هل بتخطط تسافر الإجازة اللي جاية؟ لو بتخطط لده، فلازم تختار الصحبة الصح، اللي تساعدك تستمتع بوقتك، ومتخلكش تزهق أو تضايق. في مقولة بتقول: “لو عايز تخسر صاحبك، سافر معاه”، على الرغم إننا مش متفقين مع المقولة دي بشكل كامل، إلا إن من المهم إنك تختار الناس اللي هتسافر معاهم كويس. في المقال ده، قررنا نتكلم عن أشخاص مينفعش تسافر معاهم، ممكن تلاقي نفسك من الشخصيات دي، وعايزينك متاخدش ده بشكل سلبي، ده مجرد مقال رأي، وممكن يكون صح أو غلط، تعالوا نشوف مين هم الأشخاص دول!
متقلبي المزاج
أول ناس على قايمتنا، واللي يُفضل إنك متسافرش معاهم، هم الناس اللي مزاجها متقلب باستمرار، ساعات تلاقيه مبسوط وطاير من الفرحة، وفجأة تلاقيه قلب “دراما كوين” ومش طايق نفسه. لو انت بتخطط إنك تفصل من مشاكل الدنيا، وتنبسط، فالناس دي ممكن تضايقك، وتخليك في لحظة، مهموم بهموم الدنيا كلها.
المنغلقين
في كتير من الأوقات، بيكون الهدف من السفر، إنك تشوف ناس جديدة، وتتعرف على أصدقاء جداد، وتجرب حاجات مختلفة. عشان كده، من أسوأ الشخصيات اللي ممكن تسافر معاهم، هم الناس المنغلقين واللي مبيحبوش يتعرفوا على حد، أو يجربوا حاجات جديدة، لأن دول هيمنعوك من هدفك الرئيسي من السفر.
الناس العنيفة
خلينا متفقين إن مصاحبة الناس العنيفة، اللي بتحب تتخانق مع أي حد، من أسوأ الحاجات اللي ممكن تحصل للواحد، سواء في السفر أو في أي حاجة. عشان كده، احنا بنوصي إنك متسافرش مع حد بيحب الخناق، لكن ليه؟
أي مكان هتسافره، بالتأكيد له عاداته وتقاليده، ومن الطبيعي لما تسافر، مش هتلاقي كل حاجة عجباك، والطبيعي إنك هتحتك بناس كتير، فلازم تكون عارف تتعامل مع الاختلافات الثقافية، عشان كده وجود حد عصبي، وبيحب الخناق، هيخليك مش عارف تستمتع بسفرك.
الناس اللي بتحب النوم
لو انت من النوع اللي بيحب الحركة، وإنه يقعد طول الرحلة، بيعمل ويجرب حاجات جديدة، فبالتأكيد مش هتحب يكون معاك حد بيحب النوم أكتر من عينيه، لأن ده هيمنعك من إنك تستمتع بتجربة السفر كاملة. تخيل معايا، بتقول للي معاك عايزين نخرج بليل، نجرب نعمل كذا، فيكون رده: “لأ، انا هنام”، ده ممكن يخليك محبط، وتقرر تنام زيه وخلاص.
أبو العُريف
في مصطلح كده معروف في مصر، وهو “أبو العُريف”، وتعريفه هو الشخص اللي عامل نفسه يعرف كل حاجة في الدنيا، وده يعتبر الشخص رقم 5، من أشخاص مينفعش تسافر معاهم، طيب ليه؟ لأن ببساطة، ممكن يخليك تعمل مصايب، لأن هو بيفتي كتير.
الناس اللي مبتعرفش تصور
آخر شخص بننصح متسافرش معاه، خاصةً لو انت بتحب التصوير كتير، هو الشخص اللي مبيعرفش يصور كويس. في كتير من الأوقات، لو سافرت مكان في مناظر حلوة كتير، هتحب إنك تاخد صور، عشان توثق اللحظات دي كويس، عشان كده، هيبقى أسوأ حظ بالنسبة لك، لو سافرت مع حد مبيعرفش يصور، لأنه هيفوت عليك صور حلوة كتير.
في النهاية، عايزين نقول، في الأول وفي الآخر، دي الصحبة اللي انت هتحب تسافر معاها، وزي ما بيقولوا الرفيق قبل الطريق، عشان كده من المهم إنك تختار الصحبة، اللي تتناسب مع شخصيتك وطبيعتك، عشان متحسش بأي ضغط أو ضيق، لأنك بالتأكيد مسافر عشان تستمتع بوقتك وتنبسط.
