مؤخرًا ظهرت ميمز كتير فيها كلمة واحدة بس. “روحتي؟”
بس الموضوع أكبر شوية من فكرة إنه ميمز و “ههه” وهزار عالنت أو هكذا نتمنى يعني…
ايه الحكاية؟ الموضوع بدأ على تويتر لما حد قرر يتريق عالولاد اللي لما يحبوا يحسسوا البنت إنهم مهتمين يبعتوا للبنت كلام زي “روحتي؟” “كلتي؟” او “ذاكرتي؟” في إشارة واضحة إن كل الولاد بيعملوا كدة بس عشان يثبتوا البنت اللي معجبين بيها مش أكتر وأن الموضوع تافه وسطحي.
شويه وظهر بنات بيدافعوا عن الكلام ده وإنه مش غلط وإن فكرة إن الولد اللي بيحبك يطمن عليكي دي حاجه ماتعيبهوش، بالعكس. وكمان مش كل واحد هتقابليه فى حياتك بيتعامل بلطافة شويتين هتوصميه بقى بترند “روحتي؟” ده والچنتلة تختفي مالبلد.
بالمناسبة السعيدة دي بقى، حبينا نوضح ليه مش كل ميم وترند بيتفتح عالإنترنت محتاجين نهتم بيه ونطبقه في حياتنا الغير إفتراضية!
-كل شخص ليه صفاته وشخصيته اللي بتميزه لوحده وماينفعش احكم على حد مرتبطة بيه بس من ميمز عالسوشيال ميديا.
-كل علاقة برضو وليها شكلها الفريد وطريقة تعامل الطرفين فيها مش لازم تبقى شبه باقي الناس الكوول “الروشة” اللي عالسوشيال ميديا. كل علاقة بتخلق قواعدها وقوانينها.
-اللطافة مش هتختفي أكيد من العالم بسبب “ميم” بس اكيد هتخلي الولد يفكر ١٠٠ مرة قبل ما يقول أو يعمل حاجه معينة قدامك عشان شافك وشاف بنات كتير بتتريق عليها عالنت.
