بعد طلاقهم من زواج استمر لـ 20 سنة، جمع برنامج “بصراحة مع”، اللي بيعرض على قناة “إم بي سي”، غادة عادل ومجدي الهواري، وتصدر الترند على مواقع التواصل الاجتماعي، لأنه يعتبر من المرات القليلة، اللي بيتم جمع اتنين مطلقين، يتكلموا عن قصة انفصالهم وأسباب الطلاق.
الحقيقة، إن لقاء غادة عادل ومجدي الهواري، خلانا نفكر في سؤال مهم: هل مهم اننا نتكلم بعد الانفصال؟ ولو اتكلمنا، ليه ده مفيد؟ تعالوا نشوف في المقال ده، ليه بنحتاج نتكلم بصراحة بعد الانفصال؟
غادة عادل ومجدي الهواري
في لقاء غادة عادل ومجدي الهواري، صرحت غادة إن في عائلات كتير بتتأثر بالطلاق بس هي شايفة إن الطلاق فادهم كويس وفاد أولادهم. وأضافت: “بقينا نحترم آراء بعض.. انت كنت طول الوقت حاسس أنك أب لينا وانا مكنتش عارفة اتعامل مع الأولاد.. كنت مكبوتة ومش عارفة أعبر عن اللي جوايا والأولاد كانوا بيشوفونا بنتخانق كتير”.
ورد مجدي إن في حاجات صعبة حصلت ميقدرش ينكر، لكن هو اعتبرها بنته وخد على عاتقه إنه يفهمها الحياة. وأضاف: “احنا اتجوزنا صغيرين.. فأنا لو ابني جه قالي عاوز اتجوز هقوله “لا” لأن بتحصل تغييرات في الشخصية فلازم أكون في سن الشخص اللي قدامي.. احنا قصة حياتنا مفشلتش.. احنا فضلنا متجوزين لمدة 20 سنة”.
وعليه، اللي نقدر نستفيد بيه من المحادثة دي، أو جلسة الصراحة دي، هو أننا لما نتكلم مع شريكنا السابق بنفهم نفسنا أكتر، وبنفهم أسباب أفعالنا، وأفعال اللي قدامنا. والحقيقة، إن لقاء غادة عادل ومجدي الهواري، كان أكتر من راقي، وحقيقي استفدنا كتير من اللقاء. وأكتر حاجة استفدنا منها هو إننا لازم نقعد نتكلم بعد الانفصال، تعالوا نشوف ليه!
تجربة
تجربة الزواج، بالتأكيد، كانت تجربة مهمة جدًا في حياتنا، ولو متكلمناش، مش هنستفاد الاستفادة الكاملة من التجربة، واللي هي إننا نفهم نفسنا بشكل أكبر. احنا عايزين نقول، إن كل تجربة في حياتنا، بتساهم بشكل كبير في بناء شخصيتنا، وبما إن تجربة الجواز تجربة مهمة، فبالتأكيد هي ساهمت في بناء شخصيتنا بشكل أو بآخر.
وعليه، فشخصيتنا اللي بدأنا بيها حياتنا الزوجية هتكون مختلفة عن شخصيتنا بعد انتهاء العلاقة، ونقدر نعرف ده، من خلال كلامنا مع شريكنا السابق، اللي هيخلينا نفهم نفسنا بشكل أكبر. كمان، هنقدر نفهم أسباب تصرفات الشريك، وليه ده حصل؟ وده اللي هيخلينا نستفيد من التجربة، وهيخلينا أنضج في العلاقة اللي بعدها.
نكتشف عيوبنا
في الحقيقة، إن لما ينفصل الشريكان، ويقعدوا يتكلموا باحترام ورقي عن علاقتهم، هو شيء في منتهى التحضر، وبيخلي كل طرف يكتشف عيوبه بعيون الطرف التاني. والسؤال دلوقتي، ما ممكن نكون متجوزين ونتكلم مع بعض! نتفق معاك، لكن وقت الانفصال، مفيش شيء حد يخبيه، لأن خلاص العلاقة انتهت.
في لقاء غادة عادل ومجدي الهواري، هم اتكلموا بشكل كبير عن أسباب الانفصال، وكل واحد كان بيتضايق من الطرف التاني في ايه، وده اللي هيخلي كل طرف يعيد حساباته، في تصرفاته، وده اللي هيخليه أكثر نضجًا في أي علاقة بعد كده، لأنه استفادة الاستفادة الكاملة من تجربة الزواج والطلاق.
نصلح من نفسنا
زي ما اتكلمنا إن من الفوائد الرئيسية لكلام الشريكين بعد الانفصال هو إننا نكتشف من عيوبنا، فمن المهم نقول إن من فوائد الكلام بعد العلاقة، هو إن كل طرف يبدأ يصلح من نفسه، من وجهة نظره، وبناء على مدى اقتناعه بالحاجات اللي قالها الشريك السابق.
كمان، عايزين نقول، إن تجربة الزواج والطلاق، هي تجربة مهمة، يقدر يستفاد منها كل طرف، بأنه يصلح من نفسه، لأن معظم الوقت، بيبقى كل طرف شايف نفسه هو بس اللي صح، وبيتغافل عن مشاعر وأحاسيس الطرف التاني، ولقاء ما بعد الطلاق، هيخلي كل واحد يبدأ يشوف نفسه من بعيد، وده اللي هيساعده يكتشف عيوبه ويصلح من نفسه.
في النهاية، عايزين نقول، أد ايه احنا مبسوطين بلقاء غادة عادل ومجدي الهواري، لأنهم فعلًا مثال جيد، لكل حد انفصل عن شريك حياته، لأنهم بينوا لينا، أننا ممكن نقعد مع الشريك بعد الانفصال، عشان نفهم نفسنا بشكل أكبر، وعشان نكتشف عيوبنا ونصلح من نفسنا.
