الكوكيز بتتجاب وتتاكل في أي وقت في السنة، بس في وقت الشتا والسنة الجديدة زي دلوقتي بتكون مختلفة وليها طعم تاني خالص. وعشان كده، قررنا نعملكوا ليست بأحسن أماكن بتعمل كوكيز في القاهرة. الأماكن ديه في غيرها كتير اكيد بس احنا جربنا الخمسة دول و في كمان إجماع عليهم من أغلب الناس!
Dara’s
طبعًا المكان ده في الأصل بيعمل أيس كريم، بس هما كمان بيعملوا كوكيز خطيرة. وساعات كمان بيحطوها على الأيس كريم. بس ممكن تشتروا الكوكيز لوحدها وفعلاً طعمها مميز ودايمًا سخنة.
Amaretti
المكان ده جربناه مؤخرًا وحقيقي كان مبهر. كل حاجة تقريبًا عندهم حلوة بس الكوكيز بالذات مميزة. حجمها كبير وغرقانة في الشوكلاتة من جوا وكمان طرية جدًا وبتقرمش من بره. والاجمل كمان انها مش بتقفل المعدة وخفيفة ودي حاجة مش بنلاقيها كتير بصراحة.
Cookievore
ده من أشهر الأماكن اللي بتبيع كوكيز دلوقتي وهما اللي واكلين السين. وبصراحة حقهم. بيبيعوا بوكس مشهور اوي في معظم الأنواع عنهم. بس اكتر نوعين حبيناهم هما الcoockie chunk والwhite chocolate!
Oven Heaven
جربنا الdough من عندهم وكانت لطيفة جدًا وبصراحه متوقعين الكوكيز كمان تبقى حلوة. دلوقتي هما عاملين بوكس للكريسماس في أنواع كتير وفي كوكيز ملونة عشان تمشي مع الجو!
The Four Fat Ladies
الناس دول مابيعملوش حاجة وحشه تقريبًا. من أول البراوني لكيكة الليمون المشهورة بتاعتهم. ماتنسوش بقى لما تروحوا المرة الجاية كمان تجربوا الكوكيز بتاعتهم!
مستنيين ايه، هاتوا بوكس كوكيز كبير وشغلوا فيلمكم المفضل وانبسطوا!
