كلنا بنحب نلعب مع الاطفال الصغيرة، بندلعهم وبنقرص خدودهم، بس لما العيال بتزن، ياحفيظ، بنبقي عاوزين نرمي العيل م الشباك زي ما اللمبي عمل مع “ابن مني” كدة، وللأسف فيه بعض الأطفال “القذرين” اللي زنهم يخليك ممكن تقتلهم عادي … دول خمس حلول جديدة عشان تتخلص من زن أي طفل يجننك غير طبعا انك تعرف هو بيزن عليه وتحاول تعالجه، فالآسباب المعروفة زي الجوع والعطش والغيار والنوم معروفة، احنا هنا بنتكلم عن أي عيل بيزن زن ف المطلق….و…ما تيجي نشوف؟
1- فكك منه..!
الحل الأمثل والأحسن واللي هيخلصك م المشكلة دي نهائيا انك تغير مكانك، لو الطفل بيزن ف الصالة روح اوضة النوم، لو بيزن ف الحمام روح المطبخ، اما لو بيجري في البيت كله وهو بيزن وبيعيط فحاول تفتح باب الشقة وتنزل، أو لو تحب تتخلص م المشكلة تماما ممكن تفتح البلكونة وقدامك حلين، يا ترمي نفسك، يا ترميه..!
مزايا الحل ده: تخلص نهائي من وجع الدماغ – روقان البال – توفير تمن الحفاضات.
عيوب الحل ده: اعدام “لو رميت الطفل” – هتروح النار “لو رميت نفسك” – خناقة مع المدام “لو سبت البيت وطفشت”.
2- ولع له سجارة..!
صحابي المدخنين وعشاق النيكوتين هيفهمو انا قصدي ايه، ساعات الواحد بيكون قاعد مزمزق كدة ومش عارف هو عاوز ايه، ولا فايق ولا صاحي، شرب خمسة نسكافية ولسه متيس، فيكتشف انه لو ولع سجارة، كل مشاكله دي بتتحل وبيفوق فجأة، كذلك الطفل…ليه دايما نسبتعد خيار ان الطفل ده “خرمان”؟ محدش أبدا حاول انه يولع لأي عيل زنان سجارة ويجرب كدة يشوف هيسكت ولا لأ؟ انا عامة قررت أتخذ زمام المبادرة وتاني مرة لو جالي عيل زنان هولعله سجارة وهطلبله “اسبرسو” يمكن يفوق ويمخمخ كدة ويبطل زن..!
مزايا الحل ده: هتشرب سجاير ف البيت براحتك بعد كدة – هتلاقي حد تشيل معاه سجايرك.
عيوب الحل ده: لو أبو/أم الطفل ده شافك بتشربه سجاير هيولع فيك ..!
3- اعمله مفاجأة..!
عملا بنصيحة تيمون وبومبا “لما الدنيا تديك ضهرها، ادي ضهرك للدنيا” طبق النصيحة دي علي الطفل الزنان، لما الطفل الزنان يبدأ يشغل السارينة، اعمله مفاجأة تصدمه وتخليه يبطل زن، أشهر المفاجآت دي انك “تغسله وشه” أو “تفرقع بالونة” او تجيب “فوفوزيلا” وتزمرله وهكذا، اعمل حاجة غير متوقعة للطفل، فكر برة الصندوق وابتكر وهتلاقي حلول بنت لذينة جديدة..!
مزايا الحل ده: مفيش حاجة مضمونة..
عيوب الحل ده: بردو مفيش حاجة مضمونة، انتا وابتكارك بقي..!
4- زن معاه..!
م الحاجات المجربة والناجحة جدا، انك تزن مع الطفل الزنان، وبنفس التون بتاعه، وبنفس الايقاع والدرجة، بدأ علي خفيف ابدأ معاه، شد ف الزن شد معاه، عامل الطفل الزنان كأنه عربية وانتو الاتنين علي طريق السخنة بتشدو مع بعض في السرعة، الموضوع ده هيخلي الطفل يبطل زن، لأنه هيستغرب من منظرك جدا، وهيحسسه هو قد ايه فعلا مزعج..!
مزايا الحل ده: الطفل هيسكت أسرع مما تتخيل – هيهدي منك واحتمال كبير ينام..
عيوب الحل ده: هيجيلك صداع بشع – هتسقط انتا كمان بعد المجهود الخرافي في الزن.
