في لقاء الفنان أحمد السقا، مع الإعلامي أنس بوخش، في برنامج “آيه بي تولكس”، اتكلم عن الاكتئاب، ووجه نصيحته لأي حد بيعاني من الاكتئاب، وقال: “نصيحتي للي عنده اكتئاب، لما يجيلك اكتئاب، بص في المراية واضرب نفسك بالقلم وقول لأ انا عندي ولسه هعمل وهتفوق وهفوز على الاكتئاب”.
والحقيقة، إن الكلام اللي قاله أحمد السقا، هو من المفاهيم المغلوطة اللي بتتقال عن الاكتئاب، باعتباره تغير في المزاج بس، أو حزن، وده مش صحيح، لأن الاكتئاب زيه زي أي مرض في الدنيا، وانك تدي نفسك بالقلم مش علاج للاكتئاب. في المقال ده، هنتكلم عن 5 حاجات لازم نعرفها عن الاكتئاب، بعد تصريح أحمد السقا.
الاكتئاب مش حزن
زي ما قلنا، فمن الشائع وسط الناس، إن الاكتئاب هو عبارة عن تغير في المزاج أو حزن، وده مش صحيح. على الرغم إن بعض المواقف الحزينة، ممكن تأثر على نفسية الشخص وتسبب له اكتئاب، إلا إن التعامل مع الاكتئاب على أنه مجرد حزن، مش هيعالجه.
وعليه، من الضروري لو حسيت ببعض أعراض الاكتئاب، زي الأفكار الانتحارية وتقلبات النوم وتقلبات الأكل والإرهاق وفقدان الثقة بالنفس وغيرها من الأعراض، لازم تروح لأقرب دكتور نفسي، عشان يساعدك تتخطى المرحلة دي.
الاكتئاب زي أي مرض
وتكملة للنقطة اللي فاتت، حابين نقول، إن الاكتئاب زيه زي أي مرض، ممكن يصاب بيه الإنسان. وبالتالي، لو حسيت بأعراض الاكتئاب من المهم انك تروح لدكتور نفسي، زي لما تعاني من مشاكل في التنفس، هتروح لدكتور الصدر، فلو عانيت من الاكتئاب، من المفترض تروح للدكتور.
الاكتئاب ليه علاج
للأسف، في الفترة الأخيرة، بدأ بعض الناس تتكلم إن الاكتئاب هو مرض بنعاني منه مدى الحياة، وملوش علاج، ولازم نتأقلم مع الاكتئاب. لكن، اللي حابين نقوله، وهو تكملة للنقطة اللي فاتت، بما أن الاكتئاب هو مرض زي أي مرض، فبالتالي ليه علاج.
وهنا، لازم نقول حاجة مهمة، مش معنى إن ليه علاج إننا نبدأ ناخد أدوية من نفسنا، لأن في دكاترة هم متخصصين في تشخيص الحالة، وتحديد ايه اللي مناسب ليها، وايه اللي مش مناسب. وبالتالي، لو حسيت بأي أعراض من الاكتئاب، لازم تتوجه لأقرب دكتور نفسي عشان يساعدك.
اتكلم عن الاكتئاب
كمان، من المفاهيم المغلوطة الشائعة عن الاكتئاب، هي إنك لو اتكلمت عن الاكتئاب، فالاكتئاب هيزيد حدته، وللأسف، ده بيخلي بعض الناس تكتم مشاعرها، ومرضها، واللي ممكن تكون نتايجه مش كويسة، زي إنك تأذي نفسك، أو تنتحر.
لو حسيت بأي أعراض للاكتئاب، من الضروري تتكلم مع حد تثق بيه عن اللي بتعاني منه، ولازم تروح لأقرب دكتور نفسي، عشان تتكلم معاه عن اللي بتعانيه. لأن، إنك تخبي معاناتك بالاكتئاب، ده مش حل، ومش هيساعد في شفائك.
الدكتور النفسي مش عيب
آخر حاجة لازم نعرفها بعد تصريح أحمد السقا عن الاكتئاب، هو إنك تروح لدكتور نفسي ده مش عيب. للأسف، في كتير من الناس بتعتبر إنك تروح لدكتور نفسي، هو وصمة عار، ومعناها انك مجنون؛ ده مش صحيح. الدكتور النفسي زيه زي أي دكتور، زيه زي دكتور الباطنة والصدر.
كمان، من المفاهيم المغلوطة، إنك تدخل مصحة نفسية، فانت كده دخلت “مستشفى المجانين”، وده غلط تمامًا، لأن المصحة النفسية، هي مستشفى متخصصة في علاج الأمراض النفسية، ودخولك المصحة النفسية مش وصمة عار. فلا تخجل أبدًا لو دخلت مصحة نفسية.
في النهاية، عايزين نؤكد على أكتر نقطة، أهمها إن الكلام اللي قاله أحمد السقا، غير صحيح، ومش هو ده العلاج للاكتئاب، لأن الاكتئاب مش حزن، وزيه زي أي مرض، له علاج. وأهم حاجة، اتكلم عن الاكتئاب، ووعي الناس اللي حواليك، بأنهم لو عانوا من أعراض الاكتئاب، لازم يروحوا لدكتور نفسي.
