منى المتيم
” أصل هو ماكنش كده .. مش عارفه ليه اتغير ” .. جملة سمعناها ولسا بنسمعها في كتير من العلاقات العاطفية، لدرجة ان بنات كتير بقت بتشوف الراجل ” الكائن المتحول بسلامته ” من كُتر ما هو ممكن يتغير بين يوم و ليلة ..
أيًا كان السبب في ده، خلينا نتفق أن في رجالة كتير بيعرفوا أزاي يعلقوا البنت بيهم وكمان يخلوها تحبهم في وقت قياسي.. على فكرة ده مش كلامي .. ده كلام دراسة ألمانية جديدة، قالت أن الراجل ممكن يلفت نظر البنت ويخليها تُعجب به في أقل من دقيقة .
أما البنت بقي ، فهي كمان ممكن تقرر أن تعجب بالراجل اللى قدامها أو لا خلال 10 ثواني بس من أول ما تشوفه – وده بردوا كلام علمي .
أكيد الراجل مش ساحر يعني … طيب تفتكروا بيعمل ايه عشان يوصل البنت لمرحلة الإعجاب في أقل من دقيقة…
تعالوا وانا أقولكم .
- ما بيجبش ورد يا ابراهيم :
زي ما بقولكم كده ، ديماً البنت بتبعد وتنفر من الراجل التقليدي اللي جاي أول مرة ماسك الورد في أيده و حافظ اسطوانات اتهرست في 100 فيلم هندي قبل كده، عشان كده الراجل اللي بيتعامل بشياكة مع البنت ممكن تعجب بيه من أول دقيقة من غير ما يجيب ورد ولا أي حاجة أصلاً.
- بيعرف ازاي يضحكك :
حقيقي ، الراجل أول ما بيعرف يرسم الابتسامة على وش البنت، بيعرف كمان أنه ممكن جداً يخلي قلبها يدق له – ده إذا ماكنتش دق أصلاً – ومش بعيد تكون قررت أنها تعجب به، وده غالباً بيبان على ضحكتها اللي بتكون طالعة من القلب في الوقت ده.
- أنا مش سوبر مان :
ديماً الراجل اللي بيحاول يصور نفسه أنه خارق القدرات هو الشخص اللي البنت بتحاول تهرب منه وتبعد عنه بكل قوة، لأنها ببساطة مش محتاجة تتجوز سوبر مان اللي بيطير ..لا، بالعكس هي محتاجة تتجوز راجل عادي جداً بس بيكون بيعرف أزاي يحتويها ويحس بيها، عشان كده ديماً الراجل اللي على طبيعته هو أول حاجة بتخطف اهتمام البنت وبيزيد إعجابها به بسرعة .
- العيون اللي بتلمع و النظرات الجريئة :
مع أن كتير من البنات بتحاول تعمل أنها مش واخده بالها من نظرات الإعجاب اللي بتكون في عيون الشخص اللي قدامها وعيونه اللي بتلمع وهو قاعد معها، إلا أن النظرات دي – في أوقات كتير – بتكون سهم جرئ بيفتح قلب البنت ويضغط على زرار الاعجاب وهي مش واخده بالها .
وفي الآخر ، عاوزة أقول لكل بنت بتقرأ كلامي..لازم تعرفي إنك غاليه أوي .. حاجة كده أغلى من الدهب والماس ، عشان كده أوي تسيبي مشاعرك غير للشخص اللي يستاهلها … يستاهلها بجد.
