، ممكن يحصل لشعوب أو جماعات، أو مناطق معينة، تبقى شايفة نفسها هي بس اللي صح، وأي حد عنده رأي مخالف، يبقى غلط، وده يخلينا نتكلم بشكل أعمق عن المجتمعات النرجسية. 

المجتمعات النرجسية

زي ما قلنا، النرجسية مش مرض ممكن يصيب أفراد بس، ولكن من الممكن يصيب مجتمعات، ويكون جزء من ثقافة الشعب ده، وهي شيء منتشر وموجود حوالينا، على سبيل المثال، المجتمع النرجسي بيكون شايف إن هو بس اللي صح، والمجتمعات اللي مبتعملش زيهم تبقى غلط.

وبتكون شايفة إن أي شخص مبيقولش الحاجة اللي هم عايزنها يبقى غلطان ومنافق، واللي مبيعملش زيهم يبقى مجرم. وفي حالة محمد صلاح، على الرغم من إن دار الإفتاء المصرية طلعت بيان، قالت فيه إن “عدم التفكير في إتيان الأشياء المحرمة عبادة في حد ذاته”، إلا إن الهجوم استمر  مش بس على محمد صلاح، ولكن على دار الإفتاء نفسها، واعتبارها مؤسسة منافقة!! 

للأسف المجتمعات النرجسية، بتكون مجتمعات متحفزة بطبعها مستنية أي غلطة من أي شخص، عشان تشتمه وتقول عليه مجرم ومنافق، وبتكون زي “سياسية القطيع”، لما حد يقول حاجة معينة، هتلاقي إن آلاف بيرددوا وراه نفس الكلام.

في النهاية، عايزين نقول، إن حالة صلاح، هي مثال على أد ايه مجتمعنا مجتمع نرجسي، بيحاول تصيد الأخطاء للآخرين، ولما يكتشف إن حد بيفكر أو يعمل حاجة تتعارض مع وجهة نظره أو طريقته في الحياة، بيحطه على حبل المشنقة، وكأنه عمل جريمة.

قولنا، في التعليقات هل احنا مجتمع نرجسي فعلًا؟

يعتبر محمد صلاح واحد من أيقونات الكرة المصرية والعربية بشكل عام، وده بعد اللي قدمه من مستويات رائعة، في الملابع الإنجليزية، بعد انضمامه لنادي ليفربول. وخلال الساعات اللي فاتت، انتشر لقاء محمد صلاح مع عمرو أديب، وفي التقرير ده، هنتكلم عن أبرز التصريحات اللي اتكلم عنها الفرعون المصري.  

الأهلي والزمالك

في لقائه مع عمرو أديب، اتكلم محمد صلاح عن مباراة القمة الأخيرة بين الأهلي والزمالك، واللي انتهت لصالح الأهلي بنتيجة 5 -3، وقال: “ممكن جماهير الأهلي تزعل مني، لكن النتيجة في الآخر 5-3 (فرق هدفين)”. وقال: “الجمهور كان شايفها نتيجة كبيرة، لكن المباراة في النهاية خلصت فرق هدفين مش 5 دون مقابل”. 

الخمور

أكد محمد صلاح خلال مقابلته مع عمرو أديب، إنه مفكرش يشرب أي خمور من بداية لعبه في أوروبا، وقال: “مشربتش خمور طول عمري ومبفكرش في الموضوع ده، ومبيجيش في بالي أبدًا إني عايز أعمل كده، أو حتى إني أجربه”. وده اللي خلا بعض الناس تتكلم عن الموضوع على السوشيال ميديا، لأنه متتطرقش للرأي الديني أو الفقهي في الخمور. 

ساديو ماني

بالإضافة لده، اتكلم محمد صلاح عن علاقته بـ ساديو ماني، زميله في ليفربول، وأكد أن علاقتهم قايمة على الاحتراف. وقال: “كل واحد فينا بيبذل قصارى جهده عشان مصلحة الفريق، وأحيانًا بيكون في تنافس على مين الأفضل، وده طبيعي، المهم إن كل واحد مننا بيشتغل عشان خدمة النادي”. 

وبخصوص الأنانية، رد وقال: “مفيش لاعب هيحط مصلحته قبل مصلحة الفريق، وبنسبة كبيرة هو مبيتعمدش يعمل ده وأنا كذلك، وفي نفس الوقت كان في حساسية في موقف قبل كده، والبعض لسه بيتكلم عن الموقف ده”.

وعن الموقف قال: “لما اعترض ماني وقت استبداله في مباراة من المباريات، بدأ البعض يربط بين اعتراضه وبين إن مفيش تعاون بينا، ومن وقتها أي كرة مبمررهاش له، الناس بتتكلم عن الموقف ده، والعكس”. وأضاف: “علاقتي بماني، خارج الملعب، كويسة، وقايمة على الاحترام، ومحصلش بيننا أي مشاكل”. 

يورجن كلوب

في لقاء محمد صلاح مع عمرو أديب، قال إن علاقته مع مدربه يورجن كلوب، علاقة جيدة، وإنه من أول ما انتقل لليفربول، وهو بيساعده على أنه يقدم أفضل أداء عنده، وإنه بيحاول يظهر في أفضل صورة ممكنة، وإن علاقتهم كويسة جدًا وقايمة على الاحتراف. 

المدرب في مصر وانجلترا

وعن الفارق بين التعامل مع المدرب في مصر وإنجلترا قال: “في مصر المدرب له سلطة أكبر من أي لاعب، وده مش معناه إن اللاعب له سلطة أعلى من المدرب في إنجلترا، ولكن في مناقشة المدرب عن بعض الحاجات زي سبب عدم اللعب.

وأضاف: “في بداية الاحتراف كان عندي مشكلة اني اروح اتكلم مع المدرب، لأن في مصر مينفعش تسأل المدرب عن عدم لعبك، لأن ببساطة لو اعترضت، ممكن متلعبش مرة تانية مع الفريق”.

مشروعه

وفي لقائه مع عمرو أديب، اتكلم الفرعون المصري عن مشروع جديد، يستعد لتأسيسه في مصر، وأعلن إنه هيكون صالة ألعاب بدنية، وقال: “الشعب المصري محتاج للي يساعده يكون على الطريق الصحيح. احنا عندنا مواهب كتيرة محتاجة مساعدة”. 

التحكيم المصري

وفي سياق تاني، اتكلم صلاح إن إدارتي الأهلي والزمالك بيضغطوا على الحكام في البطولات، واللي بالتالي بيأثر على التحكيم ويظلم الحكم المصري. وأضاف: “الحكام في مصر مظلومين، لأن في تقنية الفيديو اللي مبتسمحش بمرور الأخطاء الكبيرة من غير مراجعة، وإن لازم اتحاد الكرة ولجنة التحكيم يتدخلوا عشان حماية الحكام والدفاع عنهم”.

برشلونة

كذلك، علق محمد صلاح، نجم ليفربول الإنجليزي ومنتخب مصر، على اهتمام برشلونة بالتعاقد معاه، وأعرب عن سعادته بده، رغم الظروف الصعبة، اللي بيمر بيها النادي، وقال: “أنا سعيد في ليفربول، ومحدش يعرف ايه اللي هيحصل في المستقبل”.

قولنا، في التعليقات، ايه رأيك في تصريح محمد صلاح عن الخمور؟