في 2021، قدرت المسلسلات المصرية إنها تتناول قضايا العنف ضد المرأة بشكل كبير، وده من خلال عدد كبير من المسلسلات، منها اللي اتكلم عن الاغتصاب ومنها اللي اتكلم عن التحرش الجنسي ومنها اللي اتكلم عن الابتزاز. في التقرير ده هنتكلم عن 6 مسلسلات مصرية تناولت العنف ضد المرأة في 2021.
نسل الأغراب – الزواج المبكر
يعتبر مسلسل “نسل الأغراب” بطولة أحمد السقا وأمير كرارة ومي عمر، من أهم المسلسلات اللي اتكلمت عن فكرة “الزواج المبكر“، واللي قدم رسالة واضحة وصريحة، عن النتايج اللي بتترتب عن الزواج المبكر، ومن أهمها المشاكل النفسية اللي بتعاني منها المرأة بعد زواجها مبكرًا.
في المسلسل، بنلاقي طفلة عندها 13 سنة بتتجوز، وبنشوف ازاي جوازها وإنها تخلف طفلين، في السن ده، تسبب لها في مشاكل نفسية مقدرتش تتخلص منها بسهولة. كمان، “نسل الأغراب” سلط الضوء على العنف ضد الزوجة بدافع الغيرة والاتهام الزوج للزوجة بالخيانة.
الطاووس – الاغتصاب
يعتبر مسلسل الطاووس بطولة جمال سليمان وسميحة أيوب وسهر الصايغ ورانيا محمود ياسين، واللي تم عرضه في رمضان 2021، من أكتر المسلسلات اللي قدرت تتناول قضية العنف ضد المرأة بشكل كبير، وده من خلال تناول قضية الاغتصاب.
وكان مسلسل “الطاووس” تصدر التريند أثناء عرضه، وده بعد مشهد الاغتصاب، اللي أثار الجدل وقتها، وأعلن وقتها المجلس الأعلى لتنظيم الإعلام فتح تحقيق مع صناع المسلسل والقنوات اللي عرضته وقتها، وعلى الرغم من كل ده إلا إننا نقدر نقول إن مسلسل الطاووس، قدر يتناول قضية الاغتصاب بطريقة جيدة.
لعبة نيوتن – الاغتصاب الزوجي
وفي 2021، تصدرت قضية الاغتصاب الزوجي التريند، بعد ما أثارها مسلسل “لعبة نيوتن” من بطولة منى زكي ومحمد ممدوح ومحمد فراج وسيد رجب. يعتبر مسلسل لعبة نيوتن من المسلسلات القلائل، اللي قدرت تثير قضية مسكوت عنها، في البيوت الزوجية، وهي الاغتصاب الزوجي.
في أحد المشاهد، يظهر “مؤنس” بيحاول إجبار “هنا”، على ممارسة العلاقة الزوجية بالإكراه، من غير ما تكون جاهزة نفسيًا أو جسديًا، ورغم رفضها، إلا أن مؤنس حاول فرض سيطرته وعاملها بقسوة، وضربها بالقلم على وشها. أثار المشهد قضية مهمة، وهي قضية الاغتصاب الزوجي، اللي بتغفل عنه كتير من الستات، على اعتقاد أن للرجل حق في إقامة علاقة معها في أي وقت عايزينه.
لحم غزال – الابتزاز الزوجي
من أكتر المسلسلات اللي قدرت تتناول قضية العنف ضد المرأة والابتزاز الزوجي بشكل جيد، كان مسلسل “لحم غزال” من بطولة غادة عبد الرازق وشريف سلامة ووفاء عامر ومي سليم وأحمد خليل وعمرو عبد الجليل، واللي تم عرضه في رمضان 2021.
مسلسل “لحم غزال” اتكلم عن زوجة بتعيش مع جوزها، اللي مبينفقش عليها، ومبيلبيش احتياجات بنته، ولما تقرر الانفصال بيصورها “عارية” وبيهددها، ويعتدي عليها بالضرب. وعليه، فمسلسل “لحم غزال” قدر يتناول أكتر من قضية منها الابتزاز الزوجي والعنف المنزلي، وكمان الزواج المبكر، وده اللي بيخليه واحد من أهم المسلسلات اللي تناولت العنف ضد المرأة في 2021.
ضد الكسر – التحرش والخيانة الزوجية
كمان، منقدرش نتكلم عن مسلسلات مصرية تناولت العنف ضد المرأة، ومنتكلمش عن مسلسل “ضد الكسر”، واللي كان من بطولة نيللي كريم ومحمد فراج ولقاء الخميسي ومصطفى درويش وتارا عماد. مسلسل “ضد الكسر” اتكلم عن التحرش، من خلال شخصية نيللي كريم، اللي بتتعرض للتحرش من صديق جوزها، فبيقوم جوزها بضربها واتهمها بأنها سمحت له بده.
كمان، مسلسل “ضد الكسر” اتكلم عن الخيانة، فبنلاقي الرجل اللي بيخون مراته، وبنلاقي الزوجة اللي بتخون جوزها، للدرجة اللي بتولد فيه طفل مش طفله، وتقنعه بأنه أبوه. عشان كده، كان من المهم إننا نتكلم عن مسلسل “ضد الكسر” باعتباره قدر يتكلم عن أكتر من قضية تخص العنف ضد المرأة.
إلا أنا “بدون ضمان” – العنف الزوجي
تعتبر حكاية “بدون ضمان” من مسلسل “إلا أنا” واحدة من أهم الحكايات، اللي تناولت العنف الزوجي، في 2021. في أحد المشاهد، من حكاية “بدون ضمان”، بيظهر لينا زوج بيضرب مراته “الحامل”، وده تسبب في إثارة ضجة كبيرة على مواقع التواصل الاجتماعي، وقتها.
في حكاية “بدون ضمان”، بيظهر لينا الزوج اللي بيعتدي على مراته ويجبرها على إنها تمضي ورقة تنازل عن كافة حقوقها مقابل الطلاق، وده اللي أدى لغضب كبير من البنات على مواقع التواصل الاجتماعي، واتفتح الباب لمناقشة تشريعات لحماية الزوجة من العنف ضدها.
في النهاية، عايزين نقول، إن كان من المهم في سنة 2021، إن يكون في أعمال بتتناول العنف ضد المرأة، باعتبارها قضية، بتعاني منها الستات في المجتمع المصري، واحنا بنعتبر دي خطوة جيدة، للقضاء على العنف ضد المرأة، باعتبار إن وجود فن بيتناول القضايا اللي بتمس المجتمع، شيء ضروري.
