مع نهاية 2021، أكيد كلنا مستنيين السنة الجديد، يا ترى هنشوف فيها أفلام ايه! وعلى الرغم إن في بعض الأفلام مش من الواضح هل هتنزل السنة الجاية ولا لأ، بس احنا حاولنا في التقرير ده نشوف ايه الأفلام المتوقع نزولها في 2022، وجمعنا ليكم 5 أفلام مصرية هنستناها كلنا في 2022.
العنكبوت
بعد ما تم تأجيل عرضه أكتر من مرة، قررت الشركة المنتجة طرح الفيلم في السينمات، في 2022. وفيلم العنكبوت من بطولة أحمد السقا ومنى زكي وظافر عابدين ويسرا اللوزي، وهو من إخراج أحمد نادر جلال، وتأليف محمد ناير.
يعتبر فيلم “العنكبوت” من أفلام الأكشن والإثارة المنتظرة في 2022، وفيها السقا بيواجه رجال المافيا بسبب أفعال شقيقه “ظافر عابدين” غير المشروعة. ويعتبر الفيلم تجربة سينمائية مختلفة للسقا، اللي بيظهر في أكتر من مشهد بالقناع وعلى رقبته، تاتو على شكل عنكبوت.
الجريمة
بعد ما كان مقرر عرضه في 29 ديسمبر 2021، قررت الشركة المنتجة تأجيل عرضه لعام 2022، وده بسبب وجودة منافسة شديدة في السينما في ظل وجود أفلام سبايدر مان وماتريكس، واللي تتخطى ميزانيتهم ملايين الدولارات.
فيلم “الجريمة” من بطولة أحمد عز ومنة شلبي وماجد الكدواني وحجاج عبد العظيم، ومن إخراج شريف عرفة. حسب موقع السينما، فيلم “الجريمة” تدور أحداثه في إطار من الجريمة والأكشن، واللي فيها بيهرب مجرم خطير من مصحة نفسية، وبيتم اكتشاف مدى تورطه في جرايم تانية.
قمر 14
بعد ما أشاد بيه الجمهور والنقاد، في عرضه الأول بمهرجان الجونة السينمائي، قرر صناع فيلم “قمر 14” تأجيل طرحه في السينمات لعام 2022، ومن المتوقع أن يتم عرضه في موسم نصف السنة بدلًا من 29 ديسمبر الجاي. يشارك في بطولة الفيلم خالد النبوي وغادة عادل وشيرين رضا وأحمد الفيشاوي.
تدور أحداث فيلم “قمر 14” في إطار درامي، فبنشوف في ليلة 14، وتحت ضوء قمر 14، عدد من العلاقات العاطفية، بيصطدم فيها أصحابها بمحظورات مختلفة بيفرضها عليهم المجتمع، وتتسبب المحظورات دي في إعاقة العلاقات وتهددها بالفشل.
مهمة مش مهمة
أما رابع فيلم على قايمتنا هو فيلم “مهمة مش مهمة”، اللي بيشارك فيه نجوم من مصر والسعودية، على رأسهم بيومي فؤاد وأحمد فتحي وهالة فاخر ومن السعودية عبد المجيد الزهيري ولمار. وعلى الرغم من أن مواعيد العرض، مش واضحة، إلا أن حسب “المصري اليوم“، من المقرر عرض الفيلم في 5 يناير المقبل.
تدور أحداث فيلم “مهمة مش مهمة” في إطار كوميدي، ويحكي عن قصة شاب سعودي، والدته مصرية ووالده سعودي، ومعندوش اخوات، وعنده حلم إنه يكون واحد من أكبر “سائقي السيارات” في العالم، وبنكتشف من خلال أحداث الفيلم، إن على الرغم من تقدمه في العمر، إلا أن عنده شخصية طفولية وطائش أحيانًا، إلا أنه ذكي.
تماسيح النيل
وأخيرًا، من المقرر عرض فيلم “تماسيح النيل” يوم 26 يناير الجاي، للمنافسة في موسم إجازة نصف السنة، وهو من بطولة مصطفى خاطر وحمدي المرغني وخالد الصاوي، ومن تأليف لؤي السيد وإخراج سامح عبد العزيز، وتدور أحداثه في إطار كوميدي.
فيلم “تماسيح النيل” بيتكلم عن مصطفى خاطر وحمدي الميرغني، اللي بيحاولوا ينصبوا على خالد الصاوي، اللي بيمثل دور حد غني، وده أثناء رحلته في النيل. وكان تم تصوير معظم المشاهد على مركب في أسوان، وبعض المشاهد التانية في مدينة الأقصر.
في النهاية، على الرغم إن مش من الواضح مواعيد عرض الأفلام دي، بسبب تضارب التصريحات، إلا إن اللي نقدر نأكده، إن احنا شفنا في 2021، أفلام مصرية اعتبرناها نقلة في السينما زي فيلم موسى وماكو، فمن المتوقع إننا نشوف في 2022، أفلام هنستمتع بيها وهتضيف للسينما المصرية.
