في طفولتنا، وخاصةً لجيل التمانينات والتسعينات، كان في برامج تلفزيونية هي اللي شكلت ذكرياتنا وأفكارنا، وبرغم إن مرت سنين كتير على البرامج دي، إلا إن لحد دلوقتي، منقدرش ننساها.
هل نقدر ننسى نادي السينما أو تاكسي السهرة أو حديث المدينة؟ بالتأكيد مش هنقدر ننساهم، عشان كده، في المقال ده هنتكلم عن 10 من أشهر البرامج التلفزيونية اللي شكلت طفولتنا.
هالة شو
يعتبر برنامج هالة شو من أشهر البرامج التلفزيونية اللي اتربينا عليها في طفولتنا، منقدرش ننسى لقائات هالة سرحان بالفنانين، والأسئلة اللي كانت بتسألها، واللي في كتير من الأحيان، كانت غير متوقعة ومحرجة في نفس الوقت. عشان كده، منقدرش نتكلم على برامج تلفزيونية شكلت طفولتنا من غير ما نتكلم عن هالة شو.
من سيربح (المليون والبونبون)
يعتبر برنامج “من سيربح المليون” لجورج قرداحي و”من سيربح البونبون” لأحمد حلمي، من أشهر البرامج التلفزيونية، اللي شكلت طفولة كتير من جيل التمانينات والتسعينات. فكان البرنامج الأول، هو البرنامج اللي من خلاله اكتسبنا معلومات كتير كانت جديدة علينا، وكان التاني، مساحة الضحك، اللي شكلت جزء كبير من طفولتنا.
زكية زكريا وحسين ع الهوا واديني عقلك
برامج المقالب شكلت جزء كبير من طفولتنا، منقدرش ننسى مقالب حسين الإمام مع الفنانين في حسين ع الهوا، أو برامج “ابراهيم نصر” وخاصةً زكية زكريا، ولو جيت سمعت موسيقى اديني عقلك، هتعرف البرنامج، من غير حتى ما تعرف إسم البرنامج، وده بيبين أد ايه البرامج دي أثرت فينا كأطفال.
بين الناس
“الخيط الأبيض من الأسود لازم هيبان”، دي جزء من مقدمة برنامج “بين الناس” لجمال الشاعر، واللي كان يعتبر من أهم البرامج اللي كانت بتناقش المشاكل المجتمعية. برنامج بين الناس كان بيتجمع حواليه العيلة كلها، عشان تتابع ايه القضية اللي هيثيرها البرنامج في الحلقة. لو هنتكلم عن 10 برامج تلفزيونية شكلت طفولتنا، مينفعش ننسى “بين الناس”.
كلام من دهب
“كان الكلام من فضة دلوقتى أصبح دهب، جاوب معانا اليوم ده هتلاقى عجب العجب”. لو هنتكلم عن برنامج “كلام من دهب” لطارق علام، فأول حاجة هتيجي على بالنا هي تتر البرنامج. في الطفولة، كلنا حلمنا نقابل “طارق علام” عشان نقدر نكسب دهب، فكان طارق علام بالنسبة زي المارد اللي هيحقق أحلامنا كلها. برنامج مش هنقدر ننساه أبدًا.
نادي السينما وتاكسي السهرة
ولو هنتكلم عن البرامج الفنية اللي شكلت طفولتنا، منقدرش ننسى برنامج نادي السينما، واللي كان بيقدمه د. درية شرف الدين، واللي كان بيعرض، في سهرة كل سبت، فيلم أمريكي واخد جايزة من الجوايز، وكان بيتم تحليل الفيلم بعد ما يخلص بشكل يوضح معناه أكتر.
كمان، من البرامج الفنية اللي منقدرش ننساها، برنامج تاكسي السهرة، واللي كنا من خلاله بنعرف ايه أهم الأفلام العربية والأجنبية، اللي بيتم عرضها في دور العرض، واللي كان بيساعدنا نقرر ايه الفيلم اللي هندخله.
اخترنا لك
تعتبر الإعلامية فريال صالح، واحدة من أوائل الإعلاميين اللي بدأوا في تقديم “التوك شو” وده من خلال برامجها زي حق الجماهير وعلى فين ونجوم على الهوا واخترنا لك، ويعتبر الأخير واحد من البرامج التلفزيونية، اللي منقدرش ننساها، واللي شكلت جزء كبير من طفولتنا.
حديث المدينة
لو اتكلمنا عن حديث المدينة، فأول حاجة هتفكر فيها هو البرنامج اللي قدمه مفيد فوزي، واللي بدأ عرضه سنة 1998، وهو يعتبر من أشهر البرامج الحوارية المصرية على الإطلاق.
وخلاله استضاف مفيد فوزي عدد من السياسيين زي الرئيس الأسبق محمد حسنى مبارك ورؤساء وزراء زي عاطف عبيد وكمال الجنزوري ووزراء داخلية زي أحمد رشدي وزكي بدر وحبيب العادلي، وده يوضح أد ايه البرنامج كان مهم.
هذا المساء
ولو هنتكلم عن 10 برامج تلفزيونية شكلت طفولتنا، منقدرش ننسى برنامج “هذا المساء” لسمير صبري، واللي كان يعتبر، في وقت من الأوقات، هو البرنامج الأشهر على الإطلاق في مصر. واللي استضاف فيه سمير صبري عدد من الفنانين والإعلاميين اللي منقدرش ننساهم زي أمال فهمي ووردة وفرقة المصريين.
فكر ثواني واكسب دقايق
آخر برنامج تلفزيوني على قايمتنا هو “فكر ثواني واكسب دقايق” مع نجوى إبراهيم، واللي كان من أشهر برامجها برضه “صباح الخير” و”مساء الخير” مع بقلظ. برنامج “فكر ثواني واكسب دقايق” عمل رواج كبير أوي وقت العرض، واللي كانت بتسأل فيه نجوى إبراهيم مجموعة من الأسئلة، والجايزة إنك تقابل نجمك المفضل.
في النهاية، عايزين نقول إن احنا اتكلمنا على 10 برامج تلفزيونية بس شكلت طفولتنا، ولكن في برامج تانية كتير زي لعب عيال ولا تذهب هذا المساء وأماني وأغاني، وغيرها وغيرها، متكلمناش عنها. التلفزيون بالنسبة لجيل التمانينات والتسعينات، كان هو المساحة اللي من خلالها بنستمتع بوقتنا بعيدًا عن الدراسة، عشان كده البرامج دي شكلت جزء كبير من طفولتنا وشخصيتنا وأفكارنا.
