مفيش شك أن الشك والغيرة من أكتر أسباب تدمير العلاقة بين أي زوجين أو أي اتنين لسه في بداية ارتباطهم. العلاقة الصحية لازم تبقى مبنية على الثقة المتبادلة والصدق، ولو الشكوك اتسربت للعلاقة دي للأسف بتدمر وبتنتهي فوراً.
وفي الموضوع ده هنتكلم عن العلامات اللي بتدل على أنك ماشي في سكة الشك وتخوين الطرف الآخر وبالتالي العلاقة بينكم في طريقها للنهاية والفشل، وفقاً لآراء بعض خبراء العلاقات.
الهدف هنا هو أن لما أي حد فيكم يلاحظ ظهور العلامات دي عليها .. يبدأ يراجع حساباته ويتعامل مع الحكاية بطريقة أفضل ويحاول يحافظ على نجاح العلاقة بدلاً من التسبب في تدميرها.
1- التفتيش في متعلقات الطرف الآخر
لما تبدأي تفتشي في موبايل جوزك وجيوبه وبقية متعلقاته الشخصية بحثاً عن أي دليل على خيانته اللي أنت شاكة فيها، يبقى ده دليل على أنك بتدمري علاقتكم بإيدك.
العلاقة زي ما قولنا فوق لازم تكون مبنية على الثقة المتبادلة والصراحة .. يعني الأفضل أنك تتعاملي مع الطرف الآخر بثقة وغالباً هو هييجي يعترفلك أنه خانك، لأنه لو شافك وأنتي بتفتشي وراه هتبقى مشكلة كبيرة بينكم سواء كان بيخونك أو لا.
2- سوء الظن وتفسير الكلام على مزاجك
لو لقيتي نفسك دايماً بتسيئي الظن في جوزك وبتفسري أي كلام بينه وبين أي أنثى تانية في حياته سواء كنت زميلته في الشغل أو قريبته حتى على أنه بيخونك مع الست دي، بالتالي مهما حلفلك أنه مش بيخونك ولا بيفكر حتى أنتي مش هتصدقيه لأنك مقتنعة باللي في دماغك وبس.
الحل أنك تبطلي شكوك فيه لأنه في الآخر هيزهق وهيخونك بجد وعلاقتكم هتتدمر تماماً
3- التسلط على الطرف الآخر
الست فاكرة أنها لو راقبت كل تحركات جوزها لمدة 24 ساعة في اليوم و7 أيام في الأسبوع بكدة هتمنعه من أنه هيخونها .. وده مش صح لأنها كدة متسلطة عليه وبتتحكم فيه ومفيش أي راجل في الدنيا بيحب ده، وفي النهاية مش هيستحمل الضغط ده والعلاقة هتنتهي.
العلاقة السليمة بتعتمد على أن كل طرف يدي للطرف التاني مساحته الخاصة وبالتالي هيقدروا يكملوا مع بعض.
4- الغضب من عدم الرد السريع على المكالمات والرسايل
لو لقيتي نفسك قفشتي عشان مردش على مكالمتك أو رسالتك على طول، يبقى في مشكلة في الطريق ما بينكم لأنه أول ما هيكلمك هتقفشي عليه وهتقوليله مردتش عليا ليه وهو هيبقى في موقف اللي بيدافع عن نفسه .. ومش هتخلصوا بقى وهتضيعوا وقتكم في مشاكل ع الفاضي.
لازم تبقي عارفة أنه ممكن يكون فعلاً كان مشغول ومعرفش يرد عليكي بسرعة، مش شرط يعني أنه يكون بيخونك .. بالعكس ده لما الراجل بتخون بترد على التليفون بسرعة عشان متتقفش.
5- عايزة تحسي بالأمان كل شوية
لو لقيتي نفسك كل شوية بتسألي جوزك أسئلة من نوعية “بتحبني ولا لا” و “بتحبني أنا أكتر ولا صحابك / أمك / اخواتك” .. يبقى أنتي كدة بتحفري قبر علاقتكم بإيدك.
أكيد في الأول هيحاول يجاوبك بطريقة ترضيكي وتسعدك وهيجاملك كتير .. بس لو الأسئلة دي اتكررت هيزهق طبعاً وهيبطل يقولك كلام حلو وفي النهاية هيدور على السعادة مع حد تاني.
الموضوع مكتوب وكأنه موجه للستات بس، ولكن في الحقيقة هو موجه للطرفين .. الرجالة والستات .. بس بما إن الستات شكاكين بطبعهم ؛ فضلنا نكتبه بالطريقة دي.
