زي أي بنت مصرية أصيلة، بتقعد في أي مكان، وأول ما تتفتح سيرة الأبراج والحظ بتقول “لالالا، انا مش بصدق التفاهات دي خالص..” ولما بتبقي لوحدها بتفلي المجلات والجرايد عن الأبراج، قررت بما ان موضوع الأبراج ده شاغلني لفترة ولو جزئيا، اني أكتب عنه، بس بطريقتي أنا، مش هقعد أقولك حجرك الكريم المفضل، ولا القمر بيأثر عليك ازاي، ولا الكلام ده، انا هحاول أجيب م الاخر..! حابين أولا كبداية نقسم الأبراج لأربعة كاتيجوري: ناري “اوعي يلسعك” وترابي “غلط ع الجيوب الأنفية.”، وهوائي “وده زعابيبه كتير” ومائي “بلاش تنزل الغويط”.
النهاردة ميعادنا برج خفيف لطيف ظريف، برج الشباب بتتكسف تقول انها منه، برج العيال السيس والبنات اللي بتقول بيس، برج العذراء أو ما يعرف ب Virgo..!
العذراء أو السنبلة اللي البرج متسمي عليها هي “أستريا” بنت كبير الآلهة “زيوس” وكانت بتعرف بكرهها للجنس البشري ، لدرجة ان أبوها “زيوس” حبسها ف زنزانة هتخرج منها في نهاية البشرية عشان تقضي عليها كلها، برج العذراء برج ترابي،مواليده ما بين 24 أغسطس لحد 23 سبتمبر، نهاية أجازة الصيف وبداية الدراسة، لذلك وكالعادة، هنبدأ بالستات، ويلا نشوف..!
1- واقعية فشخ
من أكتر صفات امرأة برج العذراء هي الواقعية، علي عكس أغلب البنات، هي مش بتحلم بالفارس اللي بييجي علي حصانه الأبيض عشان يتجوزها، ولا بتؤمن بقصص الحب الخرافية، دايما الواقعية قدامها، بتتصرف في حدود الواقع، بتحب لكن قبل ما بتحب بتشوف هل الموضوع يستاهل تضييع الوقت ولا لأ، هل الشخص ده يستحق فعلا قلبي؟ أسئلة كتير بتسألها لنفسها وبناءا علي اجابتها وظروفها بتلاقيها بدأت تتحرك وتفكر..!
2- حجر الزاوية
مش كل الستات تنفع تبقي قائدات في شغلها، من الستات دول ستات برج العذراء، بتفضل انها تكون من ضمن فريق كبير لانجاز مهمات بتتكلف بيها علي انها تكون قائدة لفريق، هي بتبدع كدة، وبتلاقي مساحة تطلع أفكارها، يمكن ده لأن الخجل جزء من شخصيتها، لكنها أجرأ م الراجل علي أي حال.
3- عاشقة للتفاصيل
أي بنت بتحب التفاصيل لكن مش زي بنت برج “العذراء” هي الوحيدة اللي ممكن تعرف عدد حبات الترتر في فستان عروسة ف فرح حضرته من سنتين، هي اللي ممكن تاخد بالها من طبق أكل اتحط علي ترابيزة جنبيها ف مطعم، ماهي إلا رادار متنقل، بتشوف وتحس وتسجل، فلما تلاقيها بتفرش بيتها أو بتشتري جزمة ، ممكن تفضل تلف أيام علي درجة لون معينة، طبعا الموضوع ده يشل أي راجل خلقه ربنا، علي وضعك يا ستي
4- منظمة لدرجة الملل
أي واحدة من برج العذراء بتكون مملة لدرجة الموت، لو متجوزة بتلاقي في بيتها شبشب للتواليت، وشبشب للبيت، وشبشب للشارع، وشبشب للبلكونة، الملايات بتتحط بترتيب معين، الهدوم بتترتب بدرجات الألوان، الطرح متطبقة نفس التطبيقة، شئ يقترب من ال OCD كدة، وطبعا حاجة زي كدة بتكون قاتلة لأي حد همجي مش متعود ع النظام..!
5- بحدود
التحفظ والمحافظة لدرجة التناكة هي سيدة الموقف مع بنات وسيدات برج العذراء، دايما فيه سنة تحفظ علي سنة تمنع كدة في علاقاتها مع الناس والبشرية، مبتتعودش علي حد بسهولة، وغالبا لو بقت صديقة لحد بتبدأ تنتقده أو توجهله ملاحظات علي شكله أو تصرفاته، هي كدة بتبقي بتثق فيه..!
أما عن رجل برج العذراء فحدث ولا حرج “
1- فارس في الجدال
من أكتر صفات برج العذراء المملة في الرجالة هي “الجدال”، فارس لا يشق له غبار في الجدال والمناكفة والخناقات، لذلك ده بيتعب “صاحبته – حبيبته – مراته” أوي، ف تيجي دور الكلمة السحرية اللي كل الرجالة خصوصا رجالة برج العذراء “اللي تشوفه يا حبيبي، انا معنديش اعتراض”، وهكذا، حججه جاهزة، ردوده سريعة، منطقية وملهاش حل، هتسلمي هتسلمي..!
2- نشيط ومثمر
في الشغل، بيكون من أنشط الناس واحسنهم، بيعمل شغل تلاتة لوحده، دايما يعتمد عليه وسهل ينجز، مبيعطلش عامة، وبيعرف كل الناس غلطها، وبيشغلهم وبيعرف يستف أوراقه. بالنسبة للبيت لو رجل برج العذراء في البيت بيكون شعلة نشاط، بيكره يتواجد في مكان مش منظم، بيعشق الترتيب والنظام والنضافة، وبيحب كل حاجة تبقي ف مطرحها.
3- خجول
رجل برج العذراء وعلي عكس كل الرجالة، خجول..! كلامه قليل جدا ويكاد يكون منطوي، علاقاته مع زمايل الشغل محدودة في الشغل، علاقاته مع صحابه كتير بس مش عميقة للدرجة، ممكن يكون له صاحب او اتنين مخلص ليهم لكن باقي العلاقات طياري، مش سهل يفتح قلبه عامة لأي صديق أو حبيبة، بس لو فتح قلبه، بتلاقي انسان مختلف عن الشخص اللي اتعودت تشوفه..!
4- مخلص ورقيق
زي ما قلنا في الفقرة اللي فوق دي، ان رجل برج العذراء إلي حد ما خجول، لكن في الحب، لو حب بجد، مش بيعرف يعبر عن مشاعره بكلام قد ما بيعرف بالأفعال، من أجمل الصفات فيه هو تعلقه بحبيبته جدا، بيحب يبقي موجود معاها علي طول، مش م النوع اللي بيروح ع القهوة بالست ساعات، لازم يقوم يشقر ويتطمن ويرجع يستأنف قعدة القهوة/البلاي ستيشن تاني..!
