في الفترة الأخيرة، انتشرت ظاهرة التشهير على السوشيال ميديا، وبقى من الطبيعي كل يوم أو يومين نلاقي حد بيشهر بحد تاني وبيسبه، وفي كتير من الأحيان بيكون من غير سبب، وده اللي بيضر بسمعة ناس كتير، والفكرة إن في بعض الناس (بتنساق) ورا التشهير ده، وتبدأ هي كمان تساهم في التشهير.
ومن أكتر الحوادث اللي عملت (زخم) الفترة الأخيرة، كان جروب تيليجرام بينشر صور وفيديوهات لبنات وبيشهر بيهم. الموضوع بدأ بإن بنت بلغت عن قناة تيليجرام بتنشر صور شخصية ليها مع عبارات مسيئة، وده بعد ما نشرت فيديو على السوشيال ميديا لشخص في المترو بيعمل إيحاءات جنسية ليها.
مش من حقك
للأسف، في الفترة الأخيرة، انتشر التشهير على السوشيال ميديا، وبقى خطر كبير بيهددنا، لأن ببساطة ممكن، في لحظة، تلاقي حد بينشر فيديو أو صورة ليك، مع عبارات بتسيء ليك ولشخصك، بدون حتى ما تكون عارف الشخص ده قبل كده.
التشهير على السوشيال ميديا ظاهرة تستحق الدراسة، والسؤال اللي بيطرح نفسه، ايه اللي يدفع شخص انه يشهر بحد تاني على السوشيال ميديا من غير ما يعرفه؟ الحقيقة إن مفيش سبب في الدنيا، يخلي حد يعمل كده، غيره إنه شخص مريض.
مش من حق أي حد، إنه ياخد صورة شخصية ليك وينشرها، من غير ما ياخد إذنك. واللي بيترتب عليه، إن مش من حقه ياخد صور شخصية ليك وينشر عليها عبارات مسيئة، لأن ده يعتبر تشهير، ودي جريمة بينص عليها القانون.
التشهير بعد الانفصال
تصدر هاشتاج #حق_سارة_فين الترند على تويتر، واللي بيتكلم عن سارة، اللي انفصلت عن جوزها، وبعد الانفصال بدأت تواجه سلسلة طويلة من التشهير على السوشيال ميديا، واللي ادعى فيها جوزها إن الأطفال مش أولاده، وردًا على ده طلبت سارة إنه يتعمل تحليل دي إن إيه لإثبات النسب، وده بحسب الشكوى اللي قدمتها لرئيس نيابة الشرق ببورسعيد.
الحقيقة إن سارة مش أول واحدة تتعرض للتشهير على السوشيال ميديا، بعد الانفصال عن جوزها أو خطيبها أو حبيبها. واحنا عايزين نقول، إن أيًا كان اللي سبب انفصال الطرفين عن بعض، مينفعش بعد ما ارتبط شخصين ببعض، طرف يشهر بالطرف التاني، ويسيء لسمعته، تحت أي مسمى.
وفي حالة سارة، لو هو شاكك إن دول مش أطفاله، فمن حقه يطلب إثبات نسب، لكن مش من حقه، بأي شكل إنه يشهر بيها ويخوض في عرضها، لأن دي تعتبر جريمة.
وبعيدًا عن كونها جريمة، فهو شيء مؤسف إن طرف يسيء لطرف تاني، بعد علاقة استمرت بينهم لفترة، ويشهر بيه. وعايزين نقول، إن مفيش حاجة في الدنيا، تدي الحق للشريك، بعد الانفصال، إنه يشهر بالطرف التاني.
اعمل ايه لو تعرضت للتشهير؟
في 4 خطوات رئيسية، محتاج تعملهم عشان تاخد حقك من الشخص اللي بيشهر بيك على الإنترنت:
1- خد سكرين شوت للرسالة أو البوست أو الكومنت، ويفضل كمان تاخد سكرين شوت للأكونت بتاعه واللينك، ولو عرفت تجيب رقم الموبايل يبقى كويس جدًا.
2- متتكلمش معاه أو تنشر بيانات عنه عشان مياخدش احتياطاته ويقفل الأكونت.
3- قدم بلاغ عن طريق الإدارة العامة لتكنولوجيا المعلومات أو بلاغ إلكتروني عن طريق النيابة العامة.
4- احتفظ برقم البلاغ عشان تقدر تتابع البلاغ وصل لفين مع المحامي بتاعك.
في النهاية، عايزين نقول إن من الحاجات اللي بقت تخوف بنات كتيرة من فكرة الارتباط، هي خوفها من انها ممكن ترتبط بحد مريض يأذيها أثناء الارتباط، وبعد الانفصال، في أنه يشهر بيها. عشان كده، موضوع التشهير على السوشيال ميديا، بقى ظاهرة لازم نتصدى ليها، لأنها بتأثر على مساحتنا الأمنة، وحقنا إننا نعيش حياة صحية.
