بالأمس، خلال الجلسة العامة، وافق مجلس الشيوخ، برئاسة المستشار عبد الوهاب عبد الرازق، من حيث المبدأ، على مشروع قانون العمل الجديد المقدم من الحكومة، والمحال من مجلس النواب. والحقيقة، القانون الجديد، فيه عدد من المميزات، اللي بتخص الأمهات العملات والحوامل، في المقال ده هنتكلم عن 4 مزايا للنساء في مشروع القانون الجديد.
أجازة الوضع
وفقًا للمادة (50) من تقرير اللجنة بمجلس الشيوخ، فللعاملة الحق في إنها تاخد إجازة وضع لمدة أربع شهور، سواء قبل أو بعد الوضع، على أن لاتقل مدة الإجازة بعد الوضع عن 45 يوم، بشرط تقديم شهادة طبية عن الوقت المرجح للوضع، وتكون الإجازة مدفوعة الأجر.
بالإضافة لده، قانون العمل الجديد، ادى الحق للعاملة إنها تاخد إجازة وضع لـ 3 مرات خلال خدمتها. والحقيقة، عايزين نقول، إن كان من المهم تعديل قانون العمل، لأن القانون القديم، كان بيدي للعاملة الحق في 90 يوم بس مش أربع شهور، بالإضافة إلى إن تم تعديل عدد مرات الوضع لـ 3 بدل من 2.
تخفيض ساعات العمل
كمان، نصت المادة على أن يتم تخفيض ساعات العمل اليومية للمرأة الحامل ساعة على الأقل، بدايةً من الشهر السادس، وأكد القانون الجديد، إنه لا يجوز تشغيل المرأة ساعات عمل إضافية طوال مدة الحمل، وحتى نهاية ستة أشهر من تاريخ الوضع.
والحقيقة، إن قانون العمل القديم، مكنش من الواضح فيه، فكرة تخفيض ساعات العمل للمرأة الحامل، كمان مكنش واضح جزئية ساعات العمل الإضافية، وده اللي بيخلي القانون الجديد، مهم بالنسبة للنساء، وخاصةً النساء الحوامل.
الرضاعة
بالإضافة لده، القانون الجديد، بيدي الحق للأمهات بإرضاع أبنائهن فترتين، لا تقل مدة كل فترة عن نصف ساعة، ده بالطبع إلى جانب فترة الراحة. والحقيقة، إن قانون العمل القديم، كان بينص على نفس البند، لكن كان من الهم أن يكون ده موجود في القانون الجديد.
حضانة
وأخيرًا، ألزم القانون الجديد صاحب العمل بإنشاء حضانة، في حالة وجود 100 عاملة أو أكتر، وممكن يتفق مع دار حضانة، عشان تتولى المسؤولية دي، والحقيقة إن في قانون العمل القديم، الأمر مختلفش كتير، عن المشروع الجديد.
في النهاية، عايزين نقول، إن من المهم إن كل ست تعرف حقها في القانون الجديد، عشان ميتمش التلاعب بها، خاصةً إن في بعض أصحاب العمل، بيكون كل همهم هو الشغل وبس، عشان كده بيبدأوا يتغاضوا عن حقوق الستات في العمل.
عشان كده، كان من المهم إننا نسلط الضوء على المميزات، اللي حطها مشروع القانون الجديد، للنساء العاملات، اللي يمكن بعضها ميختلفش كتير عن قانون العمل القديم، إلا إن كان من المهم نسلط الضوء، عليها، عشان تعرفي حقك.
